ନୟାଗଡ଼,୫।୨(ଲୋକନାଥ ମିଶ୍ର): ୪ମାସ ଧରି ଭତ୍ତା ନ ପାଇବାରୁ ନୟାଗଡ଼ ବ୍ଲକ ବାଲୁଗଁା ଓ ଲାଠିପଡା ଗ୍ରାମର ବୃଦ୍ଧାବୃଦ୍ଧ ବୁଧବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ କରିଥିଲେ। ଖବରପାଇ ଜିଲାପାଳ ମଧୁମିତା ରଥ ବିକ୍ଷୋଭକାରୀଙ୍କ ପାଖରେ ପହଞ୍ଚି ବୃଦ୍ଧାବୃଦ୍ଧଙ୍କ ଅଭିଯୋଗ ଶୁଣିଥିଲେ। ଖାଇବାରେ ସମସ୍ୟା ଓ ଔଷଧ କିଣିବାରେ ସମସ୍ୟା ପରି ଦୁଃଖ ଶୁଣି ଯୁଦ୍ଧକାଳୀନ ଭିତିିରେ ଫେବୃଆରୀ ଭିତରେ ୪ମାସର ଭତ୍ତା ଯୋଗାଇ ଦେବେବୋଲି ପ୍ରତିିଶୃତି ଦେବାପରେ ପ୍ରାୟ ଅଧ ଘଣ୍ଟାଏ ପରେ ବିକ୍ଷୋଭ ପ୍ରତ୍ୟାହୃତ ହୋଇଥିଲା। ବାଲୁଗଁାର ଦାଶରଥି ଜେନା ଓ ବସନ୍ତ ମିଶ୍ର କୁହନ୍ତି, ବୟସ ହୋଇଗଲେ ବୃଦ୍ଧା ବୃଦ୍ଧ ଘରେ ଆଲୋଡା ହୋଇ ପଡନ୍ତି।
ଆମମାନଙ୍କର ଖର୍ଚ୍ଚ ଉଠାଇବାକୁ ପୁଅ ବୋହୂ କୁନ୍ଥୁକୁନ୍ଥୁ ହୁଅନ୍ତି। କିଛି ପୁଅ ବୋହୂ ଲୋକ ଦେଖାଣିଆ ପଚାରନ୍ତି ଆଉ ଅନେକ ପଚାରନ୍ତି ନାହିଁ। ଏଭଳି ସମୟରେ ସରକାର ବୃଦ୍ଧାବୃଦ୍ଧଙ୍କ ପାଇଁ ପେନସନ ଚଳିବା ପାଇଁ ସୁବିଧା ହୋଇଥାଏ। ତେବେ ଗତ ନଭେମ୍ବରରୁ- ଫେବୃଆରୀ ପର୍ଯ୍ୟନ୍ତ ଭତ୍ତା ଆମ୍ଭକୁ ମଳି ନାହିଁ। ବାରମ୍ବାର ବ୍ଲକ କାର୍ଯ୍ୟାଳୟ ଦୌଡି ଥିଲେ ମଧ୍ୟ ସୁଫଳ ପାଇଲୁ ନାହିଁ। ବ୍ୟାଙ୍କର ଆଇଏଫଏସ୍ସି କୋର୍ଡ ବଦଳି ଥିବାରୁ ଏପରି ସମସ୍ୟା ହୋଇଥିବା କୁହାଯାଉଛି। ତେବେ କଣ ୪ ମାସ ଧରି ସମସ୍ୟା ସମାଧାନ ହେଉ ନାହିଁ। ବ୍ଲକରେ କାଗଜାତ ଠିକ୍ରେ ହେଉ ନ ଥିବାରୁ ଭତ୍ତା ମିଳୁ ନ ଥିବା ଶୁଣିବାକୁ ପାଇଲୁ ନାହିଁ। ୪ମାସ ଅପେକ୍ଷା ପରେ ଜିଲାପାଳଙ୍କୁ ଅଭିଯୋଗ କରିବାକୁ ବାଧ୍ୟ ହୋଇ ଆସି ବିକ୍ଷୋଭ କରିଥିଲୁ। ହେଲେ ଆମ ବିକ୍ଷୋଭ ଖବର ଶୁଣି ଜିଲାପାଳ ଆପେ ଆପେ ଆସି ଆମ ସହ ଆଲୋଚନା କରି ସମସ୍ୟାର ସମାଧାନ ପାଇଁ ପ୍ରତିଶୃତି ଦେବା ପରେ ବିକ୍ଷୋଭ ପ୍ରତ୍ୟହାର କରି ନେଲୁ।
ଲାଠିପଡାର ବିକ୍ରମ ସାହୁ କୁହନ୍ତି, ଆମ ଗଁାର ୨୦ରୁ ଊର୍ଦ୍ଧ୍ୱ ବୃଦ୍ଧା ବୃଦ୍ଧ ୪ମାସର ଭତ୍ତା ପାଇ ନ ଥିବାରୁ ନୟାଗଡ଼ ବିଡିଓଙ୍କୁ ଭେଟି ଅଭିଯୋଗ କରିବାକୁ ଆସିଥିଲୁ। ହେଲେ ବହୁ ସମୟ ଧରି ଅପେକ୍ଷା ପରେ ବିଡିଓଙ୍କ ଦେଖାପାଇଲୁ ନାହିଁ। ଏଣୁ ଜିଲାପାଳଙ୍କୁ ଭେଟିବାକୁ ଆସି ଅଭିଯୋଗ କରି ଆଶ୍ୱସନା ପାଇ ଫେରିଛୁ ବୋଲି କହିଛନ୍ତି। ବାଲୁଗଁାର ଅନ୍ନପୂର୍ଣ୍ଣା ଜେନା କୁହନ୍ତି, ସରକାରଙ୍କର ଭତ୍ତା ଆମକୁ ଜୀବନ ଜୀବିକା ଦେଇଛି। ୪ମାସ ହେଲା ଭତା ନ ପାଇବାରୁ ଅଭିଶପ୍ତ ଜୀବନଯାପନ କରିଲୁଣି। ଆମ ପରି ଲୋକ ବିଡିଓ, ଜିଲାପାଳଙ୍କୁ ଆସି ଅଭିଯୋଗ କରିବାକୁ ଓ ଜିଲାପାଳ ଅଫିସରେ ଆସି ବିକ୍ଷୋଭ କରିବାକୁ ବୟସ ନାହିଁ। ତଥାପି ୪ମାସ ହେଲା ଭତ୍ତା ମିଳି ନ ଥିବାରୁ ବାଧ୍ୟ ହୋଇ ଅଭିଯୋଗ କରି ଆଶ୍ୱସନା ପାଇ ଫେରୁଛୁ। ଫେବୃଆରୀରେ ୪ମାସର ଭତ୍ତା ଅର୍ଥ ନ ମିଳିଲେ ପୁଣି ଜିଲାପାଳଙ୍କ ଅଫିସକୁ ଆସି ଦୁଃଖ ଜଣାଇବୁ ବୋଲି କହିଛୁ ବୋଲିି କହିଛନ୍ତି।
ବାଲୁଗଁା ସରପଞ୍ଚ ମନୋଜ ନାୟକ କୁହନ୍ତି, ବ୍ୟାଙ୍କର ଆଇଏଫଏସ୍ସି କୋର୍ଡ ବଦଳିଲେ ଦିନେ ଦୁଇ ଦିନ ଭିତରେ ଏଭଳି ସମସ୍ୟାର ସମାଧାନ ହୋଇଯିବ। ତେବେ ୪ମାସ ହେଲା କ’ଣ ଆଇଏଫଏସ୍ସି କୋର୍ଡ ସମସ୍ୟାର ସମାଧାନ ହୋଇ ପାରୁନି। ନୟାଗଡ଼ ବ୍ଲକ ସାମାଜିକ ଶିକ୍ଷା ସଙ୍ଗଠନ ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁ ମୋ ପଞ୍ଚାୟତର ୪ ଶହରୁ ଊର୍ଦ୍ଧ୍ୱ ବୃଦ୍ଧାବୃଦ୍ଧ ୪ମାସ ହେଲା ଭତ୍ତା ପାଇ ନାହାନ୍ତି। ଏଭଳି ସମସ୍ୟା ବ୍ଲକର ଅନ୍ୟ କୌଣସି ପଞ୍ଚାୟତରେ ଦେଖା ଯାଇନି। କେବଳ ଲାଠିପଡାରେ ୧୦ରୁ ୧୫ ହିତାଧିକାରୀ ଭତ୍ତା ପାଇ ନ ଥିବା ଜଣାପଡିଛି। ସମ୍ପୃକ୍ତ ଘଟଣାର ତଦନ୍ତ ପାଇଁ ଜିଲାପାଳଙ୍କୁ ନିବେଦନ କରାଯାଇଛି। ଜିଲାପାଳ ମଧୁମିତା ରଥ କୁହନ୍ତି, ବୃଦ୍ଧାବୃଦ୍ଧଙ୍କ ୪ମାସର ଭତ୍ତା ଟଙ୍କା ଫେବୃଆରୀ ଭିତରେ ଯେପରି ପାଇବେ ସେନେଇ ପଦକ୍ଷେପ ନେବି। ବ୍ଲକର ବିଡିଓଙ୍କୁ ଡାକି ଏହାର ତୁରନ୍ତ ସମାଧାନ କରାଯିବ। ଭତ୍ତା ଦେବାରେ ଜାଣିଶୁଣି ହଇରାଣ କରାଯାଇଥିଲେ ସମ୍ପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବବୋଲି କହିଛନ୍ତି।
