ଅନୁଗୋଳ ଅଫିସ୍, ୧୫।୮ – ଅନୁଗୋଳ ସହରର ଦୁଇଟି ଏଟିଏମ୍ କାଟି ପାଖାପାଖି ୨୮ ଲକ୍ଷ ଟଙ୍କା ଲୁଟ୍ ଘଟଣାରେ ପୋଲିସକୁ ମିଳିଛି ବଡ଼ ସଫଳତା। ଏହି ଘଟଣାରେ ବାହାର ରାଜ୍ୟର ଲୁଟେରାଙ୍କ ହାତ ଥିବା ପୋଲିସ ଅନୁସନ୍ଧାନରୁ ଜାଣିବା ପରେ ସେମାନଙ୍କ ପିଛା କରିଥିଲା। ତେବେ ଦୁର୍ବୃତ୍ତମାନଙ୍କୁ ଛତିଶଗଡ଼ ପୋଲିସ ଗିରଫ କରିଥିବା ଜାଣିବା ପରେ ଅନୁଗୋଳ ପୋଲିସ ସେଠାରେ ପହଞ୍ଚି ଏଟିଏମ୍ରୁ ଲୁଟ୍ ହୋଇଥିବା ଟଙ୍କା ମଧ୍ୟରୁ ୧୮ ଲକ୍ଷ ଜବତ କରିବା ସହ ୭ ଲୁଟେରା ହରିୟାଣା ରାଜ୍ୟ ନୁହୁ ଜିଲାର ଅମର ଅଲ୍ଲୀ, ତାରିଫ୍ ଖାନ୍, ମହମ୍ମଦ ଚୌୱାନି, ମୁନ୍ଫେଡ଼, ଆଜାଦ୍, ଅମାନ୍ତ ଓ ହାଇଦର ଅଲ୍ଲୀଙ୍କୁ ଶୁକ୍ରବାର ଅନୁଗୋଳ ଆଣିଥିବା ଏସ୍ଡିପିଓ ଅଶ୍ୱିନୀ କୁମାର ସାହୁ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ସମସ୍ତ ଅଭିଯୁକ୍ତଙ୍କୁ କୋର୍ଟରେ ହାଜର କରାଯିବା ପରେ ଜେଲ୍ ପଠାଯାଇଛି। ସେମାନଙ୍କୁ ୩ ଦିନିଆ ରିମାଣ୍ଡରେ ଅଣାଯିବ ବୋଲି ଏସ୍ଡିପିଓ ସୂଚନା ପ୍ରଦାନ କରାଯାଇଛି।
ଏସ୍ଡିପିଓ କହିଛନ୍ତି ଯେ, ହରିୟାଣା ରାଜ୍ୟର ଏହି ଦୁର୍ବୃତ୍ତମାନେ ଦେଶର ବିଭିନ୍ନ ସ୍ଥାନରେ ଥିବା ଏଟିଏମ୍ରୁ ଲୁଟ୍ ପାଇଁ ଟ୍ରକ୍ ଓ କଣ୍ଟେନର ଧରି ବୁଲିଥାନ୍ତି। ଢେଙ୍କାନାଳ ଜିଲାରୁ ଏମାନେ ଗତ ୮ ତାରିଖରେ ଏକ କାର୍ ଚୋରି କରିଥିଲେ। ୯ ତାରିଖରେ କରଡ଼ାଗାଡ଼ିଆସ୍ଥିତ ଭାରତୀୟ ଷ୍ଟେଟ ବ୍ୟାଙ୍କ ଏଟିଏମ୍ କାଟି ୨୭ ଲକ୍ଷ ୯୦ ହଜାର ଟଙ୍କା ଦୁର୍ବୃତ୍ତମାନେ ନେଇଯାଇଥିଲେ। ଏହାପରେ ଅମଲାପଡ଼ା ଠାରେ ଥିବା ବ୍ୟାଙ୍କ ଅଫ୍ ଇଣ୍ଡିଆ ଏଟିଏମ୍କୁ ସେମାନେ କାଟିଥିଲେ ହେଁ ଟଙ୍କା ନେବାରେ ବିଫଳ ହୋଇଥିଲେ। ପରେ ଚୋରା କାର୍ରେ ୫୫ ନମ୍ବର ଜାତୀୟ ରାଜପଥ ଦେଇ ସମ୍ବଲପୁର ଅଭିମୁଖେ ଯାଇଥିବା ସିସିଟିଭିରୁ ଜଣାପଡ଼ିଥିଲା। ଫଳରେ ଅନୁଗୋଳ ପୋଲିସର ଦୁଇଟି ଟିମ୍ ଉକ୍ତ ରାସ୍ତାରେ ଆଗକୁ ବଢ଼ିଥିଲା। ହଣ୍ଡପା ଥାନା ବାମୁର ଠାରେ ଲୁଟେରାମାନେ ନେଇଥିବା ଗାଡ଼ିର ସନ୍ଧାନ ପାଇବା ପରେ ଅନୁଗୋଳ ଏସ୍ଡିପିଓ ସାହୁ, ଥାନା ଅଧିକାରୀ ରମେଶ ବିଶୋଇ ଓ ସ୍ପେଶାଲ ସ୍କ୍ବାଡ୍ ନେତୃତ୍ୱରେ ଦୁଇଟି ଟିମ୍ ଛତିଶଗଡ଼ ଅଭିମୁଖେ ଗତ ୧୦ ତାରିଖ ରାତିରେ ଯାଇଥିଲେ। ଏହି ସମୟରେ ଲୁଟେରାମାନେ ଛତିଶଗଡ଼ ବଲୋଦା ବଜାରରେ ଏଟିଏମ୍ ଲୁଟ ଘଟଣାରେ ସେଠାକାର ପୋଲିସ ହାତରେ ଧରାପଡ଼ିଥିବା ସୂଚନା ମିଳିଥିଲା। ସେଠାରେ ୪ ଦିନ ରହିବା ସହ ୭ ଅଭିଯୁକ୍ତଙ୍କୁ ରିମାଣ୍ଡରେ ଅନୁଗୋଳ ଅଣାଯାଇଥିଲା। ଏହି ଘଟଣାରେ ଅଧିକ ତଦନ୍ତ ଜାରି ରହିଥିବା ଅନୁଗୋଳ ଥାନା ଅଧିକାରୀ ବିଶୋଇ ସୂଚନା ଦେଇଛନ୍ତି।
