ଭୋଗରାଇ, ୩l୧୧( ପ୍ରଦୀପ ଦାସ ): ବାଲେଶ୍ୱର ଜିଲା ଭୋଗରାଇ ବ୍ଲକ ଜଳେଶ୍ୱର – ଚନ୍ଦନେଶ୍ୱର ୫୭ ନଂ ରାଜ୍ୟପଥ ଥାନା ଛକ ଦେହୁର୍ଦ୍ଦା ହନୁମାନ ମନ୍ଦିରଠାରେ ମଙ୍ଗଳବାର ଅପରାହ୍ନରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏଥିରେ ଜଣେ କଲେଜ ଛାତ୍ରଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୨ ଗୁରୁତର ଅବସ୍ଥାରେ ବାଲେଶ୍ୱର ମୁଖ୍ୟ ଡାକ୍ତରଖାନାରେ ଭର୍ତ୍ତି ହୋଇଛନ୍ତି l ମୃତ ଛାତ୍ର ହେଲେ ତାଳସାରୀ ମେରାଇନ ଥାନା ଅଧୀନ ଗମ୍ଭାରିଆ ଗ୍ରାମର କାଳିଚରଣ ସେନାପତିଙ୍କ ପୁଅ ଗୌତମ କୁମାର ସେନାପତି(୨୧)l ସେ ଭୋଗରାଇ ଆର୍ଆଇଏଚ୍ଏସ୍ ମହାବିଦ୍ୟାଳୟର ଯୁକ୍ତ ୨ ର ଛାତ୍ର ଅଟନ୍ତି l
ସୂଚନାନୁଯାୟୀ, ଅପରାହ୍ନରେ ଚନ୍ଦନେଶ୍ୱରରୁ ଶ୍ରୀଗଣେଶ ନାମକ ଯାତ୍ରୀବାହୀ ବସ ବାଲେଶ୍ୱର ଅଭିମୁଖେ ଯାଉଥିଲା। ଏହି ସମୟରେ ବସ୍ ସହ ବିପରୀତ ଦିଗରୁ ବାଇକ ଯୋଗେ ଆସୁଥିବା ୩ ସାଙ୍ଗଙ୍କ ମୁହାଁମୁହିଁ ଧକ୍କା ହୋଇଥିଲା l ଏହି ଦୁର୍ଘଟଣାରେ କଲେଜଛାତ୍ର ଗୌତମଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ସେହିଭଳି ସ୍ଥାନୀୟ ଲୋକେ ୧ ୦ ୮ ଆମ୍ବୁଲାନ୍ସ ଯୋଗେ ଅନ୍ୟ ୨ ଜଣଙ୍କୁ ଭୋଗରାଇ ଜଳେଶ୍ୱରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲେ। ସେଠାରେ ୨ ଜଣକ ଅବସ୍ଥା ଗୁରୁତର ହେବାରୁ ବାଲେଶ୍ୱର ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଗୁରୁତର ହୋଇଥିବା ୨ ଜଣ ହେଲେ ବିନ୍ଧା ପଦ୍ମପୁର ଗ୍ରାମର କାଁହ୍ନୁ ପଣ୍ଡାଙ୍କ ପୁଅ ସଂଜୟ ପଣ୍ଡା (୨୨) ଓ କମଳାକାନ୍ତ ରାଜାଙ୍କ ପୁଅ ହରେକୃଷ୍ଣ ରାଜ(୧୭) l ଭୋଗରାଇ ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି କଲେଜଛାତ୍ରଙ୍କ ମୃତଦେହ ବ୍ୟବଚ୍ଛେଦ ନିମନ୍ତେ ସ୍ଥାନୀୟ ଡାକ୍ତରଖାନାକୁ ପଠାଇଛି। ସେହିଭଳି ବସ ଓ ବାଇକକୁ ଉଦ୍ଧାର କରିବା ସହ ବସ ଡ୍ରାଇଭରଙ୍କୁ ଥାନାରେ ଅଟକ ରଖି ପ୍ରାଥମିକ ତଦନ୍ତ ଜାରି ରଖିଛନ୍ତି l
