୧୮୬୭ ମସିହାର କଥା। ସେ ସମୟରେ ମାଡ୍ରାସ ପ୍ରେସିଡେନ୍ସି ଅଧୀନରେ ଥିଲା ଗଞ୍ଜାମ ଜିଲା। ସେହିବର୍ଷ ପ୍ରତିଷ୍ଠିତ ହୋଇଥିଲା ବ୍ରହ୍ମପୁର ପୌରସଂସ୍ଥା। ୧୫୪ ବର୍ଷର ଏହି ସ୍ବାୟତ୍ତ ଶାସନ ସଂସ୍ଥା ୧୨ ବର୍ଷ ତଳେ ମହାନଗର ନିଗମରେ ପରିଣତ ହୋଇଛି। ଅତୀତରେ ୨୭ ୱାର୍ଡକୁ ନେଇ ଗଠିତ ଏହି ପୌରସଂସ୍ଥା ଏବେ ୪୦ ୱାର୍ଡକୁ ବୃଦ୍ଧି ପାଇଛି। ବରିଷ୍ଠ ରାଜନେତା ସ୍ବର୍ଗତ ବୃନ୍ଦାବନ ନାୟକ, ସ୍ବର୍ଗତ ବିନାୟକ ଆଚାର୍ଯ୍ୟ, ବିଶିଷ୍ଟ ଆଇନଜୀବୀ ସ୍ବର୍ଗତ ବସନ୍ତ କୁମାର ପାଣିଗ୍ରାହୀ, ସ୍ବାଧୀନତା ସଂଗ୍ରାମୀ ଆଇ.ରାମମୂର୍ତ୍ତି ଓ ଅନ୍ୟମାନେ ନଗରପାଳ ଭାବେ ନିର୍ବାଚିତ ହୋଇଥିଲେ। ପରବର୍ତ୍ତୀ ସମୟରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବର୍ତ୍ତମାନର ବିଜେଡି ଏମପି ଚନ୍ଦ୍ରଶେଖର ସାହୁ ପୌରସଂସ୍ଥାର ଦୁଇଥର ନଗରପାଳ ହେବା ସହ ସହରର ବିକାଶ ପାଇଁ କେତେକ ପଦକ୍ଷେପ ନେଇଥିଲେ।
୨୦୦୮ ନିର୍ବାଚନ ବେଳେ ୱାର୍ଡ ସଂଖ୍ୟା ୩୭କୁ ବଢ଼ିଥିଲା। ବିଜେଡିରୁ ନିର୍ବାଚିତ ଶିବ ଶଙ୍କର ଦାସ ନଗରପାଳ ହୋଇଥିଲେ। ସେହିବର୍ଷ ଡିସେମ୍ବର ଶେଷରେ ସରକାର ଏହାକୁ ମହାନଗର ନିଗମର ମାନ୍ୟତା ଦେଇଥିଲେ। ୨୦୧୩ ପୌରନିର୍ବାଚନରେ ୱାର୍ଡ ସଂଖ୍ୟା ୪୦ ହୋଇଥିଲା। ମେୟର ପଦ ଓବିସି ମହିଳାଙ୍କ ପାଇଁ ସଂରକ୍ଷିତ ଥିବାରୁ ବିଜେଡିରୁ କେ.ମାଧବୀ ପ୍ରଥମ ନିର୍ବାଚିତ ମହିଳା ମେୟର ହୋଇଥିଲେ। ୨୦୧୮ ଅକ୍ଟୋବର ୧ରୁ ମହାନଗର ନିଗମରେ ଗଞ୍ଜାମ ଜିଲାପାଳ ପ୍ରଶାସକ ଭାବେ ଅତିରିକ୍ତ ଦାୟିତ୍ୱରେ ଅଛନ୍ତି।
-ନରସିଂହ ସାହୁ
