ନୂଆଦିଲ୍ଲୀ,୫।୮: କ୍ରିକେଟ ବିଶ୍ୱର ଦ୍ୱିତୀୟ ସବୁଠାରୁ ଲୋକପ୍ରିୟ ଖେଳ। କିନ୍ତୁ ବର୍ତ୍ତମାନ ଏହା କେବଳ ଏକ ଖେଳ ନୁହେଁ, ବରଂ କୋଟି କୋଟି ଟଙ୍କାର ଏକ ବିଶାଳ ଇଣ୍ଡଷ୍ଟ୍ରିରେ ପରିଣତ ହୋଇଛି। ବିଶ୍ୱର ଅନେକ ଦିଗ୍ଗଜ କ୍ରିକେଟର ଚମତ୍କାର ପ୍ରଦର୍ଶନ କରିବା ସହ ବିଜ୍ଞାପନ, ବ୍ୟବସାୟ ଓ ବିନିଯୋଗ ମାଧ୍ୟମରେ ମଧ୍ୟ ଅପାର ସମ୍ପତ୍ତି ଅର୍ଜନ କରିଛନ୍ତି।
ସବୁଠାରୁ ବିଶେଷ କଥା ହେଉଛି, ବିଶ୍ୱର ତିନି ଜଣ ସବୁଠାରୁ ଧନୀ କ୍ରିକେଟରଙ୍କ ତାଲିକାରେ ଭାରତୀୟ ଖେଳାଳିମାନେ ଶୀର୍ଷ ସ୍ଥାନରେ ରହିଛନ୍ତି। ଆସନ୍ତୁ ଜାଣିବା ସେମାନେ କିଏ ଏବଂ ସେମାନଙ୍କ ଆୟର ପ୍ରମୁଖ ଉତ୍ସ କ’ଣ।
ଏହି ତାଲିକାରେ ସେହି କ୍ରିକେଟରମାନଙ୍କୁ ସାମିଲ କରାଯାଇଛି, ଯେଉଁମାନେ ନିଜ ରୋଜଗାର ବଳରେ କୋଟିପତି ଓ ଅରବପତି ସ୍ତରର ସମ୍ପତ୍ତି ସୃଷ୍ଟି କରିଛନ୍ତି। ଅଜୟ ଜାଡେଜା ମଧ୍ୟ ସବୁଠାରୁ ଧନୀ କ୍ରିକେଟରଙ୍କ ତାଲିକାରେ ଅଛନ୍ତି, କିନ୍ତୁ ତାଙ୍କ ସମ୍ପତ୍ତିର ବଡ଼ ଅଂଶ ଉତ୍ତରାଧିକାର ସୂତ୍ରରେ ମିଳିଛି। ଅନ୍ୟପଟେ ବିରାଟ କୋହଲି, ସଚିନ ତେନ୍ଦୁଲକର ଓ ଏମ ଏସ୍ ଧୋନୀ ନିଜ କ୍ରିକେଟ କ୍ୟାରିୟର, ବ୍ୟବସାୟିକ ବିନିଯୋଗ, ବ୍ରାଣ୍ଡ ଏଣ୍ଡୋର୍ସମେଣ୍ଟ ଓ ଅନ୍ୟାନ୍ୟ ଉପାୟରେ ନିଜ ସମ୍ପତ୍ତିରେ ଅନେକ ‘ଶୂନ’ ଯୋଡ଼ିଛନ୍ତି।
୧. ସଚିନ ତେନ୍ଦୁଲକର
ଭାରତୀୟ କ୍ରିକେଟର ମହାନ ବ୍ୟାଟର ତଥା ‘କ୍ରିକେଟର ଭଗବାନ’ ଭାବେ ପରିଚିତ ସଚିନ ତେନ୍ଦୁଲକର ଏହି ତାଲିକାରେ ପ୍ରଥମ ସ୍ଥାନରେ ଅଛନ୍ତି। ତାଙ୍କର ଆନୁମାନିକ ନେଟୱର୍ଥ ପ୍ରାୟ ୧୭୦ ମିଲିୟନ ଡଲାର (୧,୪୦୦ କୋଟି ଟଙ୍କାରୁ ଅଧିକ) ବୋଲି କୁହାଯାଏ। ୨୦୧୩ରେ ସଚିନ ଅନ୍ତର୍ଜାତିକ କ୍ରିକେଟରୁ ଅବସର ନେଇଥିଲେ ମଧ୍ୟ ତାଙ୍କ ଆୟ କ୍ରମାଗତ ଭାବେ ବଢ଼ିଚାଲିଛି। ତାଙ୍କର ପ୍ରମୁଖ ଆୟ ଉତ୍ସ ହେଉଛି ବ୍ରାଣ୍ଡ ଏଣ୍ଡୋର୍ସମେଣ୍ଟ, ସ୍ପୋର୍ଟସ ଏକାଡେମୀ, ରେଷ୍ଟୁରାଣ୍ଟ, ଷ୍ଟାର୍ଟଅପରେ ବିନିଯୋଗ ଏବଂ ଅନ୍ୟାନ୍ୟ ବ୍ୟବସାୟ। ଏହାଛଡ଼ା ସେ ଆଇପିଏଲ ଫ୍ରାଞ୍ଚାଇଜ ମୁମ୍ବାଇ ଇଣ୍ଡିଆନ୍ସର ମେଣ୍ଟର ମଧ୍ୟ ଅଛନ୍ତି।
୨. ବିରାଟ କୋହଲି
ଭାରତୀୟ ଷ୍ଟାର ବ୍ୟାଟର ବିରାଟ କୋହଲି ପ୍ରାୟ ୧୨୭ ମିଲିୟନ ଡଲାର (୧,୦୫୦ କୋଟି ଟଙ୍କାରୁ ଅଧିକ) ନେଟୱର୍ଥ ସହ ଦ୍ୱିତୀୟ ସ୍ଥାନରେ ଅଛନ୍ତି। ବର୍ତ୍ତମାନ ସେ ବିଶ୍ୱର ସବୁଠାରୁ ବଡ଼ ସ୍ପୋର୍ଟସ ବ୍ରାଣ୍ଡମାନଙ୍କ ମଧ୍ୟରୁ ଜଣେ। ତାଙ୍କ ଆୟର ପ୍ରମୁଖ ଉତ୍ସ ହେଉଛି କ୍ରିକେଟ କଣ୍ଟ୍ରାକ୍ଟ, ବିଜ୍ଞାପନ, ସୋସିଆଲ ମିଡିଆ, One8 ଓ Wrogn ଫ୍ୟାଶନ ବ୍ରାଣ୍ଡ ଏବଂ ଅନ୍ୟାନ୍ୟ ବ୍ୟବସାୟ। ଏହା ସହ ମୁମ୍ବାଇ ଓ ଗୁରୁଗ୍ରାମରେ ଥିବା ତାଙ୍କ ବିଳାସପୂର୍ଣ୍ଣ ସମ୍ପତ୍ତି ମଧ୍ୟ ତାଙ୍କ ମୋଟ ସମ୍ପତ୍ତିର ବଡ଼ ଅଂଶ।
୩. ଧୋନୀ
ଭାରତର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନି ପ୍ରାୟ ୧୨୩ ମିଲିୟନ ଡଲାର (୧,୦୦୦ କୋଟି ଟଙ୍କାରୁ ଅଧିକ) ନେଟ୍ୱର୍ଥ ସହ ତୃତୀୟ ସ୍ଥାନରେ ଅଛନ୍ତି। କ୍ରିକେଟ ବ୍ୟତୀତ ସେ ପ୍ରଡକ୍ସନ ହାଉସ, ଟେକ ଷ୍ଟାର୍ଟଅପ ଓ ଅନ୍ୟାନ୍ୟ ବ୍ୟବସାୟ ସହ ଜଡ଼ିତ ଅଛନ୍ତି। ସେ ଅନେକ ବଡ଼ କମ୍ପାନୀର ବ୍ରାଣ୍ଡ ଆମ୍ବାସାଡର ମଧ୍ୟ ଅଟନ୍ତି। ଅନ୍ତର୍ଜାତିକ କ୍ରିକେଟରୁ ଅବସର ନେବା ପରେ ମଧ୍ୟ ଆଇପିଏଲରେ ତାଙ୍କ ଲୋକପ୍ରିୟତା ଓ ଆୟ ଅବ୍ୟାହତ ରହିଛି।
