ପୁରୀ ଅଫିସ,୨୪।୪: ବିଭିନ୍ନ ମାମଲାରେ ସମ୍ପୃକ୍ତ ଥିବା ୫ଜଣ ଦୁର୍ଦ୍ଦାନ୍ତ ଅପରାଧୀଙ୍କୁ ପୁରୀ ତାଳବଣିଆ ଥାନା ପୋଲିସ ଓ ସ୍ପେଶାଲ ସ୍କାଡ୍ ଗିରଫ କରିଛି। ଗିରଫ ୫ ଜଣ ଦୁର୍ଦ୍ଦାନ୍ତ ଅପରାଧୀଙ୍କ ମଧ୍ୟରେ ମନୁଆ ମହାନ୍ତିଙ୍କ ସମେତ ତାଙ୍କର ୪ ସହଯୋଗୀ ରହିଛନ୍ତି। ଗିରଫ ଅଭିଯୁକ୍ତମାନଙ୍କଠାରୁ ୩ଟି ବନ୍ଧୁକ ସହ ୪ ମୋବାଇଲ ଓ ଛୁରି ଜବତ କରାଯାଇଛି। ଏନେଇ ପୁରୀ ପୋଲିସ ପକ୍ଷରୁ ରବିବାର ଏକ ଖବରଦାତା ସମ୍ମିଳନୀରେ ସୂଚନା ଦିଆଯାଇଛି। ଗିରଫ ଅଭିଯୁକ୍ତମାନଙ୍କ ମଧ୍ୟରେ ଭେଟେରାନ ଅପରାଧୀ ତାଳବଣିଆ ଥାନା ଅନ୍ତର୍ଗତ ନୃସିଂହ ବଲ୍ଲଭ ପାଟଣାର ମନୋରଞ୍ଜନ ମହାନ୍ତି ଓରଫ ମନୁଆ(୩୮), ଜଗତସିଂହପୁର ଜିଲା ତିର୍ତ୍ତେଲ ଥାନା ଅଞ୍ଚଳର ସୌମ୍ୟରଞ୍ଜନ ବିଶ୍ୱାଳ, କୁମ୍ଭାରପଡା ଥାନା ଅନ୍ତର୍ଗତ ପୁରୀ ବସଷ୍ଟାଣ୍ଡ ପଛ ପାଶ୍ୱ ରଘୁପତି ନଗରର ମିଲନ ମିଶ୍ର(୩୫)ଲ୍, ପୁରୀ ଟାଉନ ଥାନା ଅନ୍ତର୍ଗତ ସୁଆର ସାହିର ଦୀପକ ସୁଆର (୩୨) ଏବଂ ମାର୍କଣ୍ଡେଶ୍ୱର ସାହିର ନିଲୁ ବାରିକ (୩୨) ରହିଛନ୍ତି। ପୋଲିସ ଅଭିଯୁକ୍ତମାନଙ୍କ ନିକଟରୁ ୩ଟି ପିସସ୍ତଲ ଯଥା, ଗୋଟିଏ ୯ ଏମଏମ ସେମି ଅଟୋମେଟିକ୍ ପିସ୍ତଲ, ଗୋଟିଏ ୭.୬୨ ଏମଏମ ସେମି ଅଟୋମେଟିକ୍ ପିସ୍ତଲ, ଗୋଟିଏ ୭.୬୫ ଏମଏମ ସେମି ଅଟୋମେଟିକ ପିସ୍ତଲ ସହ ୧୦ଟି ଜୀବନ୍ତ ଗୁଳି, ଚାରୋଟି ମୋବାଇଲ ଓ ଗୋଟିଏ ଛୁରୀ ଜବତ କରିଛି। ଏ ନେଇ ତାଳବଣିଆ ଥାନା ପୋଲିସ ଏକ କେସ୍ (ନଂ. ୭୦/୨୩ରେ ରୁଜୁ କରିଛି। ଏସ୍ପି କନଓ୍ବର ବିଶାଲ ସିଂ ଖବରଦାତା ସମ୍ମିଳନୀରେ ସୂଚନା ଦେଇ କହିଛନ୍ତି, ତାଳବଣିଆ ପୋଲିସ ଦୁର୍ଦ୍ଦାନ୍ତ ଅପରାଧିଙ୍କୁ ଗିରଫ କରିବାରେ ସଫଳ ହୋଇଛି। ତେବେ ଗିରଫ ହୋଇଥିବା ମନୋରଞ୍ଜନ ମହାନ୍ତି ପୋଲିସ ସୂଚିରେ ଦୁଇ ନମ୍ବର ଲିଷ୍ଟ୍ରେ ରହିଥିଲା। କିଛି ମାସ ହେବ ପୋଲିସ ଅଭିଯୁକ୍ତଙ୍କୁ ଖୋଜୁଥିଲା। ତେବେ ଗତ ୨୪ ରୁ ୨୮ ଦିନ ହେବ ଗୋଇନ୍ଦା ବିଭାଗ ପକ୍ଷରୁ ତାଙ୍କ ଗତିବିଧି ଉପରେ ନଜର ରଖାଯାଇଥିଲା। ଅଭିଯୁକ୍ତ ମନୁଆ ମହାନ୍ତିଙ୍କ ନାମରେ ବିଭିନ୍ନ ଥାନାରେ ୧୮ରୁ ଅଧିକ ମାମଲା ରହିଛି। ପୋଲିସକୁ ଶନିବାର ଅଭିଯୁକ୍ତ ଓ ତାଙ୍କ ସହଯୋଗୀମାନଙ୍କ ସମ୍ପର୍କରେ ବିଶେଷ ସୂତ୍ରରୁ ଖବର ମିଳିଥିଲା। ଅପରାଧିମାନେ ପୁରୀ ଆସି ହୁଳୁହୁଳିଆ ପୋଲ ନିକଟ ଏକ ପରିତ୍ୟକ୍ତ ଘରେ ସ୍ଥାନରେ ଆଶ୍ରୟ ନେଇଥିଲେ। ପୁରୀ ତଥା ଆଖପାଖ ଅଞ୍ଚଳରେ ବିଭିନ୍ନ ପ୍ରକାର ଅପରାଧ ଘଟାଇବା ପାଇଁ ଅଭିଯୁକ୍ତମାନେ ଯୋଜନା କରୁଥିଲେ। ଅପରାଧ ପରେ ଓଡିଶା ବାହାରକୁ ଚାଲିଯିବା ପାଇଁ ତାଙ୍କର ଯୋଜନା ରହିଥିଲା। ଏନେଇ ଖବର ପାଇବା ପରେ ସ୍ପେଶାଲ ସ୍କ୍ବାଡ୍ ଓ ତାଳବଣିଆ ଥାନା ପୋଲିସ ଉକ୍ତ ସ୍ଥାନରେ ଚଢାଉ କରି ଅପରାଧିମାନଙ୍କୁ ଗିରଫ କରି ଥାନାକୁ ଆଣିଥିଲେ। ସିଆରପିସିର ୧୧୦ ମାମଲାରେ ଏମାନଙ୍କୁ ବୁକ୍ କରାଯାଇଛି। ସେମାନଙ୍କ ଠାରୁ ଜବତ ହୋଇଥିବା ୩ଟି ପିସ୍ତଲ ଏବଂ ୧୦ ଜୀବନ୍ତ ଗୁଳି ଜବତ କେଉଁ ସ୍ଥାନରୁ ଆଣିଛନ୍ତି ସେ ନେଇ ତଦନ୍ତ କରାଯିବ । ଅପରାଧିମାନଙ୍କୁ ଦରକାର ପଡିଲେ ରିମାଣ୍ଡରେ ଅଣାଯିବ ବୋଲି ଏସ୍ପି ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଏସ୍ପି ମିହିର ରଞ୍ଜନ ପଣ୍ଡା, ସିଟି ଡିଏସ୍ପି କେ.କେ. ହରିପ୍ରସାଦ ଏବଂ ତାଳବଣିଆ ଅଧିକାରୀ ସୁଜାତା ବେହେରା ପ୍ରମୁଖ ଉପସ୍ଥିତ ଥିଲେ।
