ବେଜିଂ/ନୂଆଦିଲ୍ଲୀ,୧୯।୨ : ଅନ୍ତର୍ଜାତୀୟ ଅଲିମ୍ପିକ କମିଟି(ଆଇଓସି)ର ୧୪୦ତମ ବୈଠକ ମୁମ୍ବାଇରେ ଅନୁଷ୍ଠିତ ହେବ। ଶନିବାର ବେଜିଂରେ ଅନୁଷ୍ଠିତ ୧୩୯ତମ ଅଲିମ୍ପିକ କମିଟି ବୈଠକରେ ଭାରତ ପରବର୍ତ୍ତୀ ବୈଠକ ଆୟୋଜନ କରିବାର ଅଧିକାର ହାସଲ କରିଛି। ଏନେଇ ବୈଠକରେ କୌଣସି ଦେଶ ଭାରତକୁ ବିରୋଧ କରି ନ ଥିଲେ। ୨୦୨୩ରେ ଭାରତ ଦ୍ୱିତୀୟ ଥର ପାଇଁ ଅଲିମ୍ପିକ କମିଟିର ବୈଠକ ଆୟୋଜନ କରୁଥିବାବେଳେ ପ୍ରଥମ ଥର ପାଇଁ ମୁମ୍ବାଇରେ ଏହା ଅନୁଷ୍ଠିତ ହେବ।
ଏହାପୂର୍ବରୁ ୪୦ ବର୍ଷ ତଳେ ୧୯୮୩ରେ ଦିଲ୍ଲୀରେ ଏହି ବୈଠକ ଆୟୋଜିତ ହୋଇଥିଲା। ଅନ୍ତର୍ଜାତୀୟ ଅଲିମ୍ପିକ କମିଟିର ୧୩୯ତମ ବୈଠକରେ ଭାରତ ପକ୍ଷରୁ ଅଭିନଭ ବିନ୍ଦ୍ରା, ନରିନ୍ଦର ବାତ୍ରା ଏବଂ ନୀତା ଅମ୍ବାନୀ ଯୋଗ ଦେଇଥିଲେ। ଏଥିରେ ଭାରତର କ୍ରୀଡ଼ା ଏବଂ ଯୁବ ମନ୍ତ୍ରୀ ଅନୁରାଗ ଠାକୁର ମଧ୍ୟ ଯୋଗ ଦେଇଛନ୍ତି। ୨୦୨୩ରେ ମୁମ୍ବାଇର ଜିଓ ୱାଲର୍ଡ କନଭେନଶନ ସେଣ୍ଟରରେ ଅଲିମ୍ପିକ କମିଟି ବୈଠକ ଅନୁଷ୍ଠିତ ହେବ।
