ପରଜଙ୍ଗ, ୨୭।୭(ଡି.ଏନ୍.ଏ.) – ବନ ବିଭାଗର କଟକଣା ଓ କଡ଼ା ନିୟମ ଆଗରେ ଆଣ୍ଠେଇ ପଡ଼ିଛି ବିକାଶ। ଜଟିଳ ଆଇନଗତ ପ୍ରକ୍ରିୟା ପାଇଁ ଦୀର୍ଘ ୬୯ବର୍ଷ ହେଲା ଗଁାକୁ ନିର୍ମାଣ ହୋଇପାରୁନି ସାମାନ୍ୟ ସଡ଼କଟିଏ। ଏଥିପାଇଁ ପ୍ରତିବାଦ କି ଆନ୍ଦୋଳନ ହୋଇନି ତାହା ନୁହେଁ। ଲୋକେ ରାସ୍ତାକୁ ଓହ୍ଲାଇଛନ୍ତି। ସମସ୍ୟା ସମ୍ପର୍କରେ ପ୍ରଶାସନଠାରୁ ଆରମ୍ଭ କରି ଜନପ୍ରତିନିଧିଙ୍କୁ ଗୁହାରି ମଧ୍ୟ କରିଛନ୍ତି। ହେଲେ ସବୁଥର କେବଳ ପ୍ରତିଶ୍ରୁତିରେ ସେମାନଙ୍କୁ ସନ୍ତୁଷ୍ଟ ହେବାକୁ ପଡ଼ିଛି। ଧୈର୍ଯ୍ୟର ସବୁ ସୀମା ଟପିଯିବା ପରେ ଦୀର୍ଘ ୭ ଦଶନ୍ଧି ହେଲା ସାଧାରଣ ଏକ ରାସ୍ତା ପାଇଁ ସଂଘର୍ଷ ଚଳାଇଥିବା ବାଘମୁଣ୍ଡା ଗ୍ରାମବାସୀ ଶେଷରେ ବନ ବିଭାଗ ଉପରେ ଝାଡ଼ିଛନ୍ତି ରୋଷ। ମଙ୍ଗଳବାର ଶତାଧିକ ମହିଳାପୁରୁଷ ଏକାଠି ହୋଇ ବନ କର୍ମଚାରୀଙ୍କୁ ଅଟକ ରଖିବା ସହ ଦାବି ଦୋହରାଇଛନ୍ତି ସେମାନେ।
ହାତଗଣତି ଆଦିବାସୀ ପରିବାରକୁ ନେଇ ୧୯୫୭ରେ ଗଠିତ ହୋଇଥିଲା ଢେଙ୍କାନାଳ ଜିଲା ପରଜଙ୍ଗ ବ୍ଲକ କୁଟୁରିଆ ପଞ୍ଚାୟତର ବାଘମୁଣ୍ଡା ଗଁା। ଏବେ ପରିବାର ସଂଖ୍ୟା ବଢ଼ି ୧୦୦ରେ ପହଞ୍ଚତ୍ଛି। ଗ୍ରାମ ପ୍ରତିଷ୍ଠା ହେବାର ୬୯ ବର୍ଷ ଅତିକ୍ରାନ୍ତ ହୋଇଯାଇଥିବାବେଳେ ଗ୍ରାମକୁ ଭଲ ରାସ୍ତାଟିଏ ନାହିଁ। ଆଜି ବି ପାଦଚଲା ରାସ୍ତାରେ ଲୋକେ ଯାତାୟାତ କରୁଥିବାବେଳେ ଜରୁରୀ ସମୟରେ ପହଞ୍ଚତ୍ ପାରୁନାହିଁ ଆମ୍ବୁଲାନ୍ସ କି ଅଗ୍ନିଶମ ଗାଡ଼ି। ଖରା, ଶୀତଦିନେ ଯେନତେନ ପ୍ରକାରେ ଚଳି ଯାଉଥିବାବେଳେ ବର୍ଷା ହେଲେ ସୃଷ୍ଟି ହେଉଛି ସଙ୍ଗିନ ସ୍ଥିତି। ଲୋକମାନେ ବିଚ୍ଛିନ୍ନାଞ୍ଚଳର କଷ୍ଟ ଭୋଗୁଛନ୍ତି। ପିଲାମାନଙ୍କ ପାଠପଢ଼ା ବ୍ୟାହତ ହେଉଛି। ମରଣଯନ୍ତା ପାଲଟିଥିବା ରାସ୍ତାରେ ପଡ଼ି ଅନେକେ ଖଣ୍ଡିଆ ଖାବରା ହେଉଛନ୍ତି। ଉକ୍ତ ରାସ୍ତା ବନ ବିଭାଗ ଅଧୀନରେ ଆସୁଥିବାରୁ ଜିଲା ପ୍ରଶାସନ ହସ୍ତକ୍ଷେପ କରିପାରୁନାହିଁ। ଅନ୍ୟପଟେ ଅନୁଦାନ ଅଭାବ କହି ବନ ବିଭାଗ ଦିନ ଗଡ଼ାଇ ଚାଲିଥିବାରୁ ସମସ୍ୟା ସୀମା ଟପିଲାଣି। ଏହାର ପ୍ରତିବାଦରେ ମଙ୍ଗଳବାର ବାଘମୁଣ୍ଡା ଗ୍ରାମବାସୀ ମୁକ୍ତାପଶି ବନ ବିଭାଗର ପାଟ୍ରୋଲିଂ ଗାଡ଼ିକୁ ଅଟକ ରଖିଥିଲେ। ଏଥିସହ ବାଘମୁଣ୍ଡା-ଶୁଣ୍ଢିକାଟେଣୀ ରାସ୍ତା ଅବରୋଧ କରିଥିଲେ ଶତାଧିକ ମହିଳାପୁରୁଷ। ଗ୍ରାମକୁ ସବୁଦିନିଆ ପକ୍କା ସଡ଼କ ନ ହେଲେ ପରିସ୍ଥିତି ଭୟାବହ ହେବ। ଏଥିପାଇଁ ବନ ବିଭାଗ, ଜିଲା ପ୍ରଶାସନ ଏବଂ ଜନପ୍ରତିନିଧି ଦାୟୀ ରହିବେ ବୋଲି ସେମାନେ ଚେତାବନୀ ଦେଇଛନ୍ତି।
ସୂଚନା ପାଇ ମୁକ୍ତାପଶି ଫରେଷ୍ଟର ପ୍ରଦୀପ କୁମାର ଭଞ୍ଜ ପହଞ୍ଚତ୍ ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲେ। ବର୍ତ୍ତମାନ ସମୟରେ ରାସ୍ତାରେ ଯେପରି ଯାତାୟାତ କରିହେବ ତାହାକୁ ନଜରରେ ରଖି ମୋରମ ବିଛାଯିବ। ବର୍ଷାଦିନ ପରେ ସ୍ଥାୟୀ ରାସ୍ତା ନିର୍ମାଣ ଲାଗି ପଦକ୍ଷେପ ନିଆଯିବ। ଲୋକଙ୍କ ସମସ୍ୟାକୁ ବନ ବିଭାଗ ଗୁରୁତ୍ୱର ସହ ନେଇଛି। ଏ ସଂକ୍ରାନ୍ତର ଉଚ୍ଚ କର୍ତ୍ତୃପକ୍ଷଙ୍କ ସହ ଆଲୋଚନା କରାଯାଇଛି ବୋଲି ଫରେଷ୍ଟର କହିଥିଲେ। ପ୍ରତିଶ୍ରୁତି ପାଇବା ପରେ ଗ୍ରାମବାସୀ ବନ ବିଭାଗ ଗାଡ଼ିକୁ ଛାଡ଼ିଥିଲେ।
