ନୂଆଦିଲ୍ଲୀ, ୨୨।୯ : ଆର୍ଥିକ ଦୃଷ୍ଟିରୁ ଦୁର୍ବଳ ବିଭାଗକୁ ଦିଆଯାଇଥିବା ୧୦ ପ୍ରତିଶତ ଇଡବ୍ଲୁଏସ ସଂରକ୍ଷଣକୁ ଚ୍ୟାଲେଞ୍ଜ କରୁଥିବା ଆବେଦନ ଉପରେ ସମ୍ପ୍ରତି ସୁପ୍ରିମକୋର୍ଟରେ ଏକ ଜୋରଦାର ବିତର୍କ ଚାଲିଛି। ଗୋଟିଏ ପଟେ ଏହି ସଂରକ୍ଷଣକୁ ଚ୍ୟାଲେଞ୍ଜ କରୁଥିବା ଆବେଦନଗୁଡିକରେ କୁହାଯାଇଛି ଯେ ଏହି ବ୍ୟବସ୍ଥା ସମ୍ବିଧାନର ବିରୋଧୀ।
ଏଥି ସହିତ ସରକାର କୋର୍ଟରେ କହିଛନ୍ତି ଯେ ସମ୍ବିଧାନର କୌଣସି ସ୍ଥାନରେ ଉଲ୍ଲେଖ ନାହିଁ ଯେ ସଂରକ୍ଷଣର ଆଧାର ଅଥନୈତିକ ହୋଇପାରିବ ନାହିଁ। କେବଳ ଏତିକି ନୁହେଁ, ବୁଧବାର ଏହି ପ୍ରସଙ୍ଗରେ ଜବାବ ଦେବାବେଳେ ଆଟର୍ନି ଜେନେରାଲ କେ.କେ. ଭେନୁଗୋପାଲ ଏବଂ ସୋଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ ଏହି ସଂରକ୍ଷଣ ପାଇଁ ସମ୍ବିଧାନର ୧୦୩ ତମ ସଂଶୋଧନ ସଂପୂର୍ଣ୍ଣ ସଠିକ ଅଟେ।
ସେ କହିଛନ୍ତି ଯେ ସମ୍ବିଧାନର ଧାରା ୪୬ ଅନୁଯାୟୀ ଏହି ସଂଶୋଧନ କରାଯାଇଛି ଯେଉଁଥିରେ କୁହାଯାଇଛି ଯେ ଲୋକଙ୍କ ଦୁର୍ବଳ ବର୍ଗର ଶିକ୍ଷାଗତ ତଥା ଅର୍ଥନୈତିକ ସ୍ବାର୍ଥ ପାଇଁ ସରକାର ପଦକ୍ଷେପ ନେବା ଉଚିତ। କେବଳ ଏତିକି ନୁହେଁ, ସରକାରଙ୍କ ପ୍ରତିନିଧିତ୍ୱ କରୁଥିବା ବରିଷ୍ଠ ଆଇନଜୀବୀମାନେ କହିଛନ୍ତି ଯେ ଏସସି, ଏସଟି ଏବଂ ଓବିସି ବର୍ଗର ଲୋକମାନେ ଇଡବ୍ଲୁଏସ ସଂରକ୍ଷଣ ନେଇ କୌଣସି ସମସ୍ୟାର ସମ୍ମୁଖୀନ ହେବା ଉଚିତ ନୁହେଁ। ଏହା ସେମାନଙ୍କ ଉପରେ ପ୍ରଭାବ ପକାଇବ ନାହିଁ କାରଣ ସେମାନଙ୍କର ସଂରକ୍ଷଣ ପୂର୍ବପରି ଜାରି ରହିବ। ସେ କହିଛନ୍ତି ଯେ ସଂରକ୍ଷିତ ଆସନ ପାଇଁ ୫୦ ପ୍ରତିଶତ ମଧ୍ୟରୁ ଅର୍ଥନୈତିକ ଦୁର୍ବଳ ବିଭାଗ ପାଇଁ ୧୦ ପ୍ରତିଶତ ସଂରକ୍ଷଣ ଦିଆଯାଇଛି।
ରିପୋର୍ଟ ଅନୁଯାୟୀ, ଏହି ସମୟ ମଧ୍ୟରେ ସରକାର ବଡ଼ ତଥ୍ୟ ଦେଇଥିଲେ ଏବଂ କହିଥିଲେ ଯେ ସାଧାରଣ ବର୍ଗର ୫.୮ କୋଟି ଲୋକ ଦେଶରେ ଦାରିଦ୍ର ସୀମାରେଖା(ବିପିଏଲ) ତଳେ ଅଛନ୍ତି। ଏହା ବ୍ୟତୀତ ସାଧାରଣ ବର୍ଗର ୩୫ ପ୍ରତିଶତ ଲୋକ ଅଛନ୍ତି, ଯେଉଁମାନେ ଭୂମିହୀନ ଏବଂ ଏହି ସଂରକ୍ଷଣ କେବଳ ସେମାନଙ୍କ ପାଇଁ ଉଦ୍ଦିଷ୍ଟ । ସରକାର କହିଛନ୍ତି ଯେ ସାଧାରଣ ବର୍ଗରେ ଅନେକ ପିଲାଙ୍କୁ ପାଠ ପଢ଼ିବା ବୟସରେ ଚାଷ ଜମି ଏବଂ କାରଖାନାଗୁଡ଼ିକରେ କାମ କରିବାକୁ ପଡୁଛି। ଏହାର କାରଣ ହେଉଛି ଦାରିଦ୍ର୍ୟତା । ଏହାଯୋଗୁ ସେମାନେ ବିଦ୍ୟାଳୟକୁ ଯାଇପାରୁ ନାହାନ୍ତି।
ଏପରିସ୍ଥଳେ ସରକାର ସେମାନଙ୍କୁ ସାହାଯ୍ୟ କରିବାକୁ ବାଧ୍ୟ। ସୋଲିସିଟର ଜେନେରାଲ କହିଛନ୍ତି ଯେ ଦାରିଦ୍ର୍ୟକୁ ଦୃଷ୍ଟିରେ ରଖି ସରକାର ଏହାକୁ ଆଣିଛନ୍ତି। ଏହି ପରିପ୍ରେକ୍ଷୀରେ ଏହା କେବଳ ପରୀକ୍ଷା କରାଯିବା ଉଚିତ ଯେ ଏହା ସମ୍ବିଧାନର ମୌଳିକ ଢାଞ୍ଚାକୁ ଉଲ୍ଲଂଘନ କରୁଛି କି ନାହିଁ।
