ଲାଉସାନ୍ନେ,୨୪ା୫(ପି.ଟି.): ଅନ୍ତର୍ଜାତୀୟ ବକ୍ସିଂ ଆସୋସିଏଶନ୍ (ଆଇବିଏ) ପକ୍ଷରୁ ୪ ଦେଶର ଜାତୀୟ ମହସଂଘକୁ ନିଲମ୍ବିତ କରାଯାଇଛି। ଏକ ବିଦ୍ରୋହୀ ସଙ୍ଗଠନ ପକ୍ଷରୁ ଆୟୋଜିତ ଟୁର୍ନାମେଣ୍ଟରେ ଅଂଶଗ୍ରହଣ କରିବା କାରଣରୁ ଜର୍ମାନୀ, ନ୍ୟୁଜିଲାଣ୍ଡ, ସ୍ବିଡେନ୍ ଓ ନେଦରଲାଣ୍ଡ୍ସକୁ ନିଲମ୍ବନ କରାଯାଇଛି। ଗତ ମାସରେ ଯୁକ୍ତରାଷ୍ଟ୍ର ଆମେରିକା ଓ ବ୍ରିଟେନ ସମେତ କିଛି ଦେଶର ମହାସଂଘ ମିଳିତ ଭାବରେ ଓ୍ବାଲର୍ଡ ବକ୍ସିଂ ନାମରେ ଅନୁଷ୍ଠାନ ଖୋଲିଥିଲେ। ଆଇବିଏ ଅଗୋଚରରେ ଏହି ୪ ରାଷ୍ଟ୍ରର ଅଫିସିଆଲମାନେ ଓ୍ବାଲର୍ଡ ବକ୍ସିଂ ପକ୍ଷରୁ ଆୟୋଜିତ ଟୁର୍ନାମେଣ୍ଟରେ ଅଂଶଗ୍ରହଣ କରିଥିଲେ। ଆଇବିଏର ଆଚରଣ ବିଧି ଉଲ୍ଲଂଘନ କାରଣରୁ ଏହି ୪ ରାଷ୍ଟ୍ରଙ୍କୁ ନିଲମ୍ବିତ କରାଯାଇଛି। ୪ ମହାସଂଘ ଉପରୁ ବ୍ୟାନ ହଟାଇବା କିମ୍ବା କୌଣସି ଆଲୋଚନା ପୂର୍ବରୁ ଉକ୍ତ ସଙ୍ଗଠନଠାରୁ ନିଜକୁ ଦୂରେଇବାକୁ ପଡିବ ବୋଲି ଆଇବିଏ ପକ୍ଷରୁ ପ୍ରକାଶ। କୌଣସି ବି ପରିସ୍ଥିତିରେ ଅନ୍ୟ ଏକ ଅନ୍ତର୍ଜାତୀୟ ସଙ୍ଗଠନକୁ ଗ୍ରହଣ କରାଯିବ ନାହିଁ। ଏହା ପୂର୍ବରୁ ଚେକ୍ ରିପବ୍ଲିକ୍, ଲାଇବେରିଆ ଓ ଗୁଏନାର ମହାସଂଘକୁ ମଧ୍ୟ ନିଲମ୍ବିତ କରାଯାଇଥିଲା। କେବଳ ଆମେରିକୀୟ ବକ୍ସିଂ ମହାସଂଘ ଏହାର ସଦସ୍ୟତା ପ୍ରତ୍ୟାହାର କରି ନେଇଛି। ଲାଇବେରିଆ ଓ ଗୁଏନା ମହାସଂଘ ବାର୍ଷିକ ରିପୋର୍ଟ ପ୍ରଦାନରେ ଅସମର୍ଥ ରହିଥିବାରୁ ଏହାକୁ ନିଲମ୍ବନ କରାଯାଇଛି। ସମୁଦାୟ ୭ ମହାସଂଘ ନିଲମ୍ବିତ ହୋଇଥିବା ବେଳେ ଏହି ରାଷ୍ଟ୍ରର ବକ୍ସରମାନେ ବିଭିନ୍ନ ଆଇବିଏ ଇଭେଣ୍ଟରେ ଅଂଶଗ୍ରହଣ କରିପାରିବେ। ଆଇବିଏ କ୍ରୀଡା ବିଭାଗ ଦ୍ୱାରା ପଞ୍ଜୀକୃତ ଆଥ୍ଲେଟମାନେ ଅଂଶଗ୍ରହଣ କରିପାରିବେ ବୋଲି କୁହାଯାଇଛି। ଏହା ସହିତ ଭବିଷ୍ୟତରେ ଅଲିମ୍ପିକ୍ସରେ ବକ୍ସିଂର ଭବିଷ୍ୟତକୁ ନେଇ ମଧ୍ୟ ଆଶଙ୍କା ଦେଖାଦେଇଛି। ୨୦୨୮ ଲସ ଏଞ୍ଜେଲେସ୍ ଅଲିମ୍ପିକ୍ସରେ ବକ୍ସିଂ ଇଭେଣ୍ଟକୁ ସାମିଲ କରାଯାଇ ନାହିଁ। ଆଇବିଏ ପୂର୍ବରୁ ଏଆଇବିଏ ନାମରେ ରହିଥିବା ବେଳେ ୨୦୧୯ରେ ଅଲିମ୍ପିକ୍ସ କମିଟି ପକ୍ଷରୁ ଏହାକୁ ନିଲମ୍ବନ କରାଯାଇଥିଲା। ପ୍ରଥମେ ଟୋକିଓ ଅଲିମ୍ପିକ୍ସରେ ଆଇବିଏ ହାତରୁ ଆୟୋଜନ ଅଧିକାର ଛଡାଇ ନିଆଯାଇଥିବା ବେଳେ ପ୍ୟାରିସ୍ ଅଲିମ୍ପିକ୍ସରେ ମଧ୍ୟ ସମାନ ବ୍ୟବସ୍ଥା କରାଯାଇଛି।
