ଭୁବନେଶ୍ୱର, ୭।୧୧ (ବ୍ୟୁରୋ): ଶ୍ରମିକ ହାଟକୁ ମିଳିବ ଛାତ। ସ୍ଥାୟୀ ବିଶ୍ରାମ ଘରେ ପଙ୍ଖା ସହିତ ବିଶୁଦ୍ଧ ପାନୀୟ ମଧ୍ୟ ମିଳିବ। ପ୍ରାଥମିକ ଭାବେ ରାଜଧାନୀ ଭୁବନେଶ୍ୱରରେ ଥିବା ୫ରୁ ୬ ଶ୍ରମିକ ହାଟର ପୁନରୁଦ୍ଧାର କରାଯିବ। ଏନେଇ ରାଜ୍ୟ ଶ୍ରମ ବିଭାଗ ଓ ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ପ୍ରକ୍ରିୟା ହାତକୁ ନିଆଯାଇଛି। ଶ୍ରମ ବିଭାଗ ସମସ୍ତ ପ୍ରୋତ୍ସାହନ ଯୋଗାଇ ଦେବ ଓ ବିଏମ୍ସି ସମସ୍ତ ଶ୍ରମିକ ହାଟରେ ଅତ୍ୟାଧୁନିକ ବିଶ୍ରାମ ଗୃହ ନିର୍ମାଣ କରିବ। ଇତିମଧ୍ୟରେ ଶ୍ରମ କମିଶନର ଡ. ଏନ୍. ଥିରୁମାଲା ନାଏକ ଓ ବିଏମ୍ସି ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ ରାଜଧାନୀର ଉକ୍ତ ୬ଟି ସ୍ଥାନ ବୁଲି ପ୍ରସ୍ତାବିତ କାର୍ଯ୍ୟ ଓ ପାରିପାର୍ଶ୍ୱିକ ସ୍ଥିତି ଅନୁଧ୍ୟାନ କରିଛନ୍ତି। ଖୁବ୍ଶୀଘ୍ର ନିର୍ଦ୍ଧାରିତ ସ୍ଥାନରେ କାର୍ଯ୍ୟ ଆରମ୍ଭ ହେବାକୁ ଥିବାବେଳେ ପରବର୍ତ୍ତୀ ସମୟରେ ରାଜ୍ୟର ପ୍ରମୁଖ ସହରରେ ଏଭଳି ଶ୍ରମିକ ହାଟ ନିର୍ମାଣ ହେବ ବୋଲି ସୂଚନା ଦିଆଯାଇଛି।
ଭୁବନେଶ୍ୱରର ନୟାପଲ୍ଲୀ, କଳ୍ପନା, ରସୁଲଗଡ଼, ଲିଙ୍ଗରାଜ ଷ୍ଟେଶନ ଓ ଶିଖରପୁର ଅଞ୍ଚଳରେ ନିତିଦିନିଆ ଶ୍ରମିକ ହାଟ ଚାଲେ। ସକାଳ ହେବା ମାତ୍ରେ ଦିନ ମଜୁରିଆ ଶ୍ରମିକଙ୍କ ଏଠାରେ ଭିଡ଼ ଲାଗେ। କେଉଁଠି ଶୁଅନ୍ତି, କେଉଁଠି ଖାଆନ୍ତି କିଛି ସେମାନଙ୍କ ଠିକଣା ନ ଥାଏ। ସବୁଦିନ କାମ ମିଳିଲେ ଘରେ ଚୁଲି ଜଳେ। ଏବେ ସେମାନଙ୍କ ଦୈନିକ ଜୀବନଶୈଳୀରେ ପରିବର୍ତ୍ତନ ଆଣିବା ସହ ହାଟର ଉନ୍ନତୀକରଣ ପାଇଁ ଶ୍ରମ ବିଭାଗ ସହ ମିଶି ଅଣ୍ଟା ଭିଡ଼ିଛି ବିଏମ୍ସି। ସୂଚନାଯୋଗ୍ୟ, ଶ୍ରମିକ ହାଟର ସ୍ଥାୟିତ୍ୱ କିଛି ନ ଥିବାରୁ ଶ୍ରମିକମାନେ ନାନା ହଟହଟାର ସମ୍ମୁଖୀନ ହୋଇଥାନ୍ତି। ବର୍ଷା ଓ ଖରାଦିନେ କାମ ପାଇଁ ସେମିତି ଖୋଲା ଆକାଶ ତଳେ ଘଣ୍ଟା ଘଣ୍ଟା ଅପେକ୍ଷା କରିଥାନ୍ତି। ମୁଣ୍ଡ ଗୁଞ୍ଜିବାକୁ ଆଜବେଷ୍ଟସ୍ ନ ଥିବାରୁ ଏଥିପ୍ରତି ଦୃଷ୍ଟି ଦେବାକୁ ଶ୍ରମିକମାନେ ପୂର୍ବରୁ ଦାବି ଜଣାଇଥିଲେ।
