ପୁରୀ ଅଫିସ,୧୦ା୭: ପୁରୀରେ ରଥଯାତ୍ରା ପାଇଁ ପ୍ରାୟ ୭୦ ପ୍ଲାଟୁନ୍ ଫୋର୍ସ ମୁତୟନ ହେବେ। ସହରରେ ନୋ ଭେଇକିଲ୍ ଜୋନ୍ ପ୍ରସ୍ତୁତ କରାଯିବ। ସେହିପରି ସହରରେ କର୍ଫ୍ୟୁ ଜାରି କରାଯିବ। ଆସନ୍ତା ୧୧ ତାରିଖ ରାତ୍ର ୮ଟାରୁ ୧୩ ତାରିଖ ରାତ୍ର ୮ଟା ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରହିବ। ତେବେ ଜରୁରିକାଳୀନ ସ୍ଥିତିରେ ସାଧାରଣ ଲୋକଙ୍କୁ ଯାତାୟତ ଅନୁମତି ଦିଆଯିବ। ସ୍ବାସ୍ଥ୍ୟଗତ ସମସ୍ୟା ସମୟରେ ସାଧାରଣ ଲୋକଙ୍କୁ ଗ୍ରୀନ୍ ଜୋନ୍ ଦେଇ ଡାକ୍ତରଖାନା ଯିବାକୁ ପଡ଼ିବ। ଏଥିପାଇଁ ପୋଲିସ ପ୍ରଶାସନ ପକ୍ଷରୁ ସ୍ବତନ୍ତ୍ର ଅଧିକାରୀ ନିୟୋଜିତ ହେବେ। ତେବେ ସ୍ବାସ୍ଥ୍ୟଗତ ଓ ଜରୁରିକାଳୀନ ସ୍ଥିତିକୁ ବାଦ୍ ଦେଇ ଅନ୍ୟ କୌଣସି କାରଣ ଦେଖାଇ ସାଧାରଣ ଲୋକେ ଘରୁ ବାହାରି ପାରିବେ ନାହିଁ ବୋଲି ଜିଲାପାଳ ସମର୍ଥ ବର୍ମା କହିଛନ୍ତି। କର୍ଫ୍ୟୁ ସମୟରେ ଦୋକାନ ବଜାର ବନ୍ଦ ରହିବ। ତେଣୁ କର୍ଫ୍ୟୁ ପୂର୍ବରୁ ଆବଶ୍ୟକ ଜିନିଷପତ୍ର କିଣିନେବା ପାଇଁ ପୁରୀ ସହରବାସୀଙ୍କୁ ଜିଲାପାଳ ଅନୁରୋଧ କରିଛନ୍ତି।
ସେହିପରି ଶ୍ରୀମନ୍ଦିର ମୁଖ୍ୟ ପ୍ରଶାସକ କ୍ରିଷନ କୁମାର କହିଛନ୍ତି, ଶ୍ରୀମନ୍ଦିରଠାରୁ ଗୁଣ୍ଡିଚା ମନ୍ଦିର ପର୍ଯ୍ୟନ୍ତ ପ୍ରତି ଗଳିରେ ବ୍ୟାରିକେଡ୍ ବ୍ୟବସ୍ଥା ହେବ। ସାହିଗୁଡ଼ିକରେ ମଧ୍ୟ ବ୍ୟାରିକେଡିଂ କରାଯିବ। ଏହାବ୍ୟତୀତ ପୁରୀ ସହରର ପ୍ରବେଶ ପଥ ସିଲ୍ କରାଯିବା ସହ ଜିଲାର ପ୍ରବେଶ ପଥରେ କଡ଼ା ଯାଞ୍ଚ ହେବ। ଭୁବନେଶ୍ୱର, କୋଣାର୍କ ଓ ବ୍ରହ୍ମଗିରି ପଟୁ ପୁରୀ ସହରକୁ ପ୍ରବେଶ କରୁଥିବା ଲୋକଙ୍କୁ ଯାଞ୍ଚ କରାଯିବ। ଅନଧିକାର ଲୋକଙ୍କୁ ପ୍ରବେଶ ଅନୁମତି ମିଳିବ ନାହିଁ। ରଥଯାତ୍ରା ଦିନ ନିର୍ଦ୍ଧାରିତ ସମୟ ପୂର୍ବରୁ ନୀତିକାନ୍ତି ଆରମ୍ଭ ହେବ। ରଥଯାତ୍ରା ପାଇଁ ପାଖାପାଖି ୨ହଜାରରୁ ଊର୍ଦ୍ଧ୍ୱ ସେବାୟତ, କର୍ମଚାରୀଙ୍କ ଆର୍ଟି-ପିସିଆର୍ ଟେଷ୍ଟ ହୋଇ ସାରିଲାଣି। ନେଗେଟିଭ୍ ଥିବା ବ୍ୟକ୍ତିଙ୍କୁ ଅନୁମତି ମିଳିବ ନାହିଁ। କୋଭିଡ୍ କଟକଣା ମଧ୍ୟରେ ରଥଯାତ୍ରା କରିବା ପାଇଁ ପ୍ରଶାସନ ପକ୍ଷରୁ ସମସ୍ତ ପଦକ୍ଷେପ ନିଆଯାଇଛି ବୋଲି ମୁଖ୍ୟ ପ୍ରଶାସକ କହିଛନ୍ତି।
