ବେତନଟୀ,୧୭।୧୦(ସ୍ବ.ପ୍ର.): ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ ଆଗ୍ରିଆ ପଞ୍ଚାୟତ ଡାଙ୍ଗିରିପୁରା ଗ୍ରାମରେ ଏକ ଲୁଟ୍ ଘଟଣା ସାମ୍ନାକୁ ଆସିଛି। ଆଗ୍ରିଆ-ନଡ଼ପୁର ରାସ୍ତା ପାର୍ଶ୍ୱରେ ଥିବା ଜଣେ ଅବସରପ୍ରାପ୍ତ ଶିକ୍ଷକଙ୍କ ଘର ଝରକା ଗ୍ରିଲ ଭାଙ୍ଗି କେତେଜଣ ଦୁର୍ବୃତ୍ତ ଲକ୍ଷାଧିକ ଟଙ୍କାର ସୁନାଗହଣା ସମେତ ନଗଦ ଟଙ୍କା ଓ ଦାମୀ ଲୁଗାପଟା ଦିନ ଦ୍ୱିପ୍ରହରରେ ଲୁଟ୍ କରିଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ଡାଙ୍ଗିରିପୁରା ଗ୍ରାମର ଅବସରପ୍ରାପ୍ତ ଶିକ୍ଷକ ମନୋଜ କୁମାର ମହାନ୍ତି ତାଙ୍କ ସ୍ତ୍ରୀ ଓ ସାନ ଝିଅଙ୍କ ସହିତ ସୋମବାର ପୂର୍ବାହ୍ନ ୧୦ଟାରେ ବେତନଟୀ ସ୍ଥିତ ଲକ୍ଷ୍ମୀନାରାୟଣ ମନ୍ଦିରକୁ ଯାଇଥିଲେ। ମଧ୍ୟାହ୍ନରେ ପୂଜା ସାରି ଘରକୁ ଫେରିବା ପରେ ଗ୍ରିଲ ତାଲା ଖୋଲି ଘର ଭିତରକୁ ପଶିବା ବେଳକୁ ଘର ଭିତର ପଟୁ ଲକ୍ ହୋଇଥିବା ଦେଖିବାକୁ ପାଇଥିଲେ। ପ୍ରଥମେ ସେ କିଛି ବୁଝି ନ ପାରି କବାଟ ଭିତର ଲକ୍ ଖୋଲିବା ପାଇଁ ପାଖ କାଠ ମିସ୍ତ୍ରୀକୁ ଡାକିଥିଲେ। ସେତିକିବେଳେ ସେ ସନ୍ଦେହ କରି ଘର ପଛ ପଟକୁ ଯାଇଥିଲେ। ହେଲେ ତାଙ୍କ ଶୋଇବା ଘର ପଛପଟ ଝରକା ଗ୍ରିଲ ଭାଙ୍ଗାଯାଇ ତଳେ ଥୁଆ ହୋଇଥିବା ଦେଖିଥିଲେ। ଘର ଭିତରକୁ ଯାଇ ଦେଖିଲା ବେଳକୁ ଦୁର୍ବୁତ୍ତମାନେ ଆଲମିରା ଭାଙ୍ଗି ୫ଲକ୍ଷ ଟଙ୍କାର ସୁନା ଅଳଙ୍କାର ସହ ନଗଦ ୬୦ ହଜାର ଟଙ୍କା ଏବଂ କିଛି ନୂଆ ଲୁଗା ଲୁଟି ନେଇଥିବା ସେ ଜାଣିବାକୁ ପାଇଥିଲେ। ଏହାପରେ ସେ ଥାନାରେ ଏକ ଲିଖିତ ଅଭିଯୋଗ କରିଥିଲେ। ଖବର ପାଇ ବୈଶିଙ୍ଗା ଥାନା ଅଧିକାରୀ ପ୍ରଭାଂଶୁ ଶେଖର ମିଶ୍ର, ଏଏସ୍ଆଇ ଭାବଗ୍ରାହୀ ମହାନ୍ତ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ ଟିମ୍ ସହ ସନ୍ଧାନୀ କୁକୁର ସହାୟତାରେ ତଦନ୍ତ ଆରମ୍ଭ କରିଛନ୍ତି।
