ଗୋପ,୧୩।୧୦(ଡି.ଏନ୍.ଏ.): ପୁରୀ ଜିଲା ଗୋପ ବ୍ଲକ ଅନ୍ତର୍ଗତ ବେଦପୁର ଗ୍ରାମର ମନମୋହନ ସାହୁଙ୍କ ଏକମାତ୍ର ପୁଅ ଏମ୍.ଏ. ପ୍ରତ୍ୟୁଷ ଅଞ୍ଚଳ ତଥା ରାଜ୍ୟ ପାଇଁ ଗୌରବ ଆଣିଛନ୍ତି। ୩ ବର୍ଷ ୭ ମାସ ବୟସର ଏହି ବାଳକ ମାତ୍ର ଅଢ଼େଇରୁ ତିନି ମିନିଟ୍ ମଧ୍ୟରେ ବିଭିନ୍ନ ପ୍ରଶ୍ନର ଉତ୍ତର ଦେଇପାରିଛନ୍ତି। ଏଥିପାଇଁ ତାଙ୍କ ନାମ ଏବେ ଇଣ୍ଡିଆ ବୁକ୍ ଅଫ୍ ରେକଡର୍ସରେ ସ୍ଥାନ ପାଇଛି।
ପ୍ରକାଶ ଯେ, ଏହି ବିସ୍ମୟ ବାଳକ ପ୍ରତ୍ୟୁଷ ୩୦ଟି କମ୍ପ୍ୟୁଟର ସରଞ୍ଜାମର ନାମ, ୪୬ଟି ପଶୁ, ୧୬ଟି ପକ୍ଷୀ, ୨୦ଟି ଫୁଲ, ୨୦ଫଳ, ମଣିଷ ଶରୀରର ବିଭିନ୍ନ ଅଙ୍ଗ ପ୍ରତ୍ୟେଙ୍ଗ, ୧୦ଟି ରାଇମ୍ସ, ଜାତୀୟ ସଙ୍ଗୀତ, ୩୦ଟି ସାଧାରଣ ଜ୍ଞାନ, ୧୬ଟି ପଶୁ ଛୁଆ ନାମ ତତ୍କ୍ଷଣାତ୍ ସ୍ପଷ୍ଟ ଭାବେ ଓଡ଼ିଆ ଏବଂ ଇଂଲିଶ୍ରେ କହିପାରିଛନ୍ତି। ଏଥିସହ ବିଭିନ୍ନ ପ୍ରଶ୍ନର ଉତ୍ତର ଦେଇପାରୁଥିବାବେଳେ ୨୦ ପ୍ରକାର ଯୋଗ ସମେତ ବିଭିନ୍ନ ସ୍ଲୋକ ମଧ୍ୟ କହିପାରୁଛନ୍ତି। ଛୋଟ ସମୟରୁ ବିଭିନ୍ନ କଥା ଅତି ସହଜରେ ଧରିବା ସହ ଉଚ୍ଚାରଣ କରିପାରୁଥିବାରୁ ପରିବାର ପକ୍ଷରୁ ବିଭିନ୍ନ ନାମଠାରୁ ଆରମ୍ଭ କରି ଶିକ୍ଷା ସମ୍ପର୍କରେ କହିଥିଲେ। ସେସବୁ ପ୍ରତ୍ୟୁଷ ଶୁଣି କିଛି ମିନିଟ୍ ମଧ୍ୟରେ କହିପାରୁଥିଲେ। ଏପରି ପ୍ରତିଭାର ଅଧିକାରୀ ହେବା ପାଇଁ ପ୍ରଥମେ ପରିବାର ପକ୍ଷରୁ ଇଣ୍ଡିଆ ବୁକ୍ ରେକର୍ଡରେ ପ୍ରତିଯୋଗିତା କରିବା ଲାଗି ଅନ୍ଲାଇନ୍ ମାଧ୍ୟମରେ ସମସ୍ତ ପ୍ରସ୍ତୁତି ଶେଷ କରିଥିଲେ। ଶେଷରେ ପ୍ରତିଯୋଗିତାରେ ବିସ୍ମୟ ବାଳକ ପ୍ରତ୍ୟୁଷ ଅଂଶଗ୍ରହଣ କରି ଅନ୍ଲାଇନ ମାଧ୍ୟମରେ ପରୀକ୍ଷା କରାଯାଇଥିବା ବେଳେ ସୋମବାର ଫଳାଫଳ ଆସିବା ସହ ସେ ଏହି ପ୍ରତିଭାର ଅଧିକାରୀ ହୋଇଥିବା ମେଡାଲ ଓ ସାର୍ଟିଫିକେଟ ଆସିଥିବା ପରିବାର ଜାଣିବାକୁ ପାଇଥିଲେ। ବିସ୍ମୟ ପ୍ରତ୍ୟୁଷ ଏହି ରେକର୍ଡର ଅଧିକାରୀ ହେବା ଅଞ୍ଚଳରେ ଜଣାପଡ଼ିବା ପରେ ତାଙ୍କୁ ଏବଂ ତାଙ୍କ ପରିବାରକୁ ରାଜ୍ୟ ଓ ରାଜ୍ୟ ବାହାରୁ ଶୁଭେଚ୍ଛାର ବାର୍ତ୍ତା ଛୁଟିଥିବା ବାପା ମନମୋହନ ଓ ମାଆ ଅମିତା କହିଛନ୍ତି।
