ଲାଠୋର,୧୭ା୧୨(ଡି.ଏନ.ଏ.): ବଲାଙ୍ଗୀର ଜିଲା ଲାଠୋର ଥାନା ଅଧୀନ ମସିଣା ଏବଂ ଭରୁଆମୁଣ୍ଡା ଗ୍ରାମର ୪ ଦାଦନ ଶ୍ରମିକ ପରିବାରକୁ ଗୁରୁବାର ତେଲେଙ୍ଗାନାରୁ ଉଦ୍ଧାର କରାଯାଇଛି। ପ୍ରକାଶ ଯେ,ତେଲେଙ୍ଗାନା ରାଜ୍ୟର ଏକ ଇଟାଭାଟିରେ କାମ କରୁଥିବା ଏହି ଦାଦନ ପରିବାରଙ୍କୁ ନିର୍ଯାତନା ଦିଆଯିବା ସହ ସେମାନଙ୍କ ମଧ୍ୟରୁ ଜଣେ ନିଖୋଜ ଥିବା ନେଇ ମସିଣା ଗ୍ରାମର ନବିନ ବାରିକ ଏକ ଅଭିଯୋଗପତ୍ର ହ୍ବାଟସ ଆପ୍ ଯୋଗେ ଗୁରବାର ଶ୍ରମ ବିଭାଗ, ବଲାଙ୍ଗୀର ଜିଲାପାଳ, ଜିଲା ଶ୍ରମ ଅଧିକାରୀ, ପାଟଣାଗଡ ଉପ-ଜିଲାାପାଳଙ୍କ ନିକଟଙ୍କୁ ପଠାଇ ସେମାନଙ୍କୁ ତୁରନ୍ତ ଉଦ୍ଧାର କରିବାକୁ ନିବେଦନ କରିଥିଲେ। ଅଭିଯୋଗ ପରେ ସଂପୃକ୍ତ ଶ୍ରମିକମାନେ ଶ୍ରମ ବିଭାଗ ସହାୟତାରେ ସେଠାରୁ ଉଦ୍ଧାର ହୋଇ ସୁରକ୍ଷିତ ଭାବେ ଘରକୁ ଫେରୁଥିବା ବେଳେ ଜଣେ ଶ୍ରମିକ ନିଖୋଜ ରହିଥିବା ନେଇ ଅଭିଯୋଗକାରୀ ସୂଚନା ଦେଇଛନ୍ତି। ଲାଠୋର ଥାନା ଅଧୀନ ଭୁରୁଆମୁଣ୍ଡା ଗ୍ରାମର ଜଣେ ଦାଦନ ଶ୍ରମିକ ସର୍ଦ୍ଦାର ଅଗ୍ରୀମ ଟଙ୍କା ଦେଇ ଜଗବନ୍ଧୁ ବାରିକ(୫୦), ଉଦୟ ବାରିକ(୪୦), ନାରଙ୍ଗି ମହାନନ୍ଦ(୪୫), ଉର୍ମିଲା ବାରିକ(୩୩), ବିଶ୍ୱନାଥ ମହାନନ୍ଦ (୩୩), ଗୀତା ମହାନନ୍ଦ(୩୦), ଯେହେରୁ ଆଡ଼ବଙ୍ଗ(୩୦), ସରସ୍ବତୀ ଆଡ଼ବଙ୍ଗ(୨୭), ଆମତ୍ା ବାରିକ(୨୨), ରବି ବାରିକ(୧୯) ଏବଂ ୭ ଜଣ ନାବାଳିକା ନାବାଳକଙ୍କୁ ୨ ମାସ ତଳେ ତେଲେଙ୍ଗାନା ରାଜ୍ୟ ମଙ୍ଗଲାପେଲି ଅଞ୍ଚଳର ସାଇଗୁଡାଠାରେ ଥିବା ଏକ ଇଟା ଭାଟିକୁ କାମ କରିବା ପାଇଁ ନେଇଥିଲେ। ଶ୍ରମିକମାନଙ୍କୁ ସେଠାରେ ଦିନ ରାତି କାମରେ ଖଟାଯାଉଥିଲା। ଟିକିଏ ବିଶ୍ରାମ ନେଲେ ମାଲିକ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ମାଡ ମାରି ନିର୍ଯାତନା ଦେଉଥିଲେ। ଶ୍ରମିକମାନେ ମାଡ ଭୟରେ ଚୁପ ରହୁଥିଲେ। ଏପରି ସ୍ଥିତିରେ ରହିଥିବା ଶ୍ରମିକମାନଙ୍କ ମଧ୍ୟରୁ ଶ୍ରମିକ ବିଶ୍ୱନାଥ ମହାନନ୍ଦ ଗତ ୩ ତାରିଖଠାରୁ ନିଖୋଜ ରହିଛନ୍ତି। ସେ ନିଖୋଜ ହେଲା ପରେ ତାଙ୍କ ସ୍ତ୍ରୀଙ୍କୁ ମାଲିକ କୁଆଡ଼େ ଧମକ ଚମକ ଦେଇଥିବା ଅଭିଯୋଗପତ୍ରରେ ଦର୍ଶା ଯାଇଛି। ଅଭିଯୋଗପତ୍ର ପାଇ ଶ୍ରମ କମିଶନର ତେଲେଙ୍ଗାନା ରାଜ୍ୟ ଦାୟିତ୍ୱରେ ଥିବା ଯୋଗସୂତ୍ର ଅଧିକାରୀ ଟାମଡ଼ି ରମେଶଙ୍କୁ ଯୋଗାଯୋଗ କରି ତୁରନ୍ତ ସଂପୃକ୍ତ ଶ୍ରମିକ ମାନଙ୍କୁ ଉଦ୍ଧାର କରିବାକୁ ନିର୍ଦ୍ଦେଶ ଦେଇଥିଲେ। ତାଙ୍କ ନିର୍ଦ୍ଦେଶ ଅନୁସାରେ ଅଧିକାରୀ ଜଣକ ଗୁରବାର ସମସ୍ତ ଶ୍ରମିକଙ୍କୁ ଇଟା ଭାଟିରୁ ଉଦ୍ଧାର କରି ବଲାଙ୍ଗୀର ଶ୍ରମ କାର୍ଯ୍ୟାଳୟକୁ ପଠାଇଥିବା ବେଳେ ଖବର ଲେଖା ହେବା ପର୍ଯ୍ୟନ୍ତ ଶ୍ରମିକମାନେ ବଲାଙ୍ଗୀରରେ ପହଞ୍ଚତ୍ ନ ଥିବା ନେଇ ଉଦ୍ଧାର ଶ୍ରମିକ ଉଦୟ ବାରିକ ସୂଚନା ଦେଇଛନ୍ତି। ତେବେ ଏହି ଘଟଣାର ତଦନ୍ତ କରି ଏଥିରେ ଯେଉଁମାନଙ୍କର ସଂପୃକ୍ତି ରହିଛି ତାଙ୍କ ନାମରେ ମାମଲା ରୁଜୁ କରିବାକୁ ଶ୍ରମିକମାନେ ଦାବି କରିଛନ୍ତି।
