ଜାତିସଂଘ,୧୮ା୬(ପି.ଟି.): ଗତବର୍ଷ ଜଳବାୟୁ ପରିବର୍ତ୍ତନ ଓ ବିପର୍ଯ୍ୟୟ କାରଣରୁ ଭାରତରେ ପାଖାପାଖି ୫୦ ଲକ୍ଷ ଲୋକ ବିସ୍ଥାପିତ ହୋଇଥିବା ଜାତିସଂଘ ରିପୋର୍ଟରେ କୁହାଯାଇଛି। ଜାତିସଂଘ ଶରଣାର୍ଥୀ ସଂସ୍ଥା (ୟୁଏନ୍ଏଚ୍ସିଆର୍) ଦ୍ୱାରା ପ୍ରକାଶିତ ଗ୍ଲୋବାଲ ଟ୍ରେଣ୍ଡ୍ସ ରିପୋର୍ଟ ଅନୁୟାୟୀ ଗତବର୍ଷ ହିଂସା, ମାନବାଧିକାର ଉଲ୍ଲଂଘନ, ଖାଦ୍ୟାଭାବ, ଜଳବାୟୁ ସଙ୍କଟ, ୟୁକ୍ରେନ୍ ଯୁଦ୍ଧ ଏବଂ ଆଫ୍ରିକାରୁ ଆଫଗାନିସ୍ତାନ ଜରୁରୀ ସ୍ଥିତି ଯୋଗୁ ସାରା ବିଶ୍ୱରେ ୧୦ କୋଟି ଲୋକ ସେମାନଙ୍କ ଘର ଛାଡ଼ିବାକୁ ବାଧ୍ୟ ହୋଇଛନ୍ତି। ଏହା ବାଦ୍ ବିପର୍ଯ୍ୟୟ କାରଣରୁ ୨.୩୭ କୋଟି ଲୋକ ଦେଶ ଭିତରେ ସ୍ଥାନାନ୍ତର ହୋଇଥିବା ଇଣ୍ଟରନାଲ ଡିସ୍ପ୍ଲେସମେଣ୍ଟ ମନିଟରିଂ ସେଣ୍ଟର (ଆଇଡିଏମ୍ସି) ରିପୋର୍ଟରେ ଦର୍ଶାଯାଇଛି। ପୂର୍ବ ବର୍ଷ ତୁଳନାରେ ଏହା ୭ ନିୟୁତ ବା ୨୩ ପ୍ରତିଶତ କମ୍ ବୋଲି କୁହାଯାଉଛି।
ଯୋଗୁ ଗତବର୍ଷ ଚାଇନାରେ ସର୍ବାଧିକ ୬ ନିୟୁତ ଲୋକ ସ୍ଥାନାନ୍ତର ହୋଇଥିବାବେଳେ ଏହା ପଛକୁ ଫିଲିପାଇନ୍ସ (୫.୭ ନିୟୁତ), ଭାରତ (୪.୯ ନିୟୁତ) ରହିଛି। ତେବେ ଅଧିକାଂଶ ସ୍ଥାନାନ୍ତର ଅସ୍ଥାୟୀ ବୋଲି ରିପୋର୍ଟରେ କୁହାଯାଇଛି। ଗତ କିଛିବର୍ଷ ହେଲା ପ୍ରତିବର୍ଷ ବାଧ୍ୟବାଧକତାରେ ଘର ଛାଡ଼ୁଥିବା ଲୋକଙ୍କ ସଂଖ୍ୟା ବଢ଼ିଚାଲିଛି। ୨୦୨୧ ଶେଷ ସୁଦ୍ଧା ୮.୯୩ କୋଟି ଲୋକ ଯୁଦ୍ଧ, ହିଂସା, ମାଲିମକଦ୍ଦମା, ମାନବାଧିକାର ଉଲ୍ଲଂଘନ ଆଦି କାରଣରୁ ସ୍ଥାନାନ୍ତର ହୋଇଛନ୍ତି, ଯାହା ପୂର୍ବ ବର୍ଷ ତୁଳନାରେ ୮ ପ୍ରତିଶତ ଅଧିକ। ୧୦ ବର୍ଷ ପୂର୍ବର ବିସ୍ଥାପିତ ସଂଖ୍ୟା ତୁଳନାରେ ଏହା ଦୁଇଗୁଣ ବୋଲି ରିପୋର୍ଟରେ ଦର୍ଶାଯାଇଛି। ଏହା ବ୍ୟତୀତ ଚଳିତ ବର୍ଷ ୟୁକ୍ରେନ୍ ଉପରେ ରୁଷିଆ ଆକ୍ରମଣ ଯୋଗୁ ଦ୍ୱିତୀୟ ବିଶ୍ୱଯୁଦ୍ଧ ପରେ ସର୍ବାଧିକ ବିସ୍ଥାପିତ ହୋଇଛନ୍ତି। ମୋଟ ବିସ୍ଥାପିତଙ୍କ ମଧ୍ୟରୁ ୨.୭୧ କୋଟି ଶରଣାର୍ଥୀ, ୨.୧୩ କୋଟି ୟୁଏନ୍ଏଚ୍ସିଆର୍ ରିଫ୍ୟୁଜି, ୫୮ ଲକ୍ଷ ପାଲେଷ୍ଟାଇନ ଶରଣାର୍ଥୀ ଅଛନ୍ତି। ୫.୩୨ କୋଟି ଦେଶ ଭିତରେ ବିସ୍ଥାପିତ ହୋଇଛନ୍ତି। ୪୬ ଲକ୍ଷ ଶରଣାର୍ଥୀ ହେବା ଲାଗି ଆବେଦନ କରିଛନ୍ତି। ଶରଣାର୍ଥୀ ପାଇଁ ଆମେରିକାକୁ ସର୍ବାଧିକ ୧,୮୮,୯୦୦ ଆବେଦନ କରାଯାଇଥିବାବେଳେ ଜର୍ମାନୀକୁ ୧,୪୮,୨୦୦, ମେକ୍ସିକୋକୁ ୧,୩୨,୭୦୦, କୋଷ୍ଟାରିକାକୁ ୧,୦୮,୫୦୦ ଓ ଫ୍ରାନ୍ସକୁ ୯୦,୨୦୦ ଆବେଦନ ହୋଇଛି।
