ଉମରକୋଟ,୩।୩(ସନ୍ତୋଷ ସତପଥୀ): ଉମରକୋଟ ଥାନା ଅଧୀନ କୋଚନିଆମ୍ବା ଗ୍ରାମରେ ଗତ ଫେବୃଆରୀ ୨୨ ଓ ୨୩ ତାରିଖ ମଧ୍ୟରାତ୍ରିରେ ବଡ଼ ଧରଣର ଡକାୟତି ହୋଇଥିଲା। ବେକରେ ଭୁଜାଲି ଲଗାଇ ହାତ ଗୋଡ଼ ବାନ୍ଧି ୭୦ ଲକ୍ଷ ଟଙ୍କା ଲୁଟି ନେଇଥିଲେ ଦୁର୍ବୃତ୍ତ। ପୋଲିସ ମଙ୍ଗଳବାର ଘଟଣାର ପର୍ଦ୍ଦାଫାଶ କରିଛି। ଲୁଟେରାଙ୍କଠାରୁ ୨୧ ଲକ୍ଷ ୩୩ ହଜାର ଟଙ୍କା, ଡକାୟତିରେ ବ୍ୟବହୃତ କାର(ନଂ OD-୨୪H-୪୨୯୪), ଅପରାଧରେ ବ୍ୟବହୃତ ଗୋଟିଏ ସ୍କୁଟି, ୧୫ ସୁନା ଆଙ୍ଗୁଠି ମୁଦି, ସୁନା ଜୁଗନି ମାଳି, ୧୩ଟି ସୁନା ଲକେଟ, ୨ ଯୋଡ଼ା ରୂପା ଆଙ୍କଲେଟ୍, ରୂପା ଆଙ୍ଗୁଠି ଆଦି ଜବତ କରାଯାଇଛି। ଏପରିକି ଡକାୟତିରେ ବ୍ୟବହୃତ ଭୁଜାଲି, ଲୁହା ରଡ଼ ଜବତ କରାଯିବା ସହ ଏହି ଡକାୟତି ରେ ୭ ଜଣ ଅନ୍ତଜିଲା ଡକାୟତ ଗିରଫ ହୋଇଛନ୍ତି ବୋଲି ଖବରଦାତା ସମ୍ମିଳନୀ କରି ସୂଚନା ଦେଇଛନ୍ତି ।
ଅତିରିକ୍ତ ଜିଲା ଆରକ୍ଷୀ ଅଧିକ୍ଷକ ଆଦିତ୍ୟ ସେନଙ୍କଠାରୁ ମିଳିଥିବା ସୂଚନା ପ୍ରକାରେ, ଅଭିଯୋଗକାରୀ ଅମୂଲ୍ୟ ଜେନା ଜମି ବିକ୍ରି କରି ପ୍ରଚୁର ପରିମାଣର ନଗଦ ଟଙ୍କା ଘରେ ରଖିଥିବା ଖବର ତାଙ୍କ ଦୁଇଜଣ ସମ୍ପର୍କୀୟ ଡକାୟତମାନଙ୍କୁ ଖବର ଦେଇଥିଲେ। ତେଣୁ ଡକାୟତମାନେ ଏକ ପୂର୍ବ ଯୋଜନା ମୁତାବକ ଷଡ଼ଯନ୍ତ୍ର ରଚିଥିଲେ। ରାତି ଅଧରେ ସେମାନେ ଡକାୟତି କରି ନଗଦ ଟଙ୍କା ସହ ସୁନା ଅଳଙ୍କାର ଲୁଟି ନେଇଥିଲେ। ଏପରିକି ଅମୂଲ୍ୟଙ୍କ ହାତ, ଗୋଡ ଏବଂ ମୁହଁ ବାନ୍ଧି ତାଙ୍କୁ ଏକ କୋଠରୀ ଭିତରେ ବନ୍ଦ କରି ସେଠାରୁ ଚାଲି ଯାଇଥିଲେ।
ନବରଙ୍ଗପୁର ଜିଲା ଏସ୍ପି ଏମ୍. ସନ୍ଦୀପ ସମ୍ପଦଙ୍କ ନିର୍ଦ୍ଦେଶ କ୍ରମେ ଅତିରିକ୍ତ ଆରକ୍ଷୀ ଅଧିକ୍ଷକ ଆଦିତ୍ୟ ସେନ, ଏସ୍ଡିପିଓ ଶୁଭେନ୍ଦୁ ସବର, ଉମରକୋଟ ଥାନା ଅଧିକାରୀ ବିପିନ କୁମାର ବାଘ, ଝରୀଗାଁ ଥାନା ଅଧିକାରୀ ରଚିତା ମାଡକାମୀ,ଡାବୁଗାଁ ଥାନା ଅଧିକାରୀ ରଘୁନାଥ ମାଝୀ,କନଷ୍ଟେବଳ ମହେଶ ପଟ୍ଟନାୟକ, ନରେନ୍ଦ୍ର ନାୟକ,ନରେନ୍ଦ୍ର ଗୋଲାପୀଙ୍କୁ ନେଇ ଏକ ସ୍ବତନ୍ତ୍ର ଟିମ ଗଠନ କରି ବିଭିନ୍ନ ଦିଗକୁ ନେଇ ତଦନ୍ତ ଆରମ୍ଭ କରିଥିଲା ପୋଲିସ।
ଘଟଣାର ପର୍ଦାଫାଶ କରିବାକୁ ପ୍ରଥମେ ପୋଲିସ ସମ୍ପର୍କୀୟଙ୍କ ଉପରେ ସନ୍ଦେହ କରି ସେମାନଙ୍କୁ ଉଠାଇ ତଦନ୍ତ ଆରମ୍ଭ କରିଥିଲା। ଧୀରେ ଧୀରେ ସମସ୍ତ ତଥ୍ୟ ବାହାର କରିଥିଲା। ଡକାୟତ ମାନେ ଚୋରି ଟଙ୍କାକୁ ଆତ୍ମସାତ କରିବାକୁ ଛତ୍ର ଭଙ୍ଗ ଦେଇ ଜିଲା ତଥା ପଡୋଶୀ ରାଜ୍ୟକୁ ଯାଇ ଲୁଚି ରହିଥିଲେ। ପୋଲିସ ସ୍ବତନ୍ତ୍ର ଟିମ ବାହାର ଜିଲା ଏବଂ ରାଜ୍ୟକୁ ଯାଇ ଦୀର୍ଘ ଆଠ ଦିନ ପରେ ୭ ଜଣ ଆନ୍ତଃଜିଲା ଡକାୟତଙ୍କୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି।
ଧରାପଡ଼ିଥିବା ଡକାୟତ ମାନେ ହେଲେ ନବରଙ୍ଗପୁର ଜିଲା ମାଝୀଗୁଡାର ବାବୁଲା ରଣା, ଗଣେଶ ରଣା,ଧୀରଜ ଲାଇଚନ (ଟୁକୁ),ନବରଙ୍ଗପୁର ଜିଲା ଧର୍ଣାବେଡା ଗ୍ରାମର ଚିତ୍ରସେନ ଗଣ୍ଡା,କୋରାପୁଟ ଜିଲା ଜୟପୁର ସଦର ଥାନା ଅଧୀନ ମାଝୀଗୁଡା ଗ୍ରାମର ସିସିଏଲ କୁନାଲ, ଘାସୀ ହରିଜନ ଓ କୋଟପାଡ଼ ଥାନା ଅଧୀନ ଝାଲିଆଗୁଡା ଗ୍ରାମର ସୁକଦେବ ମୁଦୁଲିଙ୍କୁ ଗିରଫ କରଯାଇ କୋର୍ଟ ଚାଲାଣ କରାଯାଇଛି। ଏହି ଡକାୟତି ଘଟଣାରେ ସମ୍ପୃକ୍ତ ଥିବା ଅନ୍ୟ ଡକାୟତମାନଙ୍କୁ ଧରିବାକୁ ପୋଲିସ ପକ୍ଷରୁ ତଦନ୍ତ ଚାଲିଥିବା ପୋଲିସ ପ୍ରକାଶ କରିଛି।
ଆଜିର ଏହି ଖବରଦାତା ସମ୍ମିଳନୀ ରେ ଅତିରିକ୍ତ ଆରକ୍ଷୀ ଅଧିକ୍ଷକ ଆଦିତ୍ୟ ସେନ, ଏସ୍ଡିପିଓ ଶୁଭେନ୍ଦୁ ଶବର, ପାପଡାହାଣ୍ଡି ଏସ୍ସିପିଓ ,ଉମରକୋଟ ଥାନା ଅଧିକାରୀ ବିପିନ କୁମାର ବାଘ, ଏସଆଇ ଅକ୍ଷୟ ମିଶ୍ର, ବିଶରଞ୍ଜନ ପାଢ଼ୀ, ନରେନ୍ଦ୍ର ଗୋଲାପୀ,କନଷ୍ଟେଳ ମହେଶ ପଟନାୟକ,ନରେନ୍ଦ୍ର ନାୟକ,ପ୍ରକାଶ ଗଣ୍ଡ, ପ୍ରମୁଖ ଉପସ୍ଥିତ ଥିଲେ। ବାବୁଲା ରଣା,ଗଣେଶ ରଣା ଅଭିଯୋଗକାରୀ ଅମୁଲ୍ୟଙ୍କ ଦୂର ସମ୍ପର୍କୀୟ ବୋଲି ସୂଚନା ମିଳିଛି।
