ଯାଜପୁର ଅଫିସ,୭ା୧: ଗ୍ରାମ୍ୟ ନିର୍ମାଣ ବିଭାଗ(ଆର୍ଡି) ଅଧିକାରୀ ଓ କେତେଜଣ ରାଜନେତାଙ୍କ ମଧୁଚନ୍ଦ୍ରିକା ଯୋଗୁ ବହୁଚର୍ଚ୍ଚିତ ନଗଡ଼ା ବିକାଶ କାର୍ଯ୍ୟ ଏବେ ବିବାଦ ଘେରକୁ ଆସିଛି । ଏହାସହ ୨୦୧୬-୧୭ ବର୍ଷରେ ନଗଡ଼ାକୁ ନିର୍ମାଣ ହୋଇଥିବା ରାସ୍ତାର ମରାମତି କାମରେ ଟଙ୍କା ହରିଲୁଟ ହୋଇଥିବା ଅଭିଯୋଗ ଥାନାରେ ପହଞ୍ଚିଛି । ଅନ୍ୟପକ୍ଷେ ଆରଡି ବିଭାଗ ଉଚ୍ଚପଦସ୍ଥ ଅଧିକାରୀଙ୍କ ଦ୍ୱାରା ତଦନ୍ତ କରାଯିବା ପରେ ସେହି ରିପୋର୍ଟ ଆଧାରରେ ସରକାରୀ ଆଇନ ଅନୁଯାୟୀ ବିହିତ କାର୍ଯ୍ୟାନୁଷ୍ଠାନ ଗ୍ରହଣ ନ କରି ଥାନାରେ ମାମଲା ରୁଜୁ ହେବା ସାଧାରଣ ଲୋକଙ୍କୁ ବିସ୍ମିତ କରିଛି। ବିଭାଗୀୟ ଅଧିକାରୀଙ୍କ ମଧ୍ୟରେ ହରିଲୁଟ ଅର୍ଥର ଭାଗବଣ୍ଟା ନ ଛିଣ୍ଡିବାରୁ ଏଭଳି ଜଟିଳ ପରିସ୍ଥିତି ସୃଷ୍ଟି ହୋଇଛି ବୋଲି ସାଧାରଣରେ ଚର୍ଚ୍ଚା ଜୋର୍ ଧରିଛି।
ଯାଜପୁର ଜିଲା ସୁକିନ୍ଦା ବ୍ଲକ ଚିଙ୍ଗୁଡ଼ିପାଳ ପଞ୍ଚାୟତ ଅଧୀନ ନଗଡ଼ାରେ ୨୦୧୬ରେ ଶିଶୁ ମୃତ୍ୟୁ ଘଟଣା ସାରା ଭାରତବର୍ଷକୁ ଦୋହଲାଇ ଦେଇଥିଲା। ଗଣମାଧ୍ୟମରେ ଏ ସଂକ୍ରାନ୍ତରେ ପ୍ରଚାର ହେବା ପରେ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ବିଭିନ୍ନ ବିକାଶ ମୂଳକ କାର୍ଯ୍ୟ ସେଠାରେ ଆରମ୍ଭ ହୋଇଥିଲା। ଗମନାଗମନ ବିନା ବିକାଶ ଅସମ୍ଭବ ବୋଲି ମତ ପ୍ରକାଶ ପାଇବା ପରେ ସେତେବେଳେ ପ୍ରଥମେ ଅଶୋକଝରଠାରୁ ଲୋୟର ନଗଡ଼ା ପର୍ଯ୍ୟନ୍ତ ପାହାଡ ଭାଙ୍ଗି ରାସ୍ତା ନିର୍ମାଣ ହୋଇଥିଲା। ତେବେ ପକ୍କା ରାସ୍ତା ନିର୍ମାଣ ନ ହେବାରୁ ପ୍ରତିବର୍ଷ ବର୍ଷାରେ ରାସ୍ତାର ଅଧିକାଂଶ ଅଂଶ ଧୋଇ ହୋଇଗଲା, ଯାହା କି ବିଭାଗୀୟ ଅଧିକାରୀଙ୍କୁ ଏକପ୍ରକାର ଲେଉଟିଆ ଶାଗ କାଟି ଖାଇବା ଭଳି ନ୍ୟାୟରେ ଅର୍ଥ ଉପାର୍ଜନର ଏକ ମାଧ୍ୟମ ପାଲଟିଗଲା। ଏହି ରାସ୍ତାର ମରାମତି ନାମରେ ଗୁପ୍ତ ଟେଣ୍ଡର କରାଯାଇ ୪୪ଲକ୍ଷ ଟଙ୍କା ଖର୍ଚ୍ଚ ହୋଇଥିବା ଦର୍ଶାଯାଇଥିଲା। ତେବେ ଏହି ରାସ୍ତା ମରାମତିରେ ବ୍ୟାପକ ଅନିୟମିତତା ଏବଂ ତୋସରପାତ ହୋଇଥିବା ନେଇ ଅଭିଯୋଗ ହେବା ପରେ ଗତ ଡିସେମ୍ବର ଶେଷ ସପ୍ତାହରେ ଗ୍ରାମ୍ୟ ନିର୍ମାଣ ବିଭାଗ କେନ୍ଦ୍ରାପଡ଼ା-ଯାଜପୁର ସର୍କଲର ଅଧୀକ୍ଷଣ ଯନ୍ତ୍ରୀ ସଞ୍ଜୀବ କୁମାର ଦାଶ ତଦନ୍ତ କରିଥିଲେ। ତେବେ ତଦନ୍ତ ରିପୋର୍ଟ ଉପରେ ସରକାରଙ୍କ ଆଇନ ଅନୁସାରେ ସମ୍ପୃକ୍ତ ଦୋଷୀ ଅଧିକାରୀଙ୍କ ବିରୋଧରେ ଏଯାଏ କୌଣସି ପଦକ୍ଷେପ ଗ୍ରହଣ କରାଯାଇନାହିଁଁ। କେବଳ କାଳିଆପାଣି ଥାନାରେ ଯାଜପୁର ଗ୍ରାମ୍ୟ ଉନ୍ନୟନ ବିଭାଗ-୧ର ନିର୍ବାହୀ ଯନ୍ତ୍ରୀ ବିଜୟ କୁମାର ମହାରଣା, ଡୁବୁରୀ ଉପଖଣ୍ଡ ସହକାରୀ ନିର୍ବାହୀ ଯନ୍ତ୍ରୀ ଭେଙ୍କଟ ରମଣ ମୁଦୁଲି ଓ ଟମ୍କା ସେକ୍ସନର କନିଷ୍ଠ ଯନ୍ତୀ ରସାନନ୍ଦ ବାରିକଙ୍କ ନାମରେ ତଦନ୍ତକାରୀ ଅଧିକାରୀ ତଥା ଅଧୀକ୍ଷଣ ଯନ୍ତ୍ରୀ ଦାଶ ଏତଲା ଦେଇଛନ୍ତି। ସ୍ଥାନୀୟ କେତେଜଣ ନେତାଙ୍କ ଇଙ୍ଗିତରେ ହାତ ଚିଠା ମାଧ୍ୟମରେ ଗୁପ୍ତ ଟେଣ୍ଡର କରାଯାଇ କିପରି କର୍ମୀ ପୋଷଣ ହୋଇଥାଏ ତାହା ଏହି ନଗଡ଼ା ରାସ୍ତାର ମରାମତି କାମରୁ ଦେଖିବାକୁ ମିଳିଛି। ୧୫ ଦିନ ଭିତରେ ସେହି ରାସ୍ତାର ମରାମତି କରିବାକୁ ବିଭିନ୍ନ ସ୍ତରରେ ସମ୍ପୃକ୍ତ ଯନ୍ତ୍ରୀମାନଙ୍କୁ ଚାପ ସୃଷ୍ଟି ହୋଇଥିଲା। ନିର୍ବାହୀ ଯନ୍ତ୍ରୀ ସେହି ନେତାଙ୍କ ବୋଲକରା ସାଜି ଏବେ ହରଡ଼ଘଣାରେ ପଡିଥିବା ଆଲୋଚନା ହୋଇଛି। ତେବେ ଯନ୍ତ୍ରୀ ଦାଶ ଉକ୍ତ ଏତଲାରେ ଦର୍ଶାଇଛନ୍ତି, ବିଶାଖାପାଟଣା ହାୟାଗ୍ରୀଭା ଇନ୍ଫ୍ରାଟେକ୍ ପ୍ରୋଜେକ୍ଟ ଲିମିଟେଡ ନାମକ ଏକ ଠିକାସଂସ୍ଥା ଜିଲା ଖଣିଜ ପ୍ରତିଷ୍ଠାନ(ଡିଏମ୍ଏଫ୍)ପାଣ୍ଠିରୁ ୧୨କୋଟି ୯୫ଲକ୍ଷ ୭୧ ହଜାର ୨୭୭ ଟଙ୍କାର କାର୍ଯ୍ୟାଦେଶ ପାଇ ଅଶୋକଝର ପାଦଦେଶରୁ ତଳ ନଗଡ଼ା ପର୍ଯ୍ୟନ୍ତ ପ୍ରାୟ ୭.୬ କିଲୋମିଟର ରାସ୍ତା ନିର୍ମାଣ କରିଥିଲା। ଏହି ନିର୍ମାଣ କାର୍ଯ୍ୟ ୨୦୧୬ ସେପ୍ଟେମ୍ବର ୧୦ରୁ ଆରମ୍ଭ ହୋଇ ୨୦୧୭ ମାର୍ଚ୍ଚ ୩ରେ ଶେଷ ହୋଇଥିଲା। ଏହି ଠିକା ସଂସ୍ଥା ଦ୍ୱାରା ୨ବର୍ଷ ଧରି ସମ୍ପୃକ୍ତ ରାସ୍ତା ମରାମତିର ନିୟମ ରହିଥିବା ବେଳେ ୨୦୨୦ ଅଗଷ୍ଟରେ ସ୍ମୃତିରେଖା ବେହେରା ଓ ପ୍ରଣୟ ସେଠୀ ନାମକ ୨ଜଣ ଠିକାଦାରଙ୍କ ନାମରେ ସେହି ରାସ୍ତାକୁ ୫ଲକ୍ଷ ଟଙ୍କା ଲେଖାଏ ୧୦ଟି ଗୁପ୍ତ ଟେଣ୍ଡର ମାଧ୍ୟମରେ ମରାମତି କରାଯାଇଥିଲା। ଏଥିରେ ପ୍ରାୟ ୪୪ ଲକ୍ଷ ହରିଲୁଟ୍ କରାଯାଇଛି। ଏହାକୁ ନେଇ କାଳିଆପାଣି ଥାନାରେ ଏକ ମାମଲା (ନଂ.୧/୨୨)ରୁଜୁ ହୋଇଛି। ଏଥିରେ ନିର୍ବାହୀଯନ୍ତ୍ରୀ, ସହକାରୀ ନିର୍ବାହୀଯନ୍ତ୍ରୀ ଓ କନିଷ୍ଠ ଯନ୍ତ୍ରୀଙ୍କୁ ଆସନ୍ତା ୧୨ ତାରିଖ ସୁଦ୍ଧା ଆବଶ୍ୟକ କାଗଜପତ୍ର ସହ କାଳିଆପାଣି ଥାନାରେ ହାଜର ହୋଇ ତଦନ୍ତର ସମ୍ମୁଖୀନ ହେବାକୁ ଥାନା ଅଧିକାରୀ ସୁଶାନ୍ତ କୁମାର ଦାସ ନୋଟିସ ଜାରି କରିଛନ୍ତି।
ଏ ସଂକ୍ରାନ୍ତରେ ନିର୍ବାହୀ ଯନ୍ତ୍ରୀ ମହାରଣାଙ୍କୁ ପଚାରିବାରୁ ସେ କହିଛନ୍ତି, ବର୍ଷାରେ ଧୋଇହୋଇ ଯାଇଥିବା ରାସ୍ତାର ମରାମତି କାମ ହୋଇଛି। ଏଥିରେ କୌଣସି ଦୁର୍ନୀତି କିମ୍ବା ଭାଗବଣ୍ଟାର ପ୍ରଶ୍ନ ଉଠୁନାହିଁ।
