କେନ୍ଦ୍ରାପଡା ଅଫିସ, ୧୨ା୮ : ଆଉ ମାତ୍ର ୪ ଦିନ ପରେ ରାଖୀ ପୂର୍ଣ୍ଣିମା। ଭାଇ ହାତରେ ଭଉଣୀ ବାନ୍ଧିବ ରାଖୀ। ଏହାକୁ ଦୃଷ୍ଟିରେ ରଖି ପରିବେଶ ଅନୁକୂଳ କାଇଁଚରେ ନିର୍ମିତ ରାଖୀ ବଜାରକୁ ଆସିଛି। ଓରମାସର କେନ୍ଦ୍ରାପଡା ଜିଲା ଶାଖା ପକ୍ଷରୁ ନିର୍ମାଣ ହୋଇଥିବା ଏହି ରାଖୀ ମାତ୍ର ୧୫ରୁ ୨୦ ଟଙ୍କା ମଧ୍ୟରେ ମିଳୁଛି। ଏହି ରାଖୀ ଆମାଜନ ଓ ଫ୍ଲିପକାର୍ଟ ପରି ଅନଲାଇନ ବ୍ୟବସାୟରେ ବହୁ ଅର୍ଡର ଆସିଥିବା ଶିବ ପାର୍ବତୀ ସ୍ବୟଂ ସହାୟକ ଗୋଷ୍ଠୀର ସଦସ୍ୟା ରଶ୍ମିତା ବେହେରା କହିଛନ୍ତି। ତାଙ୍କ କହିବାନୁସାରେ ଜିଲା ଓରମାସ ପକ୍ଷରୁ ଜିଲାର ୧୩୦ ଜଣ ସଦସ୍ୟ ଏହି କାଇଁଚ ହସ୍ତଶିଳ୍ପ ପାଇଁ ତାଲିମ ନେଇଥିଲେ। ବିଭିନ୍ନ ପଲ୍ଲିଶ୍ରୀ ମେଳାରେ କାଇଁଚ ହସ୍ତଶିଳ୍ପର ଚାହିଦା ବୃଦ୍ଧି ପରେ ଏହି ସାମଗ୍ରୀକୁ ଗତ ୨୦୧୮ରେ ଅନଲାଇନ ବିକ୍ରି ଆରମ୍ଭ କରାଯାଇଥିଲା। ଚଳିତ ବର୍ଷ ସଦସ୍ୟାମାନେ ବିଭିନ୍ନ ପ୍ରକାର ରାଖୀ ନିର୍ମାଣ କରି ଅନଲାଇନରେ ପୋଷ୍ଟ କରିଥିଲେ। ଏବେ ପ୍ରାୟ ୨୦୦୦ରୁ ଅଧିକ ଅର୍ଡର ମିଳିଛି। ରାଖୀ ପୂର୍ଣ୍ଣିମା ବେଳକୁ ଏହି ସଂଖ୍ୟା ୫୦୦୦ରୁ ଅଧିକ ହେବ ବୋଲି ଆଶା କରାଯାଉଛି। ଏସମ୍ପର୍କରେ ଜଜାଙ୍ଗ ଗ୍ରାମର ପ୍ରଭାତୀ ତ୍ରୀପାଠି କୁହନ୍ତି, ବର୍ଷାଦିନେ ଏହି କାଇଁଚ ସଂଗ୍ରହ କରି ରଖାଯାଏ। ବର୍ଷକ ମଧ୍ୟରେ କାଇଁଚ ବ୍ୟବହାର ନ କଲେ ନଷ୍ଟ ହୋଇଯାଏ। ଜିଲାରେ ବହୁଳ ଭାବେ କାଇଁଚ ମିଳୁଥିବାରୁ ଉତ୍ପାଦିତ ସାମଗ୍ରୀ ଖୁବ କମ ଦାମରେ ଲୋକଙ୍କ ନିକଟରେ ପହଞ୍ଚାଇବାକୁ ପ୍ରୟାସ କରାଯାଉଛି। ଏସମ୍ପର୍କରେ ଜିଲାପାଳ ସମର୍ଥ ବର୍ମା କୁହନ୍ତି, କାଇଁଚ ପ୍ରକୃତିର ବରଦାନ। ଏହାକୁ ସ୍ଥାନୀୟ ମହିଳା ଗୋଷ୍ଠୀ ରୋଜଗାରର ମାଧ୍ୟମ କରିଛନ୍ତି। ଅନଲାଇନରେ ବିକ୍ରି ଫଳରେ ଦେଶ ବିଦେଶରେ ଆଗାମୀ ଦିନରେ ଏହାର ବହୁଳ ପ୍ରସାର ପାଇଁ ପ୍ରଶାସନ ପକ୍ଷରୁ ପ୍ରୋତ୍ସାହିତ କରାଯିବ।
