ଭଞ୍ଜନଗର,୧୭ା୨(ବାବୁଲା ପ୍ରଧାନ): ଭଞ୍ଜନଗର କୃଷି ବିଜ୍ଞାନ କେନ୍ଦ୍ରର ୩୪ତମ ବୈଜ୍ଞାନିକ ଉପଦେଷ୍ଟା ମଣ୍ଡଳୀ ବୈଠକ ମଙ୍ଗଳବାର ଅନୁଷ୍ଠିତ ହୋଇଯାଇଛି। ବୈଠକରେ ବୈଜ୍ଞାନିକ ଏବଂ ଚାଷୀମାନେ ଯୋଗଦେଇଥିଲେ। କୃଷି କ୍ଷେତ୍ରରେ କିଭଳି ଉତ୍ପାଦନ ବୃଦ୍ଧି ପାଇବ ସେ ଉପରେ ଆଲୋଚନା ହୋଇଥିଲା। ବୈଜ୍ଞାନିକ ଓ କୃଷକ ମଧ୍ୟରେ ସମନ୍ବୟ ରହିଲେ କୃଷି ଉତ୍ପାଦନ ବୃଦ୍ଧି ପାଇବ ଓ କୃଷକମାନଙ୍କ ଆର୍ଥିକ ଉନ୍ନତି ହେବ। ତେଣୁ ଚାଷୀମାନେ ପରିବର୍ତ୍ତିତ ଜଳବାୟୁ ସହ ଖାପ ଖୁଆଇଲା ଭଳି ଉନ୍ନତ ଜ୍ଞାନ କୌଶଳ ପ୍ରୟୋଗ କରି ଚାଷ କାର୍ଯ୍ୟ କରିବା ଉପରେ ବୈଠକରେ ବକ୍ତାମାନେ ମତବ୍ୟକ୍ତ କରିଥିଲେ। ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ ସମ୍ପ୍ରସାରଣ ନିର୍ଦ୍ଦେଶାଳୟର ଅଧକ୍ଷ ପ୍ରଫେସର୍ ପ୍ରସନ୍ନଜିତ୍ ମିଶ୍ର ବୈଠକରେ ଅନଲାଇନ ମାଧ୍ୟମରେ ଅଧ୍ୟକ୍ଷତା କରିଥିଲେ।
ଓଡ଼ିଶା କୃଷି ଓ ବୈଷୟିକ ବିଶବିଦ୍ୟାଳୟ ସମ୍ପ୍ରସାରଣ ନିର୍ଦ୍ଦେଶାଳୟର ଉପ ନିର୍ଦ୍ଦେଶକ ଡ. ସନତ କୁମାର ଦ୍ୱିିବେଦୀ ସଭାକୁ ସଂଯୋଜନା କରିଥିଲେ। ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ ଆଳୁ ଗବେଷଣା କେନ୍ଦ୍ରର ଅଧିକାରୀ ପ୍ରଫେସର ଡ. ଅଶୋକ କୁମାର ମିଶ୍ର, କନ୍ଧମାଳ କୃଷି ବିଜ୍ଞାନ କେନ୍ଦ୍ରର ମୁଖ୍ୟ ଡ. ନାରାୟଣ ବାର ଓ ବ୍ରହ୍ମପୁର କୃଷି ବିଜ୍ଞାନ କେନ୍ଦ୍ରର ମୁଖ୍ୟ ଡ ସୁଜିତ କୁମାର ନାଥ, ଗଞ୍ଜାମ ଜିଲା ମୁଖ୍ୟ କୃଷି ଅଧିକାରୀ ଡ ଅଜୟ କୁମାର କର, ଭୁବନେଶ୍ୱର ଉଦ୍ୟାନ ଗବେଷଣା କେନ୍ଦ୍ରର ଡ ଗୋବିନ୍ଦ ଆଚାର୍ଯ୍ୟ, କୋଲକାତା କୃଷି ବିଜ୍ଞାନ କେନ୍ଦ୍ରର ଡ. କଲ୍ୟାଣ ସୁନ୍ଦର ଦାସ, ଉପଖଣ୍ଡ ପ୍ରାଣୀ ଚିକିତ୍ସା ଅଧିକାରୀ ଡା. ଗଣେଶ ଚନ୍ଦ୍ର ମହାନ୍ତି, ଜି, ଉଦୟଗିରି କୃଷି ଗବେଷଣା କେନ୍ଦ୍ରର ମୁଖ୍ୟ ଡ. ଜ୍ଞାନଲୋକ ଦାସ, ଭଞ୍ଜନଗର ଜିଲା କୃଷି ଅଧିକାରୀ ବ୍ୟୋମକେଶ ମିଶ୍ର, ସହକାରୀ ଉଦ୍ୟାନବିତ୍ ଇତିଶ୍ରୀ ପ୍ରିୟଦର୍ଶିନୀ, ସହକାରୀ ମତ୍ସ୍ୟ ଅଧିକାରୀ ଏସ ପାତ୍ର ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ଭଞ୍ଜନଗର କୃଷି ବିଜ୍ଞାନ କେନ୍ଦ୍ର ମୁଖ୍ୟ ଡ. ସୂତନୁ ଶତପଥି ସ୍ବାଗତ ଭାଷଣ ଦେଇଥିଲେ। ୨୦୨୬-୨୭ରେ କ’ଣ ସବୁ କାର୍ଯ୍ୟକ୍ରମ ହେବ ସେନେଇ ଖସଡ଼ା ପ୍ରସ୍ତୁତ ହୋଇଥିଲା । ବରିଷ୍ଠ ବୈଜ୍ଞାନିକ ଡ ସନ୍ତୋଷ କୁମାର ସାମନ୍ତରାୟ, ଡ ସିଦ୍ଧାର୍ଥ ରଣବିଜୁଳି, ଡ ଅନିତା ପାତ୍ର, ବୈଜ୍ଞାନିକ,ଏମ ଦିବ୍ୟନାଥ, ପାଣିପାଗ ବିଶେଷଜ୍ଞ ସ୍ବାତୀ ସ୍ବୟଂପ୍ରଭା ପ୍ରଧାନ ପ୍ରମୁଖ ଆଲୋଚନାରେ ଭାଗନେଇ ସମନ୍ବିତ ଚାଷ, ଉନ୍ନତ ପ୍ରଣାଳୀରେ କଦଳୀ ଏବଂ ପିଜୁଳି ଚାଷ, ପାକଶାଳା ବଗିଚା, ଛତୁ ଚାଷ, କୁକୁଡ଼ା, ଛେଳି, ମେଣ୍ଢା ,ଫୁଲ ଚାଷ ଦ୍ୱାରା କିଭଳି ଚାଷୀଙ୍କ ଆୟ ବୃଦ୍ଧି ହେବ ତାହା ଉପରେ କହିଥିଲେ। ହାତୀ ମହୁମାଛିକୁ ଭୟ କରେ, ତେଣୁ ଯେଉଁ ଅଞ୍ଚଳରେ ହାତୀ ଉପଦ୍ରବ ହେଉଛି ସେହି ଅଞ୍ଚଳରେ ମହୁମାଛି ଚାଷ କରିବା ପାଇଁ ବନ ବିଭାଗ ପକ୍ଷରୁ ପରାମର୍ଶ ଦିଆଯାଇଥିଲା। ହଳଦୀ ଚାଷ, କନ୍ଦମୂଳ ଜାତୀୟ ଫସଲ ଏବଂ ପ୍ରାକୃତିକ କୃଷି ର ପ୍ରଚାର ଏବଂ ପ୍ରସାର ଦିଗରେ ମଧ୍ୟ ଦୃଷ୍ଟି ଦେବାକୁ ବକ୍ତାମାନେ କହିଥିଲେ। ଶେଷରେ ଅତିଥି ମାନଙ୍କ ଦ୍ବାରା କୃଷି ବିଜ୍ଞାନ କେନ୍ଦ୍ରର ସ୍ମରଣିକା ଉନ୍ମୋଚିତ ହୋଇଛି। ଶିତିକଣ୍ଠ ମିଶ୍ର,ପୂଜାରଣି ବିଷୋୟୀ, ବନଜା ତ୍ରିପାଠୀ, ଜ୍ୟୋତି ରଞ୍ଜନ ଦାସ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
