ପଣଜି,୨୯ ।୧: ଗୋଆ ବିଧାନସଭା ନିର୍ବାଚନ ଲାଗି ଶୁକ୍ରବାର ପ୍ରାର୍ଥିପତ୍ର ଦାଖଲର ଶେଷ ଦିନ ଥିଲା । ୪୦ ବିଧାନସଭା ଆସନ ଲାଗି ଶୁକ୍ରବାର ଅପରାହ୍ନ ସୁଦ୍ଧା ମୋଟ ୫୮୭ ପ୍ରାର୍ଥିପତ୍ର ଦାଖଲ ହୋଇଛି ବୋଲି କହିଛନ୍ତି ଚିଫ୍ ଇଲକ୍ଟୋରାଲ ଅଫିସର । ଜାନୁୟାରୀ ୨୧ରୁ ପ୍ରାର୍ଥିପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇ ଜାନୁୟାରୀ ୨୮ରେ ଏହା ଶେଷ ହୋଇଛି । ଫେବୃୟାରୀ ୧୪ରେ ସେଠାରେ ଭୋଟ ଗ୍ରହଣ କରାଯିବ ।
ପ୍ରଥମ ଦିନ ଅର୍ଥାତ୍ ଜାନୁୟାରୀ ୨୧ରେ ମାତ୍ର ୩ଜଣ ପ୍ରାର୍ଥିପତ୍ର ଦାଖଲ କରିଥିବା ବେଳେ ଜାନୁୟାରୀ ୨୪ରେ ୧୮ ଜଣ, ଜାନୁୟାରୀ ୨୫ରେ ୫୦ଜଣ, ଜାନୁୟାରୀ ୨୭ରେ ୨୬୨ ଜଣ ଓ ଶେଷଦିନ ଅର୍ଥାତ୍ ଜାନୁୟାରୀ ୨୮ରେ ୨୫୪ଜଣ ପ୍ରାର୍ଥିପତ୍ର ଦାଖଲ କରିଛନ୍ତି । ଜାନୁୟାରୀ ୩୧ରେ ପ୍ରାର୍ଥିପତ୍ର ପ୍ରତ୍ୟାହାର କରାଯିବାକୁ ଥିବା ବେଳେ ଏଠାରେ ଫେବୃୟାରୀ ୧୪ରେ ନିର୍ବାଚନ ହେବ ଓ ମାର୍ଚ୍ଚ ୧୦ରେ ଫଳାଫଳ ପ୍ରକାଶ କରାଯିବ ।
