ଜଗତ୍ସିଂହପୁର ଅଫିସ, ୨୦।୮: ଜଗତ୍ସିଂହପୁର ଜିଲା ପ୍ରଶାସନର ଆକଳନ ଅନୁଯାୟୀ, ଶୁକ୍ରବାର ସୁଦ୍ଧା ଜିଲାର ୧୫୯ ପଞ୍ଚାୟତ ଅନ୍ତର୍ଗତ ୬୨୦ଟି ଗ୍ରାମର ୩୯,୭୯୩ ଲୋକ, ୧୭,୭୬୦ ଗୋସମ୍ପଦ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି। ସେଥିମଧ୍ୟରୁ ୨୫ଟି ଗାଁ ଜଳାର୍ଣ୍ଣବ ହୋଇଥିବେଳେ ସେଠାରେ ଥିବା ୧୭,୫୭୮ ଲୋକ ପ୍ରଭାବିତ ହୋଇଛନ୍ତି। ୪୨ଟି କଚାଘର ଓ ୩୬ଟି ଗୁହାଳ କ୍ଷତିଗ୍ରସ୍ତ ହୋଇଛି। ୧୦,୨୭୬ ହେକ୍ଟର ଜମି ଜଳମଗ୍ନ ହୋଇଯାଇଛି। ସେଥିରୁ ଉଦ୍ୟାନ କୃଷିର ୯୬ ହେକ୍ଟର ଜମିରେ ହୋଇଥିବା ପନିପରିବା ଚାଷ ନଷ୍ଟ ହୋଇଯାଇଛି। ଜିଲା ପ୍ରଶାସନ ପକ୍ଷରୁ ଏପର୍ଯ୍ୟନ୍ତ ୧୫,୨୮୮ ଲୋକଙ୍କୁ ମାଗଣା ରନ୍ଧା ଖାଦ୍ୟ ଯୋଗାଇ ଦିଆଯାଇଥିବାବେଳେ ୧୬୧.୨ କୁଇଣ୍ଟାଲ ଚୁଡା, ୪୦.୫୯ କୁଇଣ୍ଟାଲ ଗୁଡ଼ ବଣ୍ଟନ କରାଯାଇଛି। ୧୪ଟି ମେଡିକାଲ ଓ ୧୯ଟି ପ୍ରାଣୀ ସମ୍ପଦ ବିଭାଗର ଡାକ୍ତରୀ ଦଳ ନିୟୋଜିତ ହୋଇଛନ୍ତି। ୬୯୪ ରୋଲ ପଲିଥିନ ବଣ୍ଟନ ହୋଇପାରିଛି। ମୋଟାମୋଟି ଭାବେ ଜିଲା ପ୍ରଶାସନ ପକ୍ଷରୁ ବନ୍ୟାଞ୍ଚଳରେ ରିଲିଫ୍ ଓ ଉଦ୍ଧାର କାର୍ଯ୍ୟ ତ୍ୱରାନ୍ବିତ କରାଯାଇଥିବା ସୂଚନା ଦିଆଯାଇଛି। ଜିଲାପାଳ ପାରୁଲ ପଟାୱରୀ ଶୁକ୍ରବାର ଅପରାହ୍ନରେ କୁଜଙ୍ଗ ବ୍ଲକର ଜିଲାନାସୀ, ଜୟଶଙ୍ଖପୁର, ତେନ୍ତୁଳିଆ, ବରିହାଡିହା ଅଞ୍ଚଳ ଗସ୍ତ କରି ବନ୍ୟା ପ୍ରପୀଡିତଙ୍କ ଅଭାବ, ଅସୁବିଧା ବୁଝିଥିଲେ। ଜିଲାର ୮ ବ୍ଲକରେ ପ୍ରଶାସନ ପକ୍ଷରୁ ଶୁଖିଲା, ରନ୍ଧା ଖାଦ୍ୟ ଆଶ୍ରୟସ୍ଥଳରେ ଥିବା ଲୋକଙ୍କୁ ପ୍ରଦାନ କରାଯାଇଛି। ଏଥିସହ ଗୋସମ୍ପଦଙ୍କୁ ଗୋଖାଦ୍ୟ ଯୋଗାଇବା ପ୍ରକ୍ରିୟା ଚାଲିଛି। ତହସିଲଦାରମାନେ ପଲିଥିନ ବଣ୍ଟନ ଦାୟିତ୍ୱରେ ଅଛନ୍ତି। ରିଲିଫ କାର୍ଯ୍ୟରେ ଜନପ୍ରତିନିଧିଙ୍କ ସହାୟତାରେ ଅଧିକାରୀମାନେ କାର୍ଯ୍ୟ କରୁଛନ୍ତି। ୩ଟି ମୋବାଇଲ ୱାଟର ଟ୍ରିଟ୍ମେଣ୍ଟ ପ୍ଲାଣ୍ଟ ସ୍ଥାପନ କରାଯାଇ ପାନୀୟ ଜଳ ପାଉଚ ମାଧ୍ୟମରେ ଯୋଗାଣ ବ୍ୟବସ୍ଥା ହେଉଛି। ସ୍ବାସ୍ଥ୍ୟ, ପ୍ରାଣୀ ସମ୍ପଦ ବିଭାଗ ପକ୍ଷରୁ ଶିବିର ମାଧ୍ୟମରେ ଲୋକ ଓ ଗୋ ସମ୍ପଦକଙ୍କ ପାଇଁ ଔଷଧ ଯୋଗାଇ ଦିଆଯାଉଛି। ୩ ଦିନ ହେବ ବରିଷ୍ଠ ଅଧିକାରୀମାନେ ରିଲିଫ ଓ ଉଦ୍ଧାର କାର୍ଯ୍ୟ ପରିଚାଳନା କରୁଛନ୍ତି। ଏନ୍ଡିଆର୍ଏଫ୍, ଓଡ୍ରାଫ୍ ଓ ଅଗ୍ନିଶମ ବାହିନୀ ସହ ଗ୍ରାମୀଣ ଜଳ ଯୋଗାଣ ଓ ପରିମଳ, ସ୍ବାସ୍ଥ୍ୟ, ପ୍ରାଣୀ ସମ୍ପଦ, ପଞ୍ଚାୟତିରାଜ ବିଭାଗ କର୍ମଚାରୀମାନେ ଦାୟିତ୍ୱରେ ଅଛନ୍ତି। ମୁଖ୍ୟମନ୍ତ୍ରୀ ୧୬ଦିନ ପାଇଁ ରିଲିଫ୍ ପାଇଁ ନିର୍ଦ୍ଦେଶ ଦେଇଥିବାରୁ ଏହା ପହଞ୍ଚାଇବା ଉପରେ ଗୁରୁତ୍ୱାରୋପ କରାଯାଉଛି। ଜଗତ୍ସିଂହପୁର ଦୁଗ୍ଧ ଉତ୍ପାଦନରେ ୧ନମ୍ବର ଥିବାରୁ ଗୋ ସମ୍ପଦର ସୁରକ୍ଷା ଉପରେ ପ୍ରାଧାନ୍ୟ ଦେବାକୁ ଜିଲାପାଳ ପରାମର୍ଶ ଦେଇଛନ୍ତି।
