ଫରିଦାବାଦ୍,୪।୩ : ହରିୟାଣାର ପରିଦାବାଦରେ ପ୍ରାଣି ଚିକିତ୍ସକଙ୍କ ଏକ ଦଳ ଗର୍ଭବତୀ ଗାଈ ପେଟରୁ ୭୧ କିଲୋଗ୍ରାମ ଆବର୍ଜନା ବାହାର କରିଛି। ଗାଈ ପେଟରେ ପ୍ଲାଷ୍ଟିକ, ନଖ ଓ ଅନ୍ୟ ଆବର୍ଜନା ରହିଥିଲା। କିନ୍ତୁ ସବୁ ଚେଷ୍ଟା ପରେ ମଧ୍ୟ ଗାଈ ଓ ତା’ର ଛୁଆଙ୍କୁ ବଞ୍ଚାଇପାରି ନାହାନ୍ତି ପ୍ରାଣି ଚିକିତ୍ସକଙ୍କ ଦଳ।
ଗତ ମାସ ଶେଷ ଆଡ଼କୁ ଏକ ଦୁର୍ଘଟଣାର ସମ୍ମୁଖୀନ ହୋଇଥିବା ଗାଈକୁ ଉଦ୍ଧାର କରିଥିଲା ଫରିଦାବାଦର ପଶୁ ଟ୍ରଷ୍ଟ। ପଶୁ ଚିକିତ୍ସକଙ୍କ ଏକ ଦଳ ୪ ଘଣ୍ଟା ଧରି ଅପରେଶନ ପରେ ଗାଈ ପେଟରୁ ପ୍ଲାଷ୍ଟିକ, ନଖ, ମାର୍ବଲ୍ସ ଓ ଅନ୍ୟାନ୍ୟ ଆବର୍ଜନା ମିଳିଥିବା ଟ୍ରଷ୍ଟ ସଭାପତି ରବି ଦୁବେ କହିଛନ୍ତି। ସେମାନେ ଗାଈର ଛୁଆକୁ ବଞ୍ଚାଇବା ପାଇଁ ବିଫଳ ଚେଷ୍ଟା କରିଥିଲେ। ଗାଈ ପେଟରେ ଅତ୍ୟଧିକ ପରିମାଣରେ ଆବର୍ଜନା ଥିବାରୁ ତା’ର ଛୁଆକୁ ବଢ଼ିବା ପାଇଁ ପର୍ଯ୍ୟାପ୍ତ ଯାଗା ମିଳି ନ ଥିଲା। ୩ ଦିନ ପରେ ଗାଈର ମୃତ୍ୟୁ ହୋଇଥିଲା। ” ୧୩ ବର୍ଷର ଅଭିଜ୍ଞତାରେ ଗାଈ ପେଟରୁ ଏତେ ପରିମାଣରେ ଆବର୍ଜନା ବାହାରିବା ମୁଁ ଦେଖି ନାହିଁ “ ବୋଲି ଦୁବେ କହିଛନ୍ତି। ଏହି ଘଟଣା ଦେଶର ମୁଖ୍ୟତଃ ଦୁଇଟି ସମସ୍ୟା (ଦେଶର ପ୍ରଦୂଷଣ ଓ ବୁଲା ଗୋରୁ)କୁ ଦର୍ଶାଉଛି।
