ଜଗତ୍ସିଂହପୁର ଅଫିସ, ୩ା୧୨: ସମ୍ଭାବ୍ୟ ବାତ୍ୟା ‘ଜଓ୍ବାଦ’ର ମୁକାବିଲ ପାଇଁ ଜିଲାର ୪୫ ବହୁମୁଖୀ ବାତ୍ୟା ଓ ବନ୍ୟା ଆଶ୍ରୟସ୍ଥଳ ସମେତ ସ୍କୁଲ ଗୃହ, ଅଙ୍ଗନୱାଡି ଗୃହ, କଲ୍ୟାଣ ମଣ୍ଡପ ଆଦି ପ୍ରସ୍ତୁତ ରଖିବାକୁ ପଡ଼ିବ। ଆବଶ୍ୟକସ୍ଥଳେ ତଳୁଆ ଅଞ୍ଚଳ ଓ କଚ୍ଚା ଘରେ ରହୁଥିବା ଲୋକଙ୍କୁ ଆଶ୍ରୟସ୍ଥଳିକୁ ସ୍ଥାନାନ୍ତର କରାଯିବ। ଗର୍ଭବତୀ, ଶିଶୁ, ଦିବ୍ୟାଙ୍ଗ ଓ ବୃଦ୍ଧଙ୍କୁ ଅଗ୍ରାଧିକାର ଦିଆଯିବ ବୋଲି ଏନେଇ ଆଭାସୀ ମାଧ୍ୟମରେ ଆୟୋଜିତ ବୈଠକରେ ଜିଲାପାଳ ପାରୁଲ ପାଟୱାରି ପୌରୋହିତ୍ୟ କରି ଏହା କହିଛନ୍ତି। ସେ ଉପସ୍ଥିତ ଅଧିକାରୀମାନଙ୍କୁ ପ୍ରତ୍ୟେକ ଆଶ୍ରୟସ୍ଥଳରେ ବିଦ୍ୟୁତ୍, ପାନୀୟ ଜଳ ସୁବ୍ୟବସ୍ଥିତ କରିବା ଓ ସେଠାକାର ଶୌଚାଳୟକୁ ପରିଷ୍କାର ପରିଚ୍ଛନ୍ନ ରଖିବାକୁ ନିର୍ଦ୍ଦେଶ ଦେଇଥିଲେ। ପୂର୍ତ୍ତ ଓ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଗଛ କଟା ମେଶିନ, ଜେସିବି, ଜେନେରେଟର ଓ ଟ୍ରାକ୍ଟର ବ୍ୟବସ୍ଥା କରିବାକୁ କହିଥିଲେ। ଡ୍ରେନେଜ୍ ବିଭାଗ ଡ୍ରେନ୍ ସଫା କରିବ। ଏଥିସହ ଚାଉଳ, ଗୁଡ଼, କିରୋସିନ ଓ ଚୁଡା ଯଥେଷ୍ଟ ପରିମାଣରେ ମହଜୁଦ ରଖାଯିବ। ପ୍ରତ୍ୟେକ ଆଶ୍ରୟସ୍ଥଳରେ ଫାଷ୍ଟ ଏଡ୍ ସହ ଆବଶ୍ୟକ ଔଷଧ ମହଜୁଦ ରହିବ। ଗୋରୁଙ୍କ ପାଇଁ ଗୋଖାଦ୍ୟ, ମେଡିସିନ୍ ପ୍ରସ୍ତୁତ ରଖିବା ପାଇଁ ବିଭାଗୀୟ ଅଧିକାରୀ ପଦକ୍ଷେପ ନେବ। ତହସିଲଦାର ଯଥେଷ୍ଟ ପରିମାଣର ପଲିଥିନ ମହଜୁଦ ରଖିବେ। କୌଣସି ଅଧିକାରୀ ଓ କର୍ମଚାରୀ ସଦର ମହକୁମା ଛାଡି ଅନ୍ୟତ୍ର ଯାଇପାରିବେ ନାହିଁ। ସ୍ଥାନାନ୍ତରିତ ଲୋକଙ୍କୁ ଶୁଖିଲା ଖାଦ୍ୟ ସହ ଆବଶ୍ୟକସ୍ଥଳେ ରନ୍ଧାଖାଦ୍ୟ ଯୋଗାଇ ଦିଆଯିବ। ଏଥିସହ ଶିଶୁଙ୍କୁ ଛତୁଆ ଯୋଗାଇ ଦେବା ପାଇଁ ବ୍ୟବସ୍ଥା କରାଯିବ ବୋଲି ଜିଲାପାଳ ନିର୍ଦ୍ଦେଶ ଦେଇଛନ୍ତି । ଅନ୍ୟମାନଙ୍କ ମଧ୍ୟରେ ବୈଠକରେ ଅତିରିକ୍ତ ଜିଲାପାଳ ସଚ୍ଚିଦାନନ୍ଦ ସାହୁ, ଚିନ୍ମୟୀ ବିଶ୍ୱାଳ, ପାରାଦୀପ ଅତିରିକ୍ତ ଜିଲାପାଳ କାହ୍ନୁଚରଣ ଧୀର, ଉପଜିଲାପାଳ ଧର୍ମେନ୍ଦ୍ର ମଲ୍ଲିକ, ଜିଲା ଜରୁରୀ ଅଧିକାରିଣୀ ଯଶଶ୍ୱିନୀ ପୋଥାଳଙ୍କ ସମେତ ଅନ୍ୟାନ୍ୟ ବିଭାଗୀୟ ଅଧିକାରୀ, ବିଡିଓ ଓ ତହସିଲଦାରମାନେ ଯୋଗଦେଇଥିଲେ।
