ଭୁବନେଶ୍ୱର,୨୪।୪(ବ୍ୟୁରୋ): ସହରାଞ୍ଚଳ ବାସହୀନ ଓ ଆର୍ଥିକ ଦୁର୍ବଳ ଶ୍ରେଣୀ ପାଇଁ ଘୋଷଣା ହୋଇଥିବା ‘ଜାଗା ମିଶନ’ ସହିତ ସମସ୍ତଙ୍କ ପାଇଁ ଘର ଯୋଜନାର ସଫଳ ରୂପାୟନ ଲାଗି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ବିଶେଷ ପଦକ୍ଷେପ ଗ୍ରହଣ କରିଛନ୍ତି। ମୁଖ୍ୟ ଶାସନ ସଚିବ ଶୁକ୍ରବାର ୩୬,୦୬୨ ପରିବାରଙ୍କ ଲାଗି ନୂତନ ପକ୍କାଘର ମଞ୍ଜୁର କରିଛନ୍ତି। ଲୋକସେବା ଭବନରୁ ଡିଜିଟାଲ ମୋଡ୍ରେ ଅନୁଷ୍ଠିତ ସହରାଞ୍ଚଳ ହାଉସିଂ ମିଶନର ରାଜ୍ୟସ୍ତରୀୟ ମଞ୍ଜୁରୀ କମିଟରେ ଏହି ଅନୁମୋଦନ ଦିଆଯାଇଛି। ଏହି ବୈଠକରେ ଗୃହ ଓ ନଗର ଉନ୍ନୟନ ବିଭାଗ ସଚିବ ଜି ମାଥିଭାଥାନାନ ଆବାସ ଯୋଜନାର କାର୍ଯ୍ୟାନ୍ବୟନ ସମ୍ବନ୍ଧିତ ଆର୍ଥିକ ଓ ପ୍ରଶାସନିକ ବିଷୟ ଆଲୋଚନା ଲାଗି ତଥ୍ୟ ଉପସ୍ଥାପିତ କରିଛନ୍ତି। ବର୍ତ୍ତମାନ ରାଜ୍ୟର ୧୧୪ ସହରାଞ୍ଚଳରେ ୧,୫୫,୦୬୮ ପରିବାରକୁ ଘର ଦିଆଯାଇସାରିଛି। ଏଥି ମଧ୍ୟରୁ ୬୪,୦୦୫ ଘର ନିର୍ମାଣ ପୂର୍ଣ୍ଣାଙ୍ଗ ହୋଇଛି। ଅବଶିଷ୍ଟ ଘରର ନିର୍ମାଣ ତ୍ୱରାନ୍ବିତ ଗତିରେ ଚାଲୁ ରହିଛି। ୭୬ଟି ସହରାଞ୍ଚଳ ପାଇଁ ଏହି ନୂତନ ପ୍ରକଳ୍ପ ମଞ୍ଜୁର କରିବା ସହିତ ସର୍ଭେ ମାଧ୍ୟମରେ ଚିହ୍ନଟ ସମସ୍ତ ପରିବାରକୁ ଶୀଘ୍ର ଘର ଯୋଗାଇବା ନିମନ୍ତେ କାର୍ଯ୍ୟ ଖସଡ଼ା ପ୍ରସ୍ତୁତ କରିବା ପାଇଁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି।
ବିଭାଗୀୟ ସ୍ବତନ୍ତ୍ର ଶାସନ ସଚିବ ସୁରେଶ ଚନ୍ଦ୍ର ଦଳାଇ କହିଛନ୍ତି, ବର୍ତ୍ତମାନ ସୁଦ୍ଧା ଜାଗା ମିଶନରେ ଲକ୍ଷେ ୫ ହଜାର ଲୋକଙ୍କୁ ‘ଲ୍ୟାଣ୍ଡ ଏଣ୍ଟାଇଟିଲ୍ମେଣ୍ଟ ସାର୍ଟିଫିକେଟ’ ଏବଂ ୬୫ ହଜାର ପରିବାରଙ୍କୁ ‘ଲ୍ୟାଣ୍ଡ ରାଇଟସ୍ ସାର୍ଟିଫିକେଟ’ ଦିଆଯାଇଛି। ଏବେ ପର୍ଯ୍ୟନ୍ତ ୨୦ ହଜାର ପରିବାରଙ୍କୁ ଘର ଯୋଗାଇ ଦିଆଯାଇଥିବା ସେ ସୂଚୀତ କରିଥିଲେ। ଏହି ଅବସରରେ ମାଧିଭାଥାନନ୍ କହିଛନ୍ତି, ଏହି ଯୋଜନାରେ ସାଧାରଣତଃ ୩ଟି ମୋଡ୍ରେ ଘର ଯୋଗାଇ ଦିଆଯାଏ। ନୂଆ ନୁମୋଦିତ ଘର ମଧ୍ୟରୁ ୭୨ଟି ସହରାଞ୍ଚଳରେ ୧୬,୪୬୩ଟି ଘର ହିତାଧିକାରୀଙ୍କ ଦ୍ୱାରା ନିର୍ମାଣ ହେବ।
