କେନ୍ଦୁଝର,୨୨ା୧୨(ସ୍ବ.ପ୍ର.): କେନ୍ଦୁଝର ଝୁମ୍ପୁରା ବ୍ଲକ ଅନ୍ତର୍ଗତ ନିଶ୍ଚିନ୍ତପୁର ପଞ୍ଚାୟତର ଅମାଣିଗୋଡ଼ା ମୁଣ୍ଡାସାହିରେ ୧୦ରୁ ଊର୍ଦ୍ଧ୍ୱ ହାତୀ ପ୍ରବେଶ କରି ବ୍ୟାପକ ଘରବାଡି ଭଙ୍ଗାରୁଜା କରିବା ସହ ଧାନଚାଉଳ ନଷ୍ଟ କରିଦେଇଛି। ଉକ୍ତ ସାହିର ପ୍ରାୟ ୬ଟି ପରିବାରର ଘର ସବୁକୁ ହାତୀପଲ ନଷ୍ଟ କରିଦେଇଥିବା ବେଳେ ଘରେ ଥିବା ଧାନଚାଉଳ ନଷ୍ଟ କରିଦେଇଛନ୍ତି। ହାତୀପଲ ଗରିବ ଆଦିବାସୀଙ୍କ ଆସବାବପତ୍ର ନଷ୍ଟ କରିଦେଇଥିବା ବେଳେ ପରିବାର ଲୋକ ବେଘର ହୋଇ ପଡ଼ିଛନ୍ତି। ପ୍ରବଳ ଶୀତ ଯୋଗୁ ସେମାନେ କିଭଳି ରାତି କାଟିବେ ଏବଂ କ’ଣ ଖାଇବେ ସେ ନେଇ ଚିନ୍ତାରେ ରହିଛନ୍ତି। ଖବର ପାଇ ତନ୍ତ୍ର ଉନ୍ନୟନ ପରିଷଦର ଅଧ୍ୟକ୍ଷା ଲକ୍ଷ୍ମୀ ନାୟକ ଉକ୍ତ ଗ୍ରାମକୁ ପରିଦର୍ଶନ କରି କ୍ଷୟକ୍ଷତି ଦେଖିଥିଲେ। ହାତୀ ଉପଦ୍ରବ ଯୋଗୁ ଲୋକମାନେ ସର୍ବସ୍ବ ହରାଇଛନ୍ତି। ଏଣୁ ଏନେଇ ତୁରନ୍ତ ସେମାନଙ୍କୁ ସହାୟତା ଦେବା ସହ ଥଇଥାନ କରିବାକୁ ଜିଲାପାଳ ଓ ଡିଏଫ୍ଓଙ୍କୁ ଜଣାଇବେ ବୋଲି ଲକ୍ଷ୍ମୀ ନାୟକ କହିଛନ୍ତି। ହାତୀମାନେ ସମସ୍ତଙ୍କ ଘର ଭାଙ୍ଗିଦେଇ ଧାନଚାଉଳ ଖାଇବା ସହ ଗଣେଶ ମୁଣ୍ଡାଙ୍କ ୧୫ ବସ୍ତା ଧାନ ଓ ୨ ବସ୍ତା ଚାଉଳ, ରଞ୍ଜିତ ସର୍ଦ୍ଦାରଙ୍କ ୧୦ ବସ୍ତା ଚାଉଳ ଓ ୨ ବସ୍ତା ଧାନ ଖାଇଦେଇଥିବା ବେଳେ ଜୟସିଂ ଦିଗି, ମାନିଆ ମୁଣ୍ଡା, ଦାରାସିଂ ଦିଗି, ମଣ୍ଟୁ ମୁଣ୍ଡା ଆଦିଙ୍କ ଘର ଭାଙ୍ଗିବା ସହ ଧାନ ଚାଉଳ ଖାଇଦେଇଛନ୍ତି। ବହୁ କଷ୍ଟରେ ଧାନ ଚାଷ କରି ଯାହା କିଛି ସଞ୍ଚୟ କରିଥିଲେ ସେସବୁ ହାତୀମାନେ ଖାଇଦେଲେ। ଏବେ ବର୍ଷ ତମାମ କ’ଣ ଖାଇବୁ ଓ କିପରି ଚଳିବୁ ବୋଲି କ୍ଷତିଗ୍ରସ୍ତ ଆଦିବାସୀମାନେ କହିଛନ୍ତି। ଏଣୁ ତୁରନ୍ତ ସେମାନଙ୍କୁ କ୍ଷତିପୂରଣ ଦେବା ସହ ସୁରକ୍ଷା କରିବାକୁ ନିବେଦନ କରିଛନ୍ତି। ଏନେଇ ଡିଏଫ୍ଓ ଏଚ୍ ଡି ଧନରାଜ କହିଛନ୍ତି, ନିଶ୍ଚିତ ଭାବରେ କ୍ଷୟକ୍ଷତି ଆକଳନ କରି ସେମାନଙ୍କୁ କ୍ଷତିପୂରଣ ଦିଆଯିବ।
