ପାଟନା,୯।୧୧: ବିହାରର ଗୋପାଳଗଞ୍ଜ, ବେତିୟା ଏବଂ ସମସ୍ତିପୁରରେ ବିଷାକ୍ତ ମଦ ପିଇବା ପରେ ୪୦ ଜଣଙ୍କ ମୃତ୍ୟୁ ଘଟିଛି। ଏହା ପରେ ଏବେ ପୋଲିସ କ୍ରମାଗତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ଲାଗିଛି। ନଭେମ୍ବର ୧୬ ରେ ମୁଖ୍ୟମନ୍ତ୍ରୀ ନୀତୀଶ କୁମାର ମଦ ନିଷେଧାଦେଶର ଉପରେ ଏକ ସମୀକ୍ଷା ବୈଠକ ଡକାଇଛନ୍ତି। ବୈଠକରେ ଅଧିକାରୀଙ୍କ ସହ ଆଲୋଚନା କରାଯିବା ସହିତ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।
ସେ ପ୍ରତ୍ୟେକ ଜିଲାର ମଦ ନିଷେଧାଦେଶର ସମୀକ୍ଷା କରିବେ। ମୁଖ୍ୟମନ୍ତ୍ରୀଙ୍କ ସମୀକ୍ଷା ବୈଠକ ପୂର୍ବରୁ ବିହାର ପୋଲିସ ମଦ ବ୍ୟବସାୟୀଙ୍କୁ ଖୋଜାଖୋଜି ଗିରଫ କରୁଛି। ବେଆଇନ ମଦ ଚୁଲିଗୁଡିକ ଭାଙ୍ଗି ଦିଆଯାଉଛି। ପ୍ରତ୍ୟେକ ଜିଲାର ମଦ ନିଷେଧାଦେଶର ସମୀକ୍ଷା କରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ପୋଲିସ ଟିମ ପକ୍ଷରୁ ଇତି ମଧ୍ୟରେ ୭୪୯ ଚଢ଼ାଉ କରାଯାଇ ୫୬୮ ଜଣଙ୍କୁ ଗିରଫ କରାଯାଇଛି। ଚଢ଼ାଉ ସମୟରେ ୧୫,୨୪୬ଲିଟର ବିଦେଶୀ ମଦ, ୩,୪୩୫ ଲିଟର ଦେଶୀ ମଦ, ୪୯୭ ଲିଟର ମହୁଆ ମଦ ଏବଂ ୫୦୦ ଲିଟର ସ୍ପିରିଟ୍ ଜବତ କରାଯାଇଛି। ଏନେଇ ପୋଲିସ ପକ୍ଷରୁ ୩୪୭ ମାମଲା ରୁଜୁ କରାଯାଇଛି। ମଦ କାରବାରରେ ନିୟୋଜିତ ୭୧ ଟି ଗାଡି ଜବତ ହୋଇଛି।
ଏହି ସମୟରେ ଆଠ ଲକ୍ଷରୁ ଅଧିକ ନଗଦ ଟଙ୍କା ମଧ୍ୟ ଜବତ କରାଯାଇଛି। ପୋଲିସର କାର୍ଯ୍ୟରେ ମୁଜାଫରପୁର ଜିଲ୍ଲାରୁ ସର୍ବାଧିକ ୧୬ ହଜାର ଲିଟର ମଦ ଜବତ ହୋଇଛି। ଗୋପାଳଗଞ୍ଜ ଜିଲାରେ ସର୍ବାଧିକ ଚଢ଼ାଉ କରାଯାଇଛି। ୩୭୬ ଚଢ଼ାଉରେ ୧୬୪ ଜଣଙ୍କୁ ଗିରଫ କରାଯାଇଛି। ସେହିପରି ୧୭୦୦ ଲିଟରରୁ ଅଧିକ ମଦ ଜବତ କରାଯାଇଛି।
ବେତିଆରେ ୧୭୭ ଚଢ଼ାଉରେ ପ୍ରାୟ ୮୫୦ ଲିଟର ଏବଂ ସମସ୍ତିପୁରରେ ୩୨ ଚଢ଼ାଉରେ ୪୧୦ ଲିଟର ଦେଶୀ ମଦ ଏବଂ ୪୬୫ ଲିଟର ସ୍ପିରିଟ୍ ଜବତ କରାଯାଇଛି।
