ଚମ୍ପୁଆ/ପାଟଣା/ଯୋଡ଼ା/ବାରିପଦା ଅଫିସ,୨୬।୨(ଡି.ଏନ୍.ଏ./ସ୍ବ.ପ୍ର.)କେନ୍ଦୁଝର ଓ ମୟୂରଭଞ୍ଜ ଜିଲାର ୫ ଡାକ୍ତରୀ ଛାତ୍ର ୟୁକ୍ରେନରେ ଫସି ରହିଛନ୍ତି। ସ୍ବଦେଶ ଫେରାଇ ଆଣିବାକୁ ସେମାନଙ୍କ ମାତାପିତା ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ ନିବେଦନ କରିଛନ୍ତି। ଚମ୍ପୁଆ ଅଞ୍ଚଳର ଶୁଭମ କୁମାର ସାହୁଙ୍କୁ ଫେରାଇ ଆଣିବା ପାଇଁ ବାପା ଦିଲ୍ଲୀପ କୁମାର ସାହୁ ସରକାରଙ୍କୁ ନିବେଦନ କରିଥିବା ଜଣାଯାଇଛି। ଶୁଭମ ୨୦୧୮ରେ ୟୁକ୍ରେନର ଭିନିତ୍ସିଆକୁ ଡାକ୍ତରୀ ପାଠ ପଢିବାକୁ ଯାଇଥିବା ବେଳେ ବର୍ତ୍ତମାନ ସେ ୪ର୍ଥ ବର୍ଷର ଛାତ୍ର। ସେ ନ୍ୟାଶନାଲ୍ ମେଡିକାଲ ୟୁନିଭର୍ସିଟିରେ ଅଧ୍ୟୟନ କରୁଥିବା ବେଳେ ସାଙ୍ଗମାନଙ୍କ ସହ ଏକ ଫ୍ଲାଟରେ ରହୁଛନ୍ତି। ପାଟଣାର ସ୍ବାଧୀନ ବିଶ୍ୱାଳ ୟୁକ୍ରେନର ଖାରକିଭ ନ୍ୟାଶନାଲ ମେଡ଼ିକାଲ ୟୁନିଭର୍ସିଟିରେ ଡାକ୍ତରୀ ପଢିବାକୁ ଯାଇ ସେଠାରେ ଫଶିଛନ୍ତି। ସ୍ବାଧୀନଙ୍କ ବାପା ସୁକାନ୍ତ ବିଶ୍ୱାଳ ପାଟଣା ବ୍ଲକ ଯମୁନା ପଶି ପଞ୍ଚାୟତରେ କୃଷି ବିଭାଗ ସୁପରଭାଇଜର ଭାବେ କାର୍ଯ୍ୟ କରୁଛନ୍ତି। ସେ ପାଟଣା ବ୍ଲକ ଖୀରେଇଟାଙ୍ଗିରୀରେ ଭଡ଼ା ଘରେ ଅବସ୍ଥାନ କରୁଥିବା ବେଳେ ସୁକାନ୍ତଙ୍କ ମୂଳ ଘର ଢେଙ୍କାନାଳ ଜିଲା ହିନ୍ଦୋଳ ବ୍ଲକର ଖଜିରାକଟା ଗଁାରେ। ଯୋଡ଼ା ସହରର ଛାତ୍ର ସତ୍ୟବ୍ରତ ସାହୁ ୟୁକ୍ରେନ ଦେଶର ଖାକିବ ସହରରେ ରହି ଡାକ୍ତରୀ ପାଠ ପଢୁଛନ୍ତି। ତାଙ୍କ ବାପା ଗଣେଶ ଚନ୍ଦ୍ର ସାହୁ କହିଛନ୍ତି ଆମେମାନେ ପୁଅକୁ ନେଇ ଭୟଭୀତ ଅଛୁ। ସତ୍ୟବ୍ରତ ଘରକୁ ଖବର ଦେଇ କହିଛନ୍ତି ଯେ, ଶୁକ୍ରବାର ଭୋର୍ ସମୟରେ ପ୍ରଚଣ୍ଡ ବୋମା ମାଡ଼ ଶବ୍ଦରେ ଘରଦ୍ୱାର ଥରିଯାଇଥିଲା। ସମସ୍ତେ ଡରିଯାଇଥିଲେ। ସେହିପରି ମୟୂରଭଞ୍ଜ ଜିଲା ବାରିପଦା ପୌରପାଳିକାର ୧୦ନଂ. ୱାର୍ଡ କାଳିମନ୍ଦିର ସାହିର ଛାତ୍ର ପୀୟୂଷ ଦାସ ଓ ୨୬ନଂ. ୱାର୍ଡ ମୁର୍ଗାବାଡି ଅଞ୍ଚଳର ସୁମନ ଘୋଷ ୟୁକ୍ରେନରେ ଫସି ରହିଛନ୍ତି। ପୀୟୂଷ ୫ମ ବର୍ଷ ଓ ସୁମନ ୪ର୍ଥ ବର୍ଷର ଡାକ୍ତରୀ ଛାତ୍ର ା ସେମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବାକୁ ଉଭୟଙ୍କ ପରିବାର ଲୋକେ ସରକାରଙ୍କ ନିକଟରେ ନିବେଦନ କରିଛନ୍ତି।
