ବ୍ୟବସାୟ ଆଳରେ ୩୨ଲକ୍ଷ ଠକେଇ
9:46 amNovember 4, 2020November 4, 2020 / 43

ବରଗଡ଼ ଅଫିସ୍‌,୪।୧୧: ବ୍ୟବସାୟିକ ପ୍ରଲୋଭନ ଦେଖାଇ ମୁମ୍ବାଇର ଏକ ସଂସ୍ଥା ବରଗଡ଼ର ୪ଜଣଙ୍କଠାରୁ ୩୧ଲକ୍ଷ ୬୬ହଜାର ୩୦୦ଟଙ୍କା ଠକି ନେଇଛି। ଏ ନେଇ ସମ୍ବଲପୁର ସାଇବର ଥାନାରେ ଅଭିଯୋଗ ହେବା ପରେ ପୋଲିସ ମାମଲା (ନଂ.୨୩/୨୦) ରୁଜୁ କରି ତଦନ୍ତ କରୁଛି । ବର୍ତ୍ତମାନ ସୁଦ୍ଧା ପୋଲିସ ଏହାର ଟେର୍‌ ପାଇ ପାରିନାହିଁ। ଏ ସମ୍ପର୍କରେ ସାଇବର ଥାନା ଆଇଆଇସି ତାରାବତୀ ପ୍ରଧାନଙ୍କୁ ପଚାରିବାରୁ ସେ କହିଲେ, ଉକ୍ତ ଘଟଣାର ଟେକ୍ନିକାଲ ତଦନ୍ତ ଚାଲିଛି ଏବଂ ବିଭିନ୍ନ ତଥ୍ୟ ମଗାଯାଇଛି। ଏହା ମିଳିବା ପରେ ତଦନ୍ତର ଅଗ୍ରଗତିରେ ତାହା ସହାୟକ ହୋଇ ପାରିବ । ଏହି ଘଟଣା ଏବେ ଏଠାରେ ଚର୍ଚ୍ଚାର ବିଷୟ ହୋଇଛି ।
ପୋଲିସ ସୂଚନା ଅନୁଯାୟୀ, ମୁମ୍ବାଇର ଭବାନୀ ଟ୍ରେଡ଼ର୍ସ ନାମକ ଏକ ସଂସ୍ଥା ବି-୪ ସଲ୍ୟୁଶନ ଯୋଗାଇବା ପାଇଁ ଗ୍ରେସୀ ହୋଲି ନାମରେ ଫେସବୁକ୍‌ ଆକାଉଣ୍ଟ ଖୋଲି ବିଜ୍ଞାପନ ଦେଇ ଅଧିକ ଲାଭ ପ୍ରଲୋଭନ ଦେଖାଇଥିଲେ। ବରଗଡ଼ ସହର ଉପକଣ୍ଠ ତୋରା ଗ୍ରାମର ମନୋରଞ୍ଜନ ସାହୁ ଏବଂ ତାଙ୍କର ୩ଜଣ ବନ୍ଧୁ ସୁନୀଲ ବାଗ, ମନୋଜ ମେହେର ଏବଂ ଚନ୍ଦ୍ରଶେଖର ମେହେର ବିଜ୍ଞାପନ ଦେଖି ବ୍ୟବସାୟ ପାଇଁ ଆଗ୍ରହ ପ୍ରକାଶ କରିଥିଲେ। ବିଜ୍ଞାପନରେ ଦିଆଯାଇଥିବା ହ୍ବାଟ୍ସଆପ୍‌ ନମ୍ବରରେ ଉକ୍ତ ସଂସ୍ଥା ସହିତ ଯୋଗାଯୋଗ କରିଥିଲେ। ଯୋଗାଯୋଗ ପରେ ଆବଶ୍ୟକ ଟଙ୍କା ଜମା କରିବା ପାଇଁ ସଂସ୍ଥା ପକ୍ଷରୁ ଆନ୍ଧ୍ରବ୍ୟାଙ୍କ ଓ କସ୍‌ମସ୍‌ ବ୍ୟାଙ୍କର ୨ ଆକାଉଣ୍ଟ ନମ୍ବର ଦିଆଯାଇଥିଲା ।
ଏହାପରେ ସେମାନେ ସଂସ୍ଥା ପଠାଇଥିବା କସ୍‌ମସ୍‌ ବ୍ୟାଙ୍କ ଆକାଉଣ୍ଟ ନମ୍ବରକୁ ଜୁନ ୨୨ରୁ ଅଗଷ୍ଟ ୧୦ତାରିଖ ପର୍ଯ୍ୟନ୍ତ ୬ଟି ପର୍ଯ୍ୟାୟରେ ୧୮ଲକ୍ଷ ୬୬ହଜାର ୬୦୦ ଟଙ୍କା ଆର୍‌ଟିଜିଏସ୍‌ ମାଧ୍ୟମରେ ପଠାଇଥିଲେ। ସେହିପରି ଜୁଲାଇ ୧୬ରୁ ଅଗଷ୍ଟ ୧୪ତାରିଖ ମଧ୍ୟରେ ବାକି ୧୨ଲକ୍ଷ ୯୯ହଜାର ୭୦୦ ଟଙ୍କା ଆନ୍ଧ୍ର ବ୍ୟାଙ୍କ ଆକାଉଣ୍ଟକୁ ୫ଟି ପର୍ଯ୍ୟାୟରେ ଆର୍‌ଟିଜିଏସ୍‌ ମାଧ୍ୟମରେ ପଠାଇଥିଲେ। ଟଙ୍କା ଜମା ଦେବାର କିଛିଦିନ ପରେ ସମ୍ପୃକ୍ତ ଠକସଂସ୍ଥା ଗ୍ରେସୀ ହୋଲି ନାମରେ ଖୋଲିଥିବା ଫେସ୍‌ବୁକ ଆକାଉଣ୍ଟକୁ ଡିଲିଟ୍‌ କରିଦେଇଥିଲା। ଫଳରେ ସଂସ୍ଥା ସହିତ ଆଉ ଯୋଗାଯୋଗ ସମ୍ଭବ ନ ହେବାରୁ ମନୋରଞ୍ଜନ ଅକ୍ଟୋବର ୮ରେ ସାଇବର ଥାନାରେ ଲିଖିତ ଅଭିଯୋଗ ଦେଇଥିଲେ ।