ଗୋପ,୬।୩(ଡି.ଏନ୍.ଏ.): ଆଧାର ନ ଥିଲେ ଏଥର ଭତ୍ତା ଟଙ୍କା ମିଳିବନି ବୋଲି ରାଜ୍ୟ ସରକାରଙ୍କ ପକ୍ଷରୁ ପ୍ରତି ବ୍ଲକକୁ ଜଣାଇ ଦିଆଯାଇଛି। ଗୋପ ବ୍ଲକର ୩୧ଟି ପଞ୍ଚାୟତରେ ଥିବା ୨୧ହଜାର ୧୨୭ଜଣ ଭତ୍ତା ହିତାଧିକାରୀଙ୍କୁ ମାସର ୧୫ ତାରିଖରେ ଭତ୍ତା ଦିଆଯାଇଥାଏ। କିନ୍ତୁ ଏହି ହିତାଧିକାରୀଙ୍କ ମଧ୍ୟରୁ ଆଧାର କାର୍ଡ ନ ଥିବା ୧୮୩୬ଜଣଙ୍କୁ ମଧ୍ୟ ଭତ୍ତା ପ୍ରଦାନ କରାଯାଇଥାଏ। ଏହି ଭତ୍ତା ହିତାଧିକାରୀଙ୍କ ମଧ୍ୟରେ କେତେଜଣଙ୍କ ମୃତ୍ୟୁ ସହିତ ବାହାରେ ଥିବାବେଳେ କେତେଜଣ ବ୍ୟକ୍ତି ହିତାଧିକାରୀଙ୍କ ନାମରେ ଜାଲ ଦସ୍ତଖତ କରି ଭତ୍ତା ନେବା ଭଳି ଅଭିଯୋଗ ଆସିଥିଲା। ଅଭିଯୋଗ ପରେ ରାଜ୍ୟ ସରକାରଙ୍କ ନିର୍ଦ୍ଦେଶରେ ପୁରୀ ଜିଲାପାଳ ସମର୍ଥ ବର୍ମାଙ୍କ କାର୍ଯ୍ୟାଳୟ ଚିଠି ନମ୍ବର ୪୬୪, ତା,୨/୩ /୨୦୨୧ରେ କାର୍ଯାନୁଷ୍ଠାନ ନିଆଯାଉଛିି। ଏହି ନିର୍ଦ୍ଦେଶକୁ ଚଳିତମାସରୁ ଲାଗୁ କରାଯାଇଥିବା ବେଳେ ବ୍ଲକ ପକ୍ଷରୁ ଏକ ଟିମ ଗଠନ କରି ପ୍ରତି ପଞ୍ଚାୟତରେ ପହଞ୍ଚି ଆଧାର କାର୍ଡ ନ ଥିବା ହିତାଧିକାରୀଙ୍କ ଆଧାର କାର୍ଡ କରିବେ ବୋଲି ବ୍ଲକ ସାମାଜିକ ଭାରପ୍ରାପ୍ତ ଅଧିକାରୀ ଅଶୋକ ବେହେରା କହିଛନ୍ତି। ଅପରପକ୍ଷେ ଗୋପ ବ୍ଲକ ଇସାଣପୁର, ରାହାଙ୍ଗଗୋରଡା, ଗୋପ, ବୀରତୁଙ୍ଗ,ଜଙ୍ଗଲବୋରି, ସୁତନ, କୁଆଁପଡା, ଗଣେଶ୍ୱରପୁର, ଧୂମାଳ, ଶୋରଭା ପଞ୍ଚାୟତ ସହିତ ଆଉ କେତେକ ପଞ୍ଚାୟତରେ ଜାଲ କାଗଜପତ୍ର ସହ ଦିବ୍ୟାଙ୍ଗ ନ ଥାଇ ସରକାରୀ ଭତ୍ତା ସହିତ ଚାଉଳ ନେବା ଅଭିଯୋଗ ରହିଥିଲେ ମଧ୍ୟ ବ୍ଲକ କର୍ତ୍ତୃପକ୍ଷ ଏଥିପ୍ରତି ଧ୍ୟାନ ଦେଉ ନ ଥିବା ଅଭିଯୋଗ ରହିଛି। ଏ ସମ୍ପର୍କରେ ବିଡିଓ ଦୀପ୍ତିରାଣୀ ଦାସ କହିଛନ୍ତି, ଜିଲାପାଳଙ୍କ ନିର୍ଦ୍ଦେଶ ଅନୁଯାୟୀ ତଦନ୍ତ ଚାଲିଥିବାବେଳେ ସମସ୍ତ ତଥ୍ୟ ଆସିବା ପରେ କାର୍ଯ୍ୟାନୁଷ୍ଠାନ ନିଆଯିବ।
