ନୂଆଦିଲ୍ଲୀ,୨୦।୮: ଦେଶର ଆଉ ୩ ବିମାନ ବନ୍ଦର ପବ୍ଲିକ ପ୍ରାଇଭେଟ୍ ପାର୍ଟନରଶିପ(ପିପିପି) ବା ସରକାରୀ ଘରୋଇ ସହଭାଗିତାରେ ପରିଚାଳିତ ହେବ। ଏହି ବିମାନ ବନ୍ଦରଗୁଡିକ ମଧ୍ୟରେ ଗୁଆହାଟୀ, ଜୟପୁର ଏବଂ ଥିରୁଭାନନ୍ତପୁରମ ରହିଛି। କେନ୍ଦ୍ର କ୍ୟାବିନେଟ ପକ୍ଷରୁ ଏହି ପ୍ରସ୍ତାବକୁ ମଞ୍ଜୁରୀ ମିଳିଛି। କେନ୍ଦ୍ର କ୍ୟାବିନେଟ ଗ୍ରହଣ କରିଥିବା ନିଷ୍ପତ୍ତି ଉପରେ କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର ଗଣମାଧ୍ୟମକୁ ସୂଚନା ଦେଇଛନ୍ତି। ଏୟାରପୋର୍ଟ ଅଥରିଟି ଅଫ୍ ଇଣ୍ଡିଆ ଅଧୀନରେ ପରିଚାଳିତ ହେଉଥିବା ଏହି ବିମାନବନ୍ଦରଗୁଡିକୁ ଲିଜ୍ରେ ଦେବା ପ୍ରସ୍ତାବକୁ କେନ୍ଦ୍ର କ୍ୟାବିନେଟ ବୁଧବାର ମଞ୍ଜୁରୀ ପ୍ରଦାନ କରିଥିବା ସେ ମତ ରଖିଛନ୍ତି। ଏହି ବିମାନ ବନ୍ଦରଗୁଡିକ ଘରୋଇ କମ୍ପାନୀ ଦ୍ୱାରା ପରିଚାଳିତ ହେବ। କିଛି ବିମାନ ବନ୍ଦରକୁ ସରକାର ଘରୋଇ ହାତକୁ ପୁଣି ଟେକିଦେବେ ବୋଲି ପୂର୍ବରୁ ଅନୁମାନ କରାଯାଇଥିଲା। ୩ ବିମାନ ବନ୍ଦରଗୁଡିକ ଆଦାନୀ ଏଣ୍ଟରପ୍ରାଇଜେସ ଲିମିଟେଡ୍କୁ ୫୦ ବର୍ଷ ଲାଗି ଦେବାକୁ ନିଷ୍ପତ୍ତି ହୋଇଛି। ବିମାନ ବନ୍ଦରଗୁଡିକର ଅପରେଶନ, ମ୍ୟାନେଜମେଣ୍ଟ ଏବଂ ଉନ୍ନତୀକରଣ ଉକ୍ତ କମ୍ପାନୀ କରିବ ବୋଲି ଜଣାପଡିଛି। ଏହି ପଦକ୍ଷେପ ଦ୍ୱାରା ସରକାରଙ୍କୁ ୧୦୭୦ କୋଟି ଟଙ୍କା ମିଳିବ। ଏହି ଅର୍ଥ ବିନିଯୋଗ ଦ୍ୱାରା ଅନ୍ୟ ଛୋଟ ସହରଗୁଡିକରେ ବିମାନ ବନ୍ଦର ବିକଶିତ କରିବାରେ ସହାୟକ ହେବ ବୋଲି ଜାଭଡେକର ସୂଚନା ଦେଇଛନ୍ତି।
