ବରଗଡ଼ ଅଫିସ,୧୩ା୭: କରୋନା ସଂକ୍ରମଣ ଥମିବାର ନାଁ ନେଉ ନାହିଁ । ସୋମବାର ଜିଲାରେ ପୁଣି ୩୧ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ଆକ୍ରାନ୍ତଙ୍କ ମଧ୍ୟରେ ବରଗଡ଼ ବ୍ଲକ କଟାପାଲିର ୧୫, ବରଗଡ଼ ମ୍ୟୁନିସିପାଲିଟିର ୮, ଗାଇସିଲେଟ୍ ବ୍ଲକ, ବରପାଲି ଏନ୍ଏସି ଓ ଅତାବିରା ବ୍ଲକର ୨ଜଣ ଏବଂ ପଦ୍ମପୁର ବ୍ଲକ ଓ ଏସିସି ସିମେଣ୍ଟନଗରର ଜଣେ ଲେଖାଏ ଆକ୍ରାନ୍ତ ରହିଛନ୍ତି । ସେମାନଙ୍କ ମଧ୍ୟରୁ ୧୮ଜଣ ପୁରୁଷ, ୧୧ଜଣ ମହିଳା ଓ ୨ଶିଶୁ ରହିଥିବାବେଳେ ସମସ୍ତଙ୍କୁ ବରଗଡ଼ର କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଥିବା ଜିଲାପାଳ ଜ୍ୟୋତିରଞ୍ଜନ ପ୍ରଧାନ ସୂଚନା ଦେଇଛନ୍ତି । ଅନ୍ୟପକ୍ଷରେ ଜିଲାରେ ଆକ୍ରାନ୍ତଙ୍କ ସଂଖ୍ୟା ୨୦୩ରେ ପହଞ୍ଚି ଥିବାବେଳେ କରୋନା ସଂକ୍ରମଣ ବୃଦ୍ଧିରୁ ସ୍ଥାନୀୟ ଲୋକଙ୍କ ଚିନ୍ତା ବଢ଼ି ଚାଲିଛି। ତେବେ କଟାପାଲିର ସମସ୍ତ ଆକ୍ରାନ୍ତ ସ୍ଥାନୀୟ ସଂକ୍ରମିତ। ବରଗଡ଼ ମ୍ୟୁନିସିପାଲିଟି ଅଧୀନ ଓ୍ବାର୍ଡ ନଂ-୧୯ ଟିଟିଲାଗଡ଼ିଆ ଝୁମ୍ପୁଡ଼ିରୁ ଚିହ୍ନଟ ହୋଇଥିବା ୪ଜଣ ପୂର୍ବ ଆକ୍ରାନ୍ତଙ୍କ ମଧ୍ୟରେ ଆସିଛନ୍ତି । ସେହିପରି ଓ୍ବାର୍ଡ ନଂ-୧୧ର ନିରାଶ୍ରୟ ଆଶ୍ରୟସ୍ଥଳୀର ସଙ୍ଗରୋଧ କେନ୍ଦ୍ରରୁ ଚିହ୍ନଟ ଆକ୍ରାନ୍ତ ଜଣକ ବାହାର ରାଜ୍ୟ ଫେରନ୍ତା ହୋଇଥିବାବେଳେ ଏହି ଓ୍ବାର୍ଡରୁ ଜଣେ କରୋନା ଯୋଦ୍ଧା ଆକ୍ରାନ୍ତ ହୋଇଥିବା ଜଣାପଡ଼ିଛି । ଏହା ସହିତ ଓ୍ବାର୍ଡ ନଂ- ୧୫ମିଶ୍ରଟିକ୍ରାର ୨ ଜଣ ଚିହ୍ନଟ ହୋଇଥିବାବେଳେ ସେମାନେ ମହାରାଷ୍ଟ୍ର ଫେରନ୍ତା ଏବଂ ଡାଙ୍ଗ ପଞ୍ଚାୟତ ଏସିସି ସିମେଣ୍ଟନଗରରୁ ଚିହ୍ନଟ ଆକ୍ରାନ୍ତ ଜଣକ ଜାମସେଦପୁର ଫେରନ୍ତା ବୋଲି ସୂଚନା ଦିଆଯାଇଛି। ସେହିପରି ପଦ୍ମପୁର ବ୍ଲକ କନସିଂହା ସଙ୍ଗରୋଧ କେନ୍ଦ୍ରର ଜଣେ ବାହାର ରାଜ୍ୟ ଫେରନ୍ତା, ପୂର୍ବ ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ଗାଇସିଲେଟ୍ ବ୍ଲକ ଜାମୁଟବାହାଲ ଗ୍ରାମର ୨ଜଣ, ଆଚାର୍ଯ୍ୟ ହରିହର କର୍କଟ ରୋଗ ଚିକିତ୍ସା କେନ୍ଦ୍ରରୁ ଫେରିଥିବା ଅତାବିରା ବ୍ଲକ ଭାଲୁପାଲି ଗ୍ରାମର ଜଣେ ଏବଂ ଜହ୍ନାପଡ଼ା ଗ୍ରାମର ଜଣେ ସ୍ଥାନୀୟ ଲୋକ ନୂଆ ଆକ୍ରାନ୍ତଙ୍କ ମଧ୍ୟରେ ରହିଛନ୍ତି । ଆକ୍ରାନ୍ତ ଚିହ୍ନଟ ହେବା ପରେ ସଂକ୍ରମିତଙ୍କ ଅଞ୍ଚଳକୁ କଣ୍ଟେନ୍ମେଣ୍ଟ୍ ଜୋନ୍ ଘୋଷଣା କରାଯାଇଛି । ସେହିପରି ବରଗଡ଼ ମ୍ୟୁନିସିପାଲିଟି ଅଧୀନ ଓ୍ବାର୍ଡ ନଂ-୧୧ରୁ ଚିହ୍ନଟ ହୋଇଥିବା କରୋନା ଯୋଦ୍ଧା ଜଣକ ଜଣେ ଅଗ୍ନିଶମ କର୍ମଚାରୀ ହୋଇଥିବା ଯୋଗୁ ସ୍ଥାନୀୟ ଦମକଳ କେନ୍ଦ୍ରକୁ ସାନିଟାଇଜ୍ କରାଯାଇଛି । ତେବେ କରୋନା ପ୍ରତିହତ ପାଇଁ ସାମାଜିକ ଦୂରତ୍ୱ ଅବଳମ୍ବନ ସହିତ ସମସ୍ତେ ମାସ୍କ ବ୍ୟବହାର କରିବା ଏବଂ ଅତି ଜରୁରୀ କାମ ନ ଥିଲେ ବାହାରକୁ ନ ବାହାରିବା ପାଇଁ ଜିଲାପାଳ ପରାମର୍ଶ ଦେଇଛନ୍ତି।
