ଖୋର୍ଦ୍ଧା ଅଫିସ,୨୧ା୩: କରୋନା ମହାମାରୀ ଯୋଗୁ ଏକ ବର୍ଷ ହେବ ଖୋର୍ଦ୍ଧା ଜିଲା ବେଗୁନିଆ ଏବଂ ବୋଲଗଡ଼ ବ୍ଲକର ୫୦୦ରୁ ଊର୍ଦ୍ଧ୍ୱ ବୁଣାକାରଙ୍କ ପରିବାର ହାତ ବାନ୍ଧି ବସିଛନ୍ତି। କଞ୍ଚାମାଲ ଅଭାବ, ପ୍ରସ୍ତୁତ ସାମଗ୍ରୀ ବିକ୍ରି ନ ଥିବାରୁ ବୁଣାକାରଙ୍କ ସମସ୍ୟାକୁ ଏହା ଦ୍ୱିଗଣିତ କରିଛି। ବୁଣାକାରଙ୍କ ଜୀବନ ଜୀବିକା ଦୁର୍ବିଷହ ହୋଇପଡିଛି। ସରକାର ସମସ୍ତଙ୍କ ଲାଗି ଆର୍ଥିକ ସହାୟତା ଘୋଷଣା କରିଥିବା ବେଳେ ବୁଣାକାରଙ୍କ ଲାଗି କୌଣସି ଘୋଷଣା କରି ନ ଥିବା ଏକାଧିକ ବୁଣାକାର କହିଛନ୍ତି।
ବେଗୁନିଆ ବ୍ଲକର ରାଉତପଡ଼ାରେ ୨୫୦ରୁ ଊର୍ଦ୍ଧ୍ୱ ବୁଣାକାର ପରିବାର ରହିଛନ୍ତି। ବର୍ଷସାରା ଏମାନେ ତନ୍ତ ସାହାର୍ଯ୍ୟରେ ସୂତା ଲୁଗା, ପାଟବସ୍ତ୍ର, ଗାମୁଛା, ଶାଢ଼ି ପ୍ରସ୍ତୁତ କରି ପରିବାର ଚଳାଇଥାନ୍ତି। ତେବେ କରୋନା ଯୋଗୁ ଏମାନଙ୍କ କାମ ଠପ୍ ହୋଇଯାଇଛି। ଏହି ଗ୍ରାମର ବରିଷ୍ଠ ବୁଣାକାର ଗୋପୀନାଥ ଦାସ କୁହନ୍ତି, କରୋନା ସମୟରେ ଲକ୍ଡାଉନ, ଶଟ୍ଡାଉନ ଯୋଗୁ ବେପାର ଠପ ହୋଇଗଲା। କଞ୍ଚାମାଲ ଆସିପାରିଲା ନାହିଁ। ଫଳରେ ବହୁ ବୁଣାକାର କାମଧନ୍ଦା ହରାଇଲେ। ପୂର୍ବରୁ ଯାହା ବୁଣା ଲୁଗା ଥିଲା, ତାହାର ବିକ୍ରି ହୋଇପାରିଲା ନାହିଁ। ଏବେ କଞ୍ଚାମାଲ ଦର ଉଚ୍ଚା ରହିଛି। ସରକାରୀ ସହାୟତା ନ ମିଳିଲେ, ବୁଣା କାରିଗରି ବନ୍ଦ ହୋଇଯିବ। ସେହିପରି ସାନପଦର, ସିମର, ଡାଳତୋଳା, ବାରବାଟି ଅଠରାଙ୍ଗ, ବୋଲଗଡ ବ୍ଲକ ଧଳାପଥର ଆଦି ଗ୍ରାମର ୨୫୦ରୁ ଊର୍ଦ୍ଧ୍ୱ ବୁଣାକାର ପରିବାର ଜୀବନ ଦୁର୍ବିଷହ ହୋଇପଡିଛି। ବୁଣାକାର ନିମାଇ ଚରଣ କୁଣ୍ଡୁ କୁହନ୍ତି, ଫନୀ ପରେ କରୋନା ବୁଣାକାର ପରିବାରଙ୍କ ଦୁଃଖକୁ ଦ୍ୱିଗଣିତ କରିଛି। ପ୍ରସ୍ତୁତ ଲୁଗା ବିକ୍ରି ହୋଇପାରୁ ନ ଥିବା ବେଳେ ଆର୍ଥିକ ଅଭାବ ଯୋଗୁ କଞ୍ଚାମାଲ କିଣିପାରୁ ନାହିଁ। ପରିବାର ଚଳାଇବା କଷ୍ଟକର ହୋଇପଡ଼ିଛି। ଅନ୍ୟପଟେ ଗ୍ରାମରେ ଲବ୍ଧ ପ୍ରତିଷ୍ଠିତ ହସ୍ତ୍ର ତନ୍ତ ବୁଣାକାର ସମିତି ଥିଲେ ମଧ୍ୟ ବୁଣାକାରଙ୍କୁ ଉପଯୁକ୍ତ ମଜୁରି ଦେବାରେ ସକ୍ଷମ ନୁହଁ ବୋଲି କେତେଜଣ ବୁଣାକାର କହିଛନ୍ତି। କୌଳାସ ପାତ୍ର କୁହନ୍ତି, ପୂର୍ବରୁ ବିଭିନ୍ନ ଡିଜାଇନର ଶାଢ଼ି ଅର୍ଡର ମିଳିଥିଲା। କାମ ସରିବା ବେଳେ ଲକ୍ଡାଉନ, ଶଟ୍ଡାଉନ ହୋଇଗଲା। ଅର୍ଡର ଦେଇଥିବା ବେପାରି ଆସିପାରିଲେ ନାହିଁ। ଦୋକାନ ବଜାର ବନ୍ଦ ହୋଇଗଲା। ବିକ୍ରି ହେଲେ ଟଙ୍କା ମିଳିବ। ପୂର୍ବରୁ ବିକ୍ରିିରୁ ଯାହା ମିଳିଥିଲା, ତାହା ପରିବାର ଚଳିବା କଷ୍ଟକର। ବୁଣାକାର ରବୀନ୍ଦ୍ର ଦାସ କୁହନ୍ତି, ବୁଣାଲୁଗା ବିକ୍ରି ନ ହେଲେ, ପରିବାର କିପରି ଚଳିବ ସେ ନେଇ ଚିନ୍ତା ବଢିଛି। ବର୍ତ୍ତମାନ ହାତରେ କାମଧନ୍ଦା ନାହିଁ। କଞ୍ଚାମାଲ ଆସିପାରୁ ନ ଥିବାରୁ ପୂର୍ବରୁ ଅର୍ଡର ଥିବା ସାମଗ୍ରୀ ମଧ୍ୟ ପ୍ରସ୍ତୁତ ହୋଇପାରୁନାହିଁ। ବୁଣାକାର ରମେଶ ଦାସ କୁହନ୍ତି, କଞ୍ଚାମାଲ ପୂର୍ବାପେକ୍ଷା ଦର ବୃଦ୍ଧି ଘଟିଛି। ପୂର୍ବରୁ ପ୍ରସ୍ତୁତ କରିଥିବା ସାମ୍ରଗୀ ସମିତିରେ ପଡି ରହିଛି। ମଜୁରି ମିଳିନାହିଁ। ସରକାରୀ ସହାୟତା ନ ମିଳିଲେ, ଆଗକୁ ବଢିବା କଷ୍ଟକର ହୋଇପଡିବ ବୋଲି ସେ କହିଛନ୍ତି।
