ଇମ୍ଫାଲ, ୮ା୭: ମଣିପୁର ବିଷ୍ଣୁପୁର ଜିଲାର ବିଭିନ୍ନ ସ୍ଥାନରେ ଗୁଳି ବିନିମୟ ଘଟି ଜଣେ ପୋଲିସ କମାଣ୍ଡୋଙ୍କ ସମେତ ୪ ଜଣଙ୍କ ମୃତ୍ୟୁ ହୋଇଛି। ଏହି ହିଂସାକାଣ୍ଡରେ ଅନ୍ୟ କେତେଜଣ ଆହତ ହୋଇଛନ୍ତି। ଗୁରୁବାର ରାତି ୧ଟା ୩୦ରେ ମେଇତି ବହୁଳ ବିଷ୍ଣୁପୁରର ଆଓ୍ବଙ୍ଗ ଲେଇକେଇ ଏବଂ କୁକି ବହୁଳ ଚୁରାଚାନ୍ଦପୁର ଜିଲାର କାଙ୍ଗଭାଇ ମଧ୍ୟରେ ଗୁଳିବିନିମୟ ହୋଇଥିଲା। ଏହି ଗୁଳିକାଣ୍ଡରେ ଚୁରାଚାନ୍ଦପୁରରୁ ୨ ଜଣ ଏବଂ ବିଷ୍ଣୁପୁରରୁ ଜଣେ ପ୍ରାଣ ହରାଇଛନ୍ତି। ଆହତମାନେ ଚୁରାଚାନ୍ଦପୁର ହସ୍ପିଟାଲରେ ଭର୍ତ୍ତି ହୋଇଛନ୍ତି। ମୃତକଙ୍କ ମଧ୍ୟରେ ଯୁକ୍ତଦୁଇ ପାସ୍ କରିଥିବା ଜଣେ ଛାତ୍ର ରହିଛନ୍ତି। ଏହି ଘଟଣାରେ ଶତାଧିକ ସ୍ଥାନୀୟ ଲୋକେ ଓ ଉକ୍ତ ଛାତ୍ର ପଢ଼ୁଥିବା ସ୍କୁଲ୍ର ପିଲାମାନେ ଶୁକ୍ରବାର ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିଥିଲେ। ଅପରାହ୍ନରେ ସେହି ଅଞ୍ଚଳରେ ପୁନର୍ବାର ଗୁଳିବିନିମୟ ଘଟି ଜଣେ ଆହତ ହୋଇଛନ୍ତି। ଶୁକ୍ରବାର ସନ୍ଧ୍ୟାରେ ମୋଇରାଙ୍ଗ ଟୁରେଲ ମାପାନଠାରେ ସନ୍ଦିଗ୍ଧ ଉଗ୍ରପନ୍ଥୀ ଓ ପୋଲିସ ମଧ୍ୟରେ ଗୁଳି ବିନିମୟ ବେଳେ ଜଣେ କମାଣ୍ଡୋ ନିହତ ହୋଇଛନ୍ତି। ମୃତ ପୋଲିସ କମାଣ୍ଡୋ ପୁଖ୍ରାମବାମ ରଣବୀରଙ୍କ ମୁଣ୍ଡରେ ଗୁଳି ବାଜିଥିଲା। ତାଙ୍କୁ ପ୍ରଥମେ ଜିଲା ହସ୍ପିଟାଲ ଓ ପରେ ଇମ୍ଫାଲ ହସ୍ପିଟାଲ ନିଆଯାଉଥିବାବେଳେ ବାଟରେ ମୃତ୍ୟୁ ହୋଇଥିଲା। ଗତ ମେ’ ୩ରୁ ମଣିପୁରରେ ହିଂସାକାଣ୍ଡ ଲାଗିରହିଥିବାବେଳେ ଶତାଧିକ ଲୋକଙ୍କ ଜୀବନ ଗଲାଣି ଓ ୩,୦୦୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ହିଂସାକୁ ନିୟନ୍ତ୍ରଣ କରିବା ସହ ଉତ୍ତରପୂର୍ବାଞ୍ଚଳ ରାଜ୍ୟରେ ସ୍ବାଭାବିକ ଅବସ୍ଥା ଫେରାଇ ଆଣିବା ପାଇଁ ୪୦,୦୦୦ କେନ୍ଦ୍ରୀୟ ସୁରକ୍ଷା ଯବାନ ଓ ମଣିପୁର ପୋଲିସ ନିୟୋଜିତ ହୋଇଛନ୍ତି।
