ସାରସକଣା,୨।୫: ମୟୂରଭଞ୍ଜ ଜିଲା ଝାରପୋଖରିଆ ସ୍ଥିତ ସୀମାନ୍ତ ମହାବିଦ୍ୟାଳୟ କ୍ୱାରେଣ୍ଟିନ୍ ସେଣ୍ଟରରୁ ୩୪ ପ୍ରବାସୀ ଫେରାର ହୋଇଯାଇଛନ୍ତି। ଏନେଇ ସାରସକଣା ବିଡ଼ିଓ ସଂଗ୍ରାମ କେଶରୀ ଭୋଳ ୨ ଜଣ ପ୍ରବାସୀଙ୍କ ନାଁରେ ଥାନାରେ ଏତଲା ଦେଇଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ.୧୦୬/୨୧) ରୁଜୁ କରି ତଦନ୍ତ ଜାରି ରଖିଛି। ଫେରାର ସମସ୍ତ ପ୍ରବାସୀ ପଶ୍ଚିମବଙ୍ଗ ଫେରନ୍ତା ବୋଲି ସୂଚନା ମିଳିଛି।
ପଶ୍ଚିମବଙ୍ଗରେ କରୋନା ସଂକ୍ରମଣ ବୃଦ୍ଧି ପାଇଥିବାରୁ ଓଡ଼ିଶା ପକ୍ଷରୁ ସୀମାନ୍ତରେ ଯାଞ୍ଚ ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ପଶ୍ଚିମବଙ୍ଗରୁ ଫେରୁଥିବା ଲୋକମାନଙ୍କୁ ଝାରପୋଖରିଆ ସ୍ଥିତ ସୀମାନ୍ତ ମହାବିଦ୍ୟାଳୟରେ ଖୋଲାଯାଇଥିବା କ୍ୱାରେଣ୍ଟିନ୍ ସେଣ୍ଟରେ ୭ଦିନ ପାଇଁ ରଖିବାର ବ୍ୟବସ୍ଥା କରାଯାଇଛି। ଶୁକ୍ରବାର ଏହି କେନ୍ଦ୍ରରୁ ୨ ପଶ୍ଚିମବଙ୍ଗ ଫେରନ୍ତା ଫେରାର ହୋଇଯାଇଥିଲେ। ଘଟଣାର ୨୪ ଘଣ୍ଟା ପରେ ବିଡିଓ ଥାନାରେ ଏତଲା ଦେଇଥିଲେ। ଏପରିକି ଆଉ ୩୨ଜଣ ପ୍ରବାସୀ ସେଠାରୁ ଫେରାର ହୋଇଯାଇଥିବା ସୂଚନା ମିଳିଛି। ଏ ସଂକ୍ରାନ୍ତରେ ବିଡିଓଙ୍କୁ ପଚାରିବାରୁ ସେ ଜାଣି ନାହାନ୍ତି ବୋଲି କହିଛନ୍ତି। ପିଡି ଡିଆର୍ଡିଏ ଭବେଶ କୁମାର ନାୟକଙ୍କୁ ପଚାରିବାରୁ ୩୨ଜଣ ଫେରାର ହେବା ସମ୍ବନ୍ଧରେ ଅବଗତ ଅଛି। ଏ ବାବଦରେ ଥାନାରେ ଅଭିଯୋଗ କରିବାକୁ ବିଡ଼ିଓଙ୍କୁ କହିଛି, ମାତ୍ର ସେ କ’ଣ ପାଇଁ ଏତଲା ଦେଇନାହାନ୍ତି ପଚାରି ବୁଝିବେ ବୋଲି କହିଛନ୍ତି।
