ନୂଆଦିଲ୍ଲୀ,୧୩।୮: କୋଭିଡ୍-୧୯ ବଜାରରେ ଏକ ଅନିଶ୍ଚିତତାର ବାତାବରଣ ସୃଷ୍ଟି କରିଛି। ବିଶ୍ୱର ମୋଟ୍ ଯୁବବର୍ଗଙ୍କ ଜନସଂଖ୍ୟା ମଧ୍ୟରୁ ପ୍ରାୟ ୫୦% ବର୍ତ୍ତମାନ ନିରାଶ ଏବଂ ଚିନ୍ତାଗ୍ରସ୍ତ ହୋଇପଡିଛନ୍ତି। ଏମାନଙ୍କ ମଧ୍ୟରୁ ପ୍ରାୟ ୧୭% ନିକଟରେ ଚାକିରି ବର୍ତ୍ତମାନ ନାହିଁ। ଅପରପକ୍ଷରେ ପ୍ରାୟ ଏକ ତୃତୀୟାଂଶ ଯୁବବର୍ଗଙ୍କ ଭବିଷ୍ୟତ କ୍ୟାରିୟର କ’ଣ ରହିବ ସେ ନେଇ ଅନିଶ୍ଚିତତା ଘେରକୁ ଚାଲିଯାଇଥିବା ଅନ୍ତର୍ଜାତୀୟ ଶ୍ରମ ସଙ୍ଗଠନ(ଆଇଏଲ୍ଓ) ପକ୍ଷରୁ ଏକ ରିପୋର୍ଟରେ ପ୍ରକାଶ ପାଇଛି। ଆଇଏଲ୍ଓ ପକ୍ଷରୁ ଯୁବବର୍ଗଙ୍କ ଏବଂ କୋଭିଡ୍-୧୯ ପ୍ରଭାବ ଉପରେ ଏକ ଅଧ୍ୟୟନରେ ଏଭଳି ରିପୋର୍ଟ ସାମ୍ନାକୁ ଆସିଛି। ଏହି ଅଧ୍ୟୟନରେ ଯୁବବର୍ଗଙ୍କ ନିଯୁକ୍ତି, ଶିକ୍ଷା, ଅଧିକାର ଏବଂ ମାନସିକ ସ୍ବାସ୍ଥ୍ୟ ଭଳି ପ୍ରସଙ୍ଗକୁ ବିଚାର କରାଯାଇଛି। ରିପୋର୍ଟରେ କୁହାଯାଇଛି ଯେ, ସମସ୍ୟାର ସମାଧାନ ଦିଗରେ ଯଦି କୌଣସି ପଦକ୍ଷେପ ହାତକୁ ନ ନିଆଯାଏ ତେବେ ପରିଣାମ ଭୟାବହ ହେବ।
ଜୀବନର ପ୍ରତିଟି କ୍ଷେତ୍ରକୁ କୋଭିଡ୍-୧୯ ପ୍ରଭାବିତ କରିଛି। ଯୁବବର୍ଗଙ୍କ ଅର୍ଥନୈତିକ ଏବଂ ସାମାଜିକ ସମନ୍ବୟ କ୍ଷେତ୍ରରେ ଏହା ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ତ୍ୱରିତ ଭିତ୍ତିରେ ସମସ୍ୟାକୁ ସମାଧାନ କରିବାର ଆବଶ୍ୟକତାକୁ ବୁଝିବାକୁ ହେବ। ନ ହେଲେ ଏହା ଯୁବବର୍ଗଙ୍କୁ ଆହୁରି ସମସ୍ୟାରେ ପକାଇପାରେ ବୋଲି ରିପୋର୍ଟରେ ପ୍ରକାଶ ପାଇଛି। ୧୮ରୁ ୨୯ ବର୍ଷ ମଧ୍ୟରେ ପ୍ରାୟ ୧୧୨ ଦେଶର ୧୨ ହଜାର ଯୁବବର୍ଗଙ୍କୁ ସର୍ଭେରେ ସାମିଲ କରାଯାଇଥିଲା। ୧୮ରୁ ୨୪ ବର୍ଷ ବୟସ୍କଙ୍କ ମାନସିକ ସ୍ବାସ୍ଥ୍ୟ ସବୁଠାରୁ ନିମ୍ନ ସ୍ତରରେ ରହିଛି। ଯେଉଁମାନଙ୍କର ଶିକ୍ଷା କିମ୍ବା କାର୍ଯ୍ୟ ସ୍ଥିତି ବିଗିଡିଛି ସେମାନେ ଡିପ୍ରେସନକୁ ଚାଲିଯାଇଛନ୍ତି। ଶିକ୍ଷା ଗ୍ରହଣ କରୁଥିବା ଏବଂ ନିଯୁକ୍ତିରେ ଥିବା ଯୁବବର୍ଗଙ୍କର ମାନସିକ ସ୍ବାସ୍ଥ୍ୟ ଉନ୍ନତ ରହିଛି।
ଶିକ୍ଷାରେ ବିଳମ୍ବତା ଏବଂ ବନ୍ଦ ଯୋଗୁ ୨୨% ଡିପ୍ରେଶନର ଶିକାର ହୋଇଥିବା ବେଳେ ୧୨% ଛାତ୍ରୀଛାତ୍ରଙ୍କ ଶିକ୍ଷା ଟ୍ରାକ୍କୁ ଫେରିଛି। ପ୍ରାୟ ୩୮% ଭବିଷ୍ୟତକୁ ନେଇ ଅନିଶ୍ଚିତ ରହିଛନ୍ତି। ଶ୍ରମ ବଜାର ଉପରେ କୋଭିଡ୍ ଗଭୀର ପ୍ରଭାବ ପକାଇଥିବା ବେଳେ ସ୍କୁଲ, କଲେଜ ଶିକ୍ଷା ନେଇ ବର୍ତ୍ତମାନ ସୁଦ୍ଧା କିଛି ନିଶ୍ଚିତ ହୋଇପାରିନାହିଁ। ପ୍ରତି ୬ ଜଣରେ ଜଣେ ଯୁବକଯୁବତୀ କାମ ହରାଇଛନ୍ତି। ସର୍ପୋଟ, ସର୍ଭିସ ଏବଂ ସେଲ୍ସ ଭଳି କ୍ଷେତ୍ରରେ କାମ କରୁଥିବା ଯୁବକଯୁବତୀଙ୍କୁ ଚାକିରିରେ ବେଶି ସମସ୍ୟା ସାମ୍ନା କରିବାକୁ ପଡିଛି। ମହାମାରୀ ଯୁବବର୍ଗଙ୍କୁ ଏକ ଶକ୍ତ ଧକ୍କା ଦେଇଛି ବୋଲି ଆଇଏଲ୍ଓର ମହାନିର୍ଦ୍ଦେଶକ ଗାଏ ରାଇଡର କହିଛନ୍ତି। ଏଭଳି ଚ୍ୟାଲେଞ୍ଜିଂ ସମୟରେ ଯୁବବର୍ଗଙ୍କୁ ସେମାନଙ୍କ ଚିନ୍ତାଧାରା ଏବଂ ନିଷ୍ପତ୍ତି ଗ୍ରହଣ ଦିଗରେ ଉତ୍ସାହିତ କରିବା ଉପରେ ଗୁରୁତ୍ୱାରୋପ କରାଯାଇଛି।
