ଜଗତ୍ସିଂହପୁର ଅଫିସ,୧୧।୫: ଜଗତ୍ସିଂହପୁରରେ ଥିବା ମୋଟ ୭୪ ଶିଳ୍ପାନୁଷ୍ଠାନ ମଧ୍ୟରୁ ୯ ମୁଖ୍ୟ ଦୁର୍ଘଟଣା ପ୍ରବଣ ଓ ୬ଟି ବିପଦପୂର୍ଣ୍ଣ ଶିଳ୍ପାନୁଷ୍ଠାନ ରହିଛି। ସେଠାରେ ଆମୋନିଆ ଓ କ୍ଲୋରିନ୍ ଗ୍ୟାସ ଲିକ୍ ହେବାର ସମ୍ଭାବନା ରହୁଛି। ସମ୍ଭାବ୍ୟ ପରିସ୍ଥିତିକୁ ଏଡ଼ାଇବା ପାଇଁ ସମସ୍ତ ପ୍ରସ୍ତୁତି ଜରୁରୀ। ବିଶେଷକରି ଅଫସାଇଟ୍ ଏମର୍ଜେନ୍ସି ପ୍ଲାନ ପ୍ରସ୍ତୁତ ସହ ଅବିଚ୍ଛିନ୍ନ ଭାବେ ରାସାୟନିକ ଦୁର୍ଘଟଣା ପରିଚାଳନା କରିବା, ରାଜ୍ୟ ଓ କେନ୍ଦ୍ର କ୍ରାଇସେସ୍ ଗ୍ରୁପ୍କୁ ସୂଚନା ପଠାଇବା, ମକଡ୍ରିଲ୍ କରାଇବା, ଆଖପାଖ ଜନସାଧାରଣଙ୍କୁ ରାସାୟନିକ ଦୁର୍ଘଟଣା ସମ୍ପର୍କରେ ସଚେତନ କରାଇବା ଆଦି ଉପରେ ଧ୍ୟାନ ଦେବା ଆବଶ୍ୟକ । ମଙ୍ଗଳବାର ଅପରାହ୍ନରେ ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ସମ୍ଭାବ୍ୟ ରାସାୟନିକ ଦୁର୍ଘଟଣା ମୁକାବିଲା ନିମନ୍ତେ ଅନୁଷ୍ଠିତ ଜିଲା ଆପାତକାଳୀନ ବୈଠକରେ ପୌରୋହିତ୍ୟ କରି ଜିଲାପାଳ ପାରୁଲ ପଟାୱରୀ ଉପସ୍ଥିତ ଶିଳ୍ପାନୁଷ୍ଠାନ କର୍ମକର୍ତ୍ତାମାନଙ୍କୁ ଏହି ପରାମର୍ଶ ଦେଇଛନ୍ତି । ସେ କହିଥିଲେ, ପାରାଦୀପରେ ଗଢ଼ି ଉଠିଥିବା ବୃହତ ଶିଳ୍ପାନୁଷ୍ଠାନଗୁଡିକରେ ସମ୍ଭାବ୍ୟ ରାସାୟନିକ ଦୁର୍ଘଟଣାର ମୁକାବିଲା ନିମନ୍ତେ ଜିଲା ଆପାତକାଳୀନ (ଡିଷ୍ଟ୍ରିକ୍ଟ କ୍ରାଇସେସ୍ ଗ୍ରୁପ୍) ବୈଠକ ହେଉଛି। ଏହି ଗ୍ରୁପ୍ ଆଗୁଆ ପ୍ରସ୍ତୁତି, ସୁରକ୍ଷା ବନ୍ଦୋବସ୍ତ ଗ୍ରହଣ କରିବା ଉପରେ କାର୍ଯ୍ୟ କରୁଛି। ପାରାଦୀପରେ ଏକ ଅଗ୍ନିଶମ ୟୁନିଟ ଖୋଲିବା ଉଚିତ। ଏଥିସହ ଅଗ୍ନି ପ୍ରପୀଡିତଙ୍କ ଚିକିତ୍ସା ସୁବିଧା ପାଇଁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯିବ। ବାହାର ରାଜ୍ୟର ବୃହତ୍ ଶିଳ୍ପାନୁଷ୍ଠାନଗୁଡିକରେ ରାସାୟନିକ ଦୁର୍ଘଟଣା ନିମନ୍ତେ ନିଆଯାଉଥିବା ସୁରକ୍ଷା ଉପାୟ ଉପରେ ସୂଚନା ଆଦାନପ୍ରଦାନ ଉପରେ ଜିଲାପାଳ ଗୁରୁତ୍ୱାରୋପ କରିଥିଲେ। ବୈଠକରେ ଭୋପାଳସ୍ଥିତ ବିପର୍ଯ୍ୟୟ ପରିଚାଳନା ଅନୁଷ୍ଠାନର ଡେପୁଟି ଡାଇରେକ୍ଟର ଡ. ଅସିତ କୁମାର ପାତ୍ରୋ ରିସୋର୍ସପର୍ସନ ଭାବେ ଯୋଗଦେଇ ସୁରକ୍ଷା ସମ୍ପର୍କିତ ଅନେକ ଗୁରୁତ୍ୱପୂର୍ଣ୍ଣ କଥା କହିଥିଲେ। ସ୍ଥାନୀୟ କ୍ରାଇସିସ୍ ଗ୍ରୁପର ଅଧ୍ୟକ୍ଷ ତଥା ପାରାଦୀପ ଅତିରିକ୍ତ ଜିଲାପାଳ କାହ୍ନୁୁଚରଣ ଧୀର ପ୍ରାକୃତିକ ବିିପର୍ଯ୍ୟୟ ଓ ମନୁଷ୍ୟକୃତ ବିପର୍ଯ୍ୟୟ ସମ୍ପର୍କରେ ଅବତାରଣା କରିଥିଲେ। ପ୍ରାରମ୍ଭରେ ଫ୍ୟାକ୍ଟ୍ରିଜ୍ ଆଣ୍ଡ ବ୍ରଏଲର୍ ବିଭାଗ ସହକାରୀ ନିର୍ଦ୍ଦେଶକ ଚନ୍ଦ୍ରକାନ୍ତ ଦଳାଇ ଜିଲାରେ ଶିଳ୍ପାନୁଷ୍ଠାନର ସଂକ୍ଷିପ୍ତ ଦୃଶ୍ୟକ୍ରମ, ଜିଲା କ୍ରାଇସିସ୍ ଗ୍ରୁଫ୍ର କାର୍ଯ୍ୟାବଳୀ ସମ୍ପର୍କରେ କହିଥିଲେ। ବୈଠକରେ ଇଫ୍କୋ, ଆଇଓସିଏଲ୍ ରିଫାଇନାରୀ, ପିପିଏଲ୍, ଗେଲ୍ ଇଣ୍ଡିଆ ଆଦି ଶିଳ୍ପାନୁଷ୍ଠାନର କର୍ମକର୍ତ୍ତାମାନେ ଭାଗନେଇ ପାୱାର ପଏଣ୍ଟ ମାଧ୍ୟମରେ ସେମାନଙ୍କ କମ୍ପାନୀ ପକ୍ଷରୁ ଗ୍ରହଣ କରାଯାଇଥିବା ସୁରକ୍ଷା, ମକଡ୍ରିଲ୍, ପ୍ରସ୍ତୁତି ସମ୍ପର୍କରେ ପ୍ରଦର୍ଶନ କରିଥିଲେ। ଏଥିରେ ସିଆଇଏସ୍ଏଫ୍ କମାଣ୍ଡାଣ୍ଟ, ସିଡିଏମ୍ଓ, ପରିବହନ ଅଧିକାରୀ, ଡିଏସ୍ପି ସତ୍ୟ ନାରାୟଣ ପଟ୍ଟନାୟକ, ଜିଲା ଶିଳ୍ପ କେନ୍ଦ୍ର ସାଧାରଣ ପରିଚାଳକ, ସିଡିଏଓ, ଫାୟାର ଅଫିସର, ଆର୍ଡବ୍ଲ୍ୟୁଏସ୍ଏସ୍ ନିର୍ବାହୀଯନ୍ତ୍ରୀ, ଜନସ୍ବାସ୍ଥ୍ୟ, ପ୍ରଦୂଷଣ ନିୟନ୍ତ୍ରଣ ବିଭାଗର ଅଧିକାରୀମାନେ ଯୋଗଦେଇଥିଲେ। ଶେଷରେ ଜରୁରୀ ବିଭାଗ ଡେପୁଟି କଲେକ୍ଟର ବିଶ୍ୱଶ୍ୱିନୀ ପୃଥାଳ ଧନ୍ୟବାଦ ଦେଇଥିଲେ।
