ରଘୁନାଥପୁର,୨୭।୭(ଡି.ଏନ.ଏ.): ଶାଖା କେନାଲରେ ପାଣି ନ ଆସିବାରୁ ୫୦ ହେକ୍ଟର ଚାଷ ଜମି ପଡ଼ିଆ ପଡିଛି। ଏହାଛଡ଼ା କଟକ-ପାରାଦୀପ ରେଳ ଲାଇନ ତଳେ ଯାଇଥିବା କେନାଲରେ ଉପରୁ ମେଟାଲ ଖସି ପୋତି ହୋଇପଡିଥିବାରୁ ପାଣି ମାଡିବା କ୍ଷେତ୍ରରେ ସମସ୍ୟା ସୃଷ୍ଟି ହୋଇଛି। ଏପରି ବ୍ୟତିକ୍ରମ ଦେଖିବାକୁ ମିଳିଛି ବାଲିଆ ଏସଡିଓ ତଥା ରଘୁନାଥପୁର ବ୍ଲକର ବାଲିକୁଦା ଯନ୍ତ୍ରୀଙ୍କ ଅଧୀନରେ ଥିବା ମାଛଗାଁ ୭ନଂ କେନାଲର ମୁଗଅଣ୍ଟାରୁ ବାହାରିଥିବା ସି୧ ଶାଖା କେନାଲରେ। ଉକ୍ତ କେନାଲଟି ଏହିସ୍ଥାନରୁ ବାହାରି ରେଳ ଲାଇନ ତଳ ଦେଇ ୧ କି ମି ପର୍ଯ୍ୟନ୍ତ ଯାଇଛି। ରେଳ ଟ୍ରାକରୁ ମେଟାଲ ଖସି କେନାଲ ଶଯ୍ୟା ପୋତି ହୋଇଯାଇଛି। ହେଲେ ଅଦ୍ୟାବଧି ଏହିସ୍ଥାନରେ ସଫେଇ କାର୍ଯ୍ୟ କରାଯାଇନି। ଫଳରେ ପାଣି ନିଷ୍କାସନ ବାଧାପ୍ରାପ୍ତ ହୋଇଛି। କେନାଲ ଉପରେ ନିର୍ଭର କରୁଥିବା ୫୦ ହେକ୍ଟର ଚାଷଜମିରେ ଧାନ ଚାଷ ହୋଇପାରିବା ନେଇ ସମସ୍ୟା ଦେଖାଦେଇଛି। ଏ ସମ୍ପର୍କରେ ଅନେକ ଥର ଯନ୍ତ୍ରୀଙ୍କୁ କୁହାଯାଇଥିଲେ ମଧ୍ୟ କୌଣସି ପ୍ରତିକାର କରାଯାଉନି ବୋଲି ଜଗତ୍ସିଂହପୁର ଜିଲା କୃଷକ ସଙ୍ଗଠନ ସମ୍ପାଦକ ଇଂ. ବାବାଜୀ ଚରଣ ଜେନା ଅଭିଯୋଗ କରିଛନ୍ତି। ଅନ୍ୟପକ୍ଷରେ ବିଭାଗୀୟ ଅବହେଳା ତଥା ଯନ୍ତ୍ରୀଙ୍କ ଖାମଖିଆଲ ମାନବୃତ୍ତିକୁ ଦୋଷ ଦେଇଛନ୍ତି ଚାଷୀ। ଏ ସମ୍ପର୍କରେ ଯନ୍ତ୍ରୀ ଜାଗେତ୍ରୀ ବାରିକଙ୍କୁ ପଚାରିବାରେ ସେ କହିଛନ୍ତି, ସ୍ଥାନୀୟ ୧୭ ନଂ ପାଣି ପଞ୍ଚାୟତ ହାତରେ ସଫେଇ ଦାୟିତ୍ୱ ରହିଛି। ୨/୩ଦିନ ମଧ୍ୟରେ ଏହାର ସମାଧାନ ହୋଇଯିବ। ତେବେ ରେଳ ଲାଇନ ତଳେ ଯାଇଥିବା କେନାଲର ଉଭୟ ପାର୍ଶ୍ୱରେ ସ୍ଥାୟୀ ବ୍ୟବସ୍ଥା କରିବା ପାଇଁ ଚାଷୀଙ୍କ ପକ୍ଷରୁ ଦାବି ହୋଇଛି।
