ବୈଜ୍ଞାନିକଙ୍କଠାରୁ ୫ ଲକ୍ଷ ଠକେଇ
10:14 amSeptember 2, 2020September 2, 2020 / 43

ଭୁବନେଶ୍ୱର,୨ା୯(ବ୍ୟୁରୋ) : ଋଣ କରାଇ ଦେବା ନାଁରେ ଲୋକଙ୍କଠାରୁ ଲୁଟୁଛନ୍ତି ଘରୋଇ ବ୍ୟାଙ୍କ୍‌ କର୍ମଚାରୀ। ସେମାନେ ଜଣେ ବୈଜ୍ଞାନିକଙ୍କଠାରୁ ମଧ୍ୟ ୫ଲକ୍ଷ ଟଙ୍କା ଠକି ନେଇଛନ୍ତି। ଠକେଇର ଶିକାର ହୋଇଛନ୍ତି ଏୟାରପୋର୍ଟରେ ଥିବା ଭାରତୀୟ ପାଣିପାଗ ବିଭାଗର ବୈଜ୍ଞାନିକ ଅଶୋକ କୁମାର ମଲ୍ଲିକ। ସେ ଏନେଇ ଶହୀଦନଗର ଥାନାରେ ଅଭିଯୋଗ କରିବା ପରେ ପୋଲିସ ମାମଲା ଖୋଳତାଡ଼ ଆରମ୍ଭ କରିଛି। ବ୍ୟାଙ୍କ କର୍ତ୍ତୃପକ୍ଷଙ୍କୁ ପଚରାଉଚରା କରିବା ସହ ସମସ୍ତ କାଗଜପତ୍ର ଯାଞ୍ଚ କରୁଥିବା ଜଣାପଡିଛି।
ଅଭିଯୋଗ ଅନୁଯାୟୀ, ଅଶୋକ ଏୟାରଫିଲ୍ଡ ଥାନା ଭିମଟାଙ୍ଗୀ ଅଞ୍ଚଳରେ ପରିବାର ସହ ରୁହନ୍ତି। ୨୦୧୬ରେ ତାଙ୍କ ସ୍ତ୍ରୀ ପଡୋଶୀ ମହିଳାଙ୍କ ସହିତ ମିଶିି ଏସ୍‌ଏଚ୍‌ଜି ଗ୍ରୁପ୍‌ କରିଥିଲେ। ଏହି ଗ୍ରୁପ୍‌ ଏକ ଘରୋଇ ଫାଇନାନ୍ସ ସଂସ୍ଥାରୁ ୨୪ ପ୍ରତିଶତ ସୁଧରେ ୪ ଲକ୍ଷ ୧୯ ହଜାର ୫୭୩ ଟଙ୍କା ଲୋନ୍‌ ନେଇଥିଲେ। ଏହି ଲୋନ୍‌ ଟଙ୍କା ଅଶୋକଙ୍କ ଦରମା ଆକାଉଣ୍ଟରୁ କଟୁଥିଲା। ୨୦୧୮ରେ ଶହୀଦନଗର ଥିବା ଏକ ଘରୋଇ ବ୍ୟାଙ୍କ୍‌ର ଜଣେ କର୍ମଚାରୀ ଅଶୋକଙ୍କୁ ଭେଟି କମ୍‌ ସୁଧରେ ଲୋନ୍‌ କରାଇ ଦେବାକୁ କହିଥିଲେ। ଏପରି କି ତାଙ୍କ ବ୍ୟାଙ୍କ୍‌ରୁ ଅଢେଇ ଲକ୍ଷ ଟଙ୍କା ଲୋନ୍‌ ଉଠାଇ ପୂର୍ବ ଫାଇନାନ୍ସ ସଂସ୍ଥାକୁ ଶୁଝି ଦେବାକୁ କହିଥିଲେ। ଅଶୋକ ତାଙ୍କୁ ବିଶ୍ୱାସ କରି ନିଜର ଇଲେକ୍ଟ୍ରି ବିଲ, ଆଧାରକାର୍ଡ ସହ ସମସ୍ତ ଦସ୍ତଖତ ଦେଇଥିଲେ। ସମସ୍ତ କାଗଜପତ୍ର ନେବାପରେ ଉକ୍ତ ବ୍ୟକ୍ତିଜଣକ ଅଢେଇ ଲକ୍ଷ ଟଙ୍କାର ଏକ ଚେକ୍‌ ସଙ୍ଗେ ସଙ୍ଗେ ଧରାଇଥିଲେ। ଅଶୋକ ଲୋନ୍‌ ନେଇଥିବା ଅଢେଇ ଲକ୍ଷ ପାଇଁ ମାସକୁ ଇଏମ୍‌ଆଇ ୬ହଜାର ୬ଶହ ଟଙ୍କା ଦେବାକୁ ପଡୁଥିଲା। ୨୦୧୯ରେ ଉକ୍ତ ଘରୋଇ ବ୍ୟାଙ୍କ୍‌ର କୋଲକାତା ମୁଖ୍ୟ ଶାଖାରୁ ଅଶୋକଙ୍କୁ ଫୋନ୍‌ କଲ୍‌ ଆସିଥିଲା। ତାଙ୍କର ମାସିକ ଇଏମ୍‌ଆଇ ୧୭ ହଜାର ୫୫୦ ଟଙ୍କା ହୋଇଥିବାବେଳେ ୬ହଜାର ୬ଶହ ଟଙ୍କା ଜମା କରୁଥିବାରୁ ଲୋନ୍‌ ଡିଫଲ୍ଟ ହୋଇଥିବା କହିଥିଲେ। ଏହାଶୁଣି ଅଶୋକ ଶହୀଦନଗରସ୍ଥିତ ଉକ୍ତ ଘରୋଇ ବ୍ୟାଙ୍କ୍‌କୁ ଯାଇ ଯାଞ୍ଚ କରିବା ପରେ ତାଙ୍କ ନାମରେ ୮ଲକ୍ଷ ଟଙ୍କା ଲୋନ୍‌ ହୋଇଥିବା ଜାଣିବାକୁ ପାଇଲେ। ଉକ୍ତ ବ୍ୟାଙ୍କ୍‌ କର୍ମଚାରୀଜଣକ ଅଶୋକଙ୍କ ଅଜାଣତରେ ତାଙ୍କ ନାମରେ ୮ଲକ୍ଷ ଟଙ୍କା ଲୋନ୍‌ କରି ତାଙ୍କୁ ଅଢେଇ ଲକ୍ଷ ଟଙ୍କା ଦେଇ ବାକି ୫ ଲକ୍ଷରୁ ଅଧିକ ଟଙ୍କା ନିଜେ ହଡ଼ପ କରିନେଇଥିବା ଜଣାପଡିଛି।