ବୋରିଗୁମ୍ମା,୨୮ା୮(ଗୋପାଳ ହରିଜନ): କୋରାପୁଟ ଜିଲା ବୋରିଗୁମ୍ମା ବ୍ଲକ୍ ଗୁମୁଡ଼ା ଏସ୍ଏସ୍ଡି ସରକାରୀ ଉଚ୍ଚ ବିଦ୍ୟାଳୟ ପଛ ପଟେ ଥିବା ନାଳରୁ ଗତ ବୁଧବାର ଜଣେ ୮ମ ଶ୍ରେଣୀ ଛାତ୍ର ଗୁରୁନାଥ ମୁଦୁଲିଙ୍କ ମୃତଦେହ ଜବତ ପରେ ଛାତ୍ରୀଛାତ୍ରଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଛି।
ଘଟଣା ପରେ ହଷ୍ଟେଲରେ ରହୁଥିବା ୨୪୮ ଛାତ୍ରଙ୍କ ମଧ୍ୟରୁ ୫୪ ଜଣଙ୍କୁ ପରିବାର ଲୋକେ ଘରକୁ ନେଇଯାଇଛନ୍ତି। ପରିସ୍ଥିତି ସ୍ବାଭାବିକ ହେବା ପରେ ପିଲାମାନଙ୍କୁ ପୁଣି ବିଦ୍ୟାଳୟକୁ ଛାଡ଼ିବେ ବୋଲି ଅଭିଭାବକମାନେ କହିଛନ୍ତି। ଏହାକୁ ନେଇ ବିଦ୍ୟାଳୟ ପରିସରରେ ଭୟର ବାତାବରଣ ଲାଗି ରହିଛି। ଘଟଣାର ପ୍ରାଥମିକ ତଦନ୍ତ ପରେ ଛାତ୍ରୀଛାତ୍ରଙ୍କ ପ୍ରତି ଅଣଦେଖା ଅଭିଯୋଗରେ ବିଦ୍ୟାଳୟର ଭାରପ୍ରାପ୍ତ ଶିକ୍ଷକ ମନୋଜ କୁମାର ଖଣ୍ଡାୟତ ରାୟଙ୍କୁ ସସ୍ପେଣ୍ଡ କରାଯାଇଛି। ସସ୍ପେନ୍ସନ ଲେଟର ନମ୍ବର ୩୮୭୮/୨୭-୨୦୨୬ ଅନୁଯାୟୀ ତାଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯାଇଛି। ଜିଲା ମଙ୍ଗଳ ଅଧିକାରୀ ସୁନୀଲ କୁମାର ତାଣ୍ଡିଙ୍କ ସୂଚନାନୁଯାୟୀ, ପ୍ରାଥମିକ ତଦନ୍ତରେ ଅଣଦେଖା ଅଭିଯୋଗ ଆସିବା ପରେ ଭାରପ୍ରାପ୍ତ ଶିକ୍ଷକଙ୍କୁ ସସ୍ପେଣ୍ଡ କରାଯାଇଛି। ଏହାସହ ପ୍ରଧାନଶିକ୍ଷକଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ପାଇଁ ଜିଲା ପ୍ରଶାସନକୁ ସୁପାରିସ କରାଯାଇଥିବା ସେ କହିଛନ୍ତି।
ଅନ୍ୟପକ୍ଷରେ ଘଟଣାର ତଦନ୍ତ ପାଇଁ ଜିଲା ଶିଶୁ ମଙ୍ଗଳ ସମିତିର ୩ ଜଣିଆ ଟିମ୍ ବିଦ୍ୟାଳୟରେ ପହଞ୍ଚି ଯାଞ୍ଚ କରିଛନ୍ତି। ଅଧ୍ୟକ୍ଷା ଡ. ଗାୟତ୍ରୀ ଦେବୀଙ୍କ ନେତୃତ୍ୱରେ ଟିମ୍ ବିଦ୍ୟାଳୟର ବିଭିନ୍ନ ଦିଗ ଯାଞ୍ଚକରିବା ସହ ଛାତ୍ରୀଛାତ୍ରଙ୍କ ସହିତ ଆଲୋଚନା କରିଛନ୍ତି। ଛାତ୍ରଙ୍କ ମୃତ୍ୟୁ କେଉଁ ପରିସ୍ଥିତିରେ ଘଟିଲା ଏବଂ ଏଥିରେ କାହାର ଅବହେଳା ରହିଛି, ତାହା ନେଇ ତଦନ୍ତ କରାଯାଉଛି। ତଦନ୍ତ ରିପୋର୍ଟ ଜିଲା ପ୍ରଶାସନକୁ ପ୍ରଦାନ କରାଯିବ। ଛାତ୍ର ମୃତ୍ୟୁ ଖବର ପରେ ଦୂରଦୂରାନ୍ତ ଅଞ୍ଚଳରୁ ଅଭିଭାବକମାନେ ବିଦ୍ୟାଳୟରେ ପହଞ୍ଚି ପିଲାଙ୍କ ସୁରକ୍ଷା ସମ୍ପର୍କରେ ଖବର ନେଇଥିଲେ। ଭୟ ଓ ଆଶଙ୍କା ମଧ୍ୟରେ ୫୪ ଜଣ ଛାତ୍ରଙ୍କୁ ପରିବାର ଲୋକେ ଘରକୁ ନେଇଯିବା ଘଟଣା ବିଦ୍ୟାଳୟର ସୁରକ୍ଷା ବ୍ୟବସ୍ଥା ନେଇ ଗୁରୁତର ପ୍ରଶ୍ନ ଉଠିଛି।
