ଓ୍ବାଶିଂଟନ,୧୮।୪ : ଭାରତରେ ସମଲିଙ୍ଗୀ ବିବାହ ପ୍ରସଙ୍ଗରେ ସୁପ୍ରିମକୋର୍ଟରେ ଶୁଣାଣି ଚାଲିଛି। ବଡ ବେଞ୍ଚରେ କେନ୍ଦ୍ର ସରକାର, ରାଜ୍ୟ ସରକାରଙ୍କ ବ୍ୟତୀତ ଅନ୍ୟ ସମସ୍ତ ଆବେଦନ ଉପରେ ଶୁଣାଣି ଜାରି ରହିଛି। ଯଦିଓ ସମଲିଙ୍ଗୀ ସମ୍ପର୍କ ଭାରତରେ ଆଉ ଅପରାଧ ନୁହେଁ, ତଥାପି ସମଲିଙ୍ଗୀ ବିବାହ ଦେଶରେ ସ୍ବୀକୃତିପ୍ରାପ୍ତ ନୁହେଁ। ପୃଥିବୀର ୩୪ଟି ଦେଶ ଅଛି ଯେଉଁଠାରେ ସମଲିଙ୍ଗୀ ବିବାହକୁ ମାନ୍ୟତା ମିଳିଛି। ତଥାପି, କେତେକ ଦେଶରେ ସମଲିଙ୍ଗୀ ବିବାହକୁ ସର୍ତ୍ତମୂଳକ ଭାବେ ଅନୁମୋଦନ ମିଳିଛି। କେତେକ ଦେଶରେ ସଂସଦ ଆଇନ ପ୍ରଣୟନ କରିଥିବାବେଳେ କେତେକ ଦେଶରେ ସମଲିଙ୍ଗୀ ବିବାହକୁ କୋର୍ଟଙ୍କ ନିର୍ଦ୍ଦେଶ ପରେ ଅନୁମୋଦନ କରାଯାଇଥିଲା।
କ୍ୟୁବା, ଆଣ୍ଡୋରା, ସ୍ଲୋଭେନିଆ, ଚିଲି, ସ୍ବିଜରଲାଣ୍ଡ, କୋଷ୍ଟାରିକା, ଅଷ୍ଟ୍ରିଆ, ତାଇୱାନ, ଇକ୍ୟୁଏଡର୍, ବେଲଜିୟମ, ବ୍ରିଟେନ, ଡେନମାର୍କ, ଫିନଲାଣ୍ଡ, ଫ୍ରାନ୍ସ, ଜର୍ମାନୀ, ଆଇସଲାଣ୍ଡ, ଆୟର୍ଲାଣ୍ଡ, ଲକ୍ସେମବର୍ଗ, ମାଲ୍ଟା, ନରୱେ, ପର୍ତ୍ତୁଗାଲ, ସ୍ପେନ, ସ୍ବିଡେନ, ମେକ୍ସିକୋ, ଦକ୍ଷିଣ ଆଫ୍ରିକା, ଆମେରିକା, କଲମ୍ବିଆ, ବ୍ରାଜିଲ, ଆର୍ଜେଣ୍ଟିନା, କାନାଡା, ନେଦରଲାଣ୍ଡ, ନ୍ୟୁଜିଲାଣ୍ଡ, ଉରୁଗୁଏ ଏବଂ ଆଣ୍ଡୋରା ଆଦି ଦେଶରେ ସମଲିଙ୍ଗୀ ବିବାହକୁ ସ୍ବୀକୃତି ମିଳିଛି। ଏହି ଦେଶଗୁଡିକ ମଧ୍ୟରେ ଆଣ୍ଡୋରା ହେଉଛି ଶେଷ ଦେଶ, ଯାହା ୧୭ ଫେବୃଆରୀ ୨୦୨୩ ରେ ସମଲିଙ୍ଗୀ ବିବାହକୁ ଅନୁମୋଦନ କରିଥିଲା ।
ସମଲିଙ୍ଗୀ ବିବାହକୁ ଆଇନଗତ କରିବାରେ ନେଦରଲାଣ୍ଡ ବିଶ୍ୱର ପ୍ରଥମ ଦେଶ ଥିଲା। ୨୦୦୧ ମସିହାରେ, ନେଦରଲାଣ୍ଡ ସମଲିଙ୍ଗୀ ବିବାହକୁ ଅନୁମୋଦନ କରିଥିଲା। ୨୦୦୦ ମସିହାରେ, ସଂସଦରେ ଏ ବାବଦରେ ଏକ ଆଇନ ପ୍ରଣୟନ କରାଯାଇଥିଲା, ଯାହା ଅନୁମୋଦନ ପାଇବାକୁ ଏକ ବର୍ଷ ସମୟ ନେଇଥିଲା। ନେଦରଲାଣ୍ଡ ପରେ ନ୍ୟୁଜିଲାଣ୍ଡ ସମଲିଙ୍ଗୀ ବିବାହକୁ ଅନୁମୋଦନ କରିଥିଲା।
ଆମେରିକାରେ ସମାନଲିଙ୍ଗୀ ବିବାହ ଆଇନଗତ ଅଟେ। ଯଦିଓ ଏହା କେତେକ ରାଜ୍ୟରେ ନିଷେଧ। କିନ୍ତୁ ଆମେରିକାର ଅଧିକାଂଶ ରାଜ୍ୟରେ ସମଲିଙ୍ଗୀ ବିବାହକୁ ଅନୁମୋଦନ କରାଯାଇଛି। ତେବେ ବିଭିନ୍ନ ସମୟରେ ଏସବୁ ରାଜ୍ୟରେ ସମଲିଙ୍ଗୀ ବିବାହକୁ ଅନୁମୋଦନ କରାଯାଇଥିଲା।
