ମାଲକାନଗିରି,୨୫ା୪ (ଡି.ଏନ୍.ଏ.): ମାଲକାନଗିରି ଜିଲାରେ ୭୦ରୁ ଊର୍ଦ୍ଧ୍ୱ ଉଚ୍ଚ ବିଦ୍ୟାଳୟ ୫-ଟିରେ ରୂପାନ୍ତର ହୋଇଛନ୍ତି। ଏଥିପାଇଁ ଆସୁଥିବା ଅନୁଦାନରେ ବିଦ୍ୟାଳୟରେ ଭିତ୍ତିଭୂମି, ପାଠାଗାର, କମ୍ପ୍ୟୁଟର,ଶିକ୍ଷା, ସ୍ମାର୍ଟ କ୍ଲାସ୍, ଚିତବିନୋଦନ, କ୍ରୀଡା, ପାନୀୟ ଜଳ, ପରିମଳ, ସୁନ୍ଦର ବଗିଚା, ଶିଶୁ ଉଦ୍ୟାନ, ବିଦ୍ୟାଳୟ ଚତୁଃପାର୍ଶ୍ୱ ପାଚେରିରେ ବିଭିନ୍ନ ମହାପୁରୁଷଙ୍କ ସୁନ୍ଦର ପ୍ରତିଛବି ଅଙ୍କାଯିବା ବ୍ୟବସ୍ଥା ରହିଛି। ମାତ୍ର ମାଲକାନଗିରି ଜିଲାର କେତେକ ବିଦ୍ୟାଳୟରେ କେବଳ ପାଚେରିରେ ଚିତ୍ରାଙ୍କନରେ ଭିତ୍ତିଭୂମିର ଉନ୍ନତି ସୀମିତ ରହିଛି। କୋରୁକୋଣ୍ଡା ବ୍ଲକ ସଦର ମହକୁମାସ୍ଥିତ ଶିବାନନ୍ଦ ଉଚ୍ଚ ବିଦ୍ୟାଳୟରେ ଏପରି ଦେଖିବାକୁ ମିଳଛି। ଏହି ବିଦ୍ୟାଳୟରେ ୬୦୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ସେମାନଙ୍କ ପାଇଁ ପାନୀୟ ଜଳ ବ୍ୟବସ୍ଥା ନାହିଁ। ପ୍ରବଳ ଗ୍ରୀଷ୍ମତାପରେ ଛାତ୍ରୀଛାତ୍ରମାନେ ପାନୀୟ ଜଳ ମୁନ୍ଦେ ପାଇଁ ହଇରାଣ ହେଉଛନ୍ତି। ତେବେ ୫-ଟି ରୂପାନ୍ତରରେ ବିଦ୍ୟାଳୟର ବିଦ୍ୟାଳୟର ମୌଳିକ ସମସ୍ୟାକୁ ଗୁରୁତ୍ୱ ନ ଦେଇ କେବଳ ପାଚେରିରେ ରଙ୍ଗ ବେରଙ୍ଗର ଚିତ୍ର ଆଙ୍କି ଅର୍ଥ ବ୍ୟୟ କରାଯାଉଥିବା କେତେକ ଅଭିଭାବକ ଅଭିଯୋଗ କରିଛନ୍ତି। ବିଦ୍ୟାଳୟର ପରିମଳ ବ୍ୟବସ୍ଥା ମଧ୍ୟ ବିପର୍ଯ୍ୟସ୍ତ ହୋଇପଡିଛି। ନିକଟରେ ୪ ଦିନ ଧରି ଏହି ବିଦ୍ୟାଳୟରେ ୧୦୦ ଜଣ ଶିକ୍ଷୟିତ୍ରୀ ଶିକ୍ଷକଙ୍କୁ ନେଇ ବ୍ଲକ ସତେଜ କାର୍ଯ୍ୟକ୍ରମ ଚାଲିଥିଲା। ଏହି ଦିନଗୁଡିକେରେ ବିଦ୍ୟାଳୟରେ ପାନୀୟ ଜଳ ଏବଂ ପାଇଖାନା ବ୍ୟବହାର ନେଇ ସେମାନେ ବହୁ ଅସୁବିଧାର ସମ୍ମୁଖୀନ ହୋଇଥିଲେ। ସଫା ହେଉ ନ ଥିବାରୁ ବିଦ୍ୟାଳୟର ପାଇଖାନାଗୁଡିକ ଅତି ଅପରିସ୍କାର ହୋଇପଡିଥିଲା। ଯାହାକୁ ବ୍ୟବହାର କରିବା ଶିକ୍ଷୟିତ୍ରୀ ଶିକ୍ଷକଙ୍କ କ୍ଷେତ୍ରରେ ସମ୍ଭବ ହୋଇ ନ ଥିଲା। ତେବେ ପ୍ରଶାସନିକ ଅଧିକାରୀ ଏବଂ ଜନ ପ୍ରତିନିଧିମାନେ ବିଦ୍ୟାଳୟ ପରିଦର୍ଶନରେ ଯିବା ବେଳେ ଏହି ଚିତ୍ର ଦେଖି ଖୁସି ହେଉଛନ୍ତି ସତ, ମାତ୍ର ମୌଳିକ ସମସ୍ୟା ଦୂରପ୍ରତି କେହି ଦୃଷ୍ଟି ଦେଉନାହାନ୍ତି। ଏ ସମ୍ପର୍କରେ ଜିଲା ଶିକ୍ଷାଧିକାରୀ ମାନସ ଜେନାଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ସହ ଯୋଗାଯୋଗ ସମ୍ଭବ ହୋଇ ନ ଥିଲା।
