ଭଞ୍ଜନଗର,୩।୯(ବାବୁଲା ପ୍ରଧାନ): ବିଳମ୍ବିତ ରାତି ପର୍ଯ୍ୟନ୍ତ ଘରେ ପାଠ ପଢ଼ିଲେ। ସକାଳୁ କଲେଜ ଯାଉଛି କହି ମୋବାଇଲ ଫୋନ ଘରେ ଛାଡ଼ି ଘରୁ ବାହାରିଥିଲେ। ଏହାପରେ ଛାତ୍ର ଜଣଙ୍କ କେଉଁଆଡେ ଗଲେ ପତ୍ତା ମିଳୁନି। ଇତିମଧ୍ୟରେ ୩ ଦିନ ବିତିଗଲାଣି କିନ୍ତୁ ନିଖୋଜ ଛାତ୍ରଙ୍କ ପତ୍ତା ମିଳୁନାହିଁ। ଯାହାକୁ ନେଇ ପରିବାର ଲୋକଙ୍କ ଚିନ୍ତା ବଢ଼ିଯାଇଛି। ନିଖୋଜ ଛାତ୍ର ଜଣଙ୍କ ହେଲେ ଗଞ୍ଜାମ ଜିଲ୍ଲା ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଯୁକ୍ତ ୩ ପ୍ରଥମବର୍ଷ ଗଣିତ ସମ୍ମାନ ଛାତ୍ର ରବୀନ୍ଦ୍ର ନାୟକ (୧୯)। ତାଙ୍କ ଘର କନ୍ଧମାଳ ଜିଲ୍ଲା ରାଇକିଆ ଥାନା ଅନ୍ତର୍ଗତ ରଣବା ନିକଟସ୍ଥ ଡାକପଙ୍କା। ତାଙ୍କ ବାପାଙ୍କ ନାମ ପ୍ରଭାକର ନାୟକ।
ପରିବାର ସୂତ୍ରରୁ ଜଣାପଡ଼ିଛି ଯେ, ଗତ ୧ ତାରିଖରୁ ରବିନ୍ଦ୍ରଙ୍କ କୌଣସି ସନ୍ଧାନ ମିଳୁନାହିଁ। ଘରୁ ବାହାରିବା ସମୟରେ ସେ ନିଜ ମୋବାଇଲ ଫୋନ ଘରେ ଛାଡ଼ି ଯାଇଥିଲେ। ତେବେ ଆକାଉଣ୍ଟରେ ରଖିଥିବା ଟଙ୍କା ମଧ୍ୟରୁ ପ୍ରାୟ ୩ ହଜାର ଟଙ୍କା ବହି କିଣିବା ପାଇଁ ଉଠାଯାଇଥିବା ଜଣାପଡ଼ିଛି। ଏହି ଘଟଣା ନିଖୋଜ ରହସ୍ୟକୁ ଆହୁରି ଜଟିଳ କରିଛି। ରବୀନ୍ଦ୍ରଙ୍କ ନିଖୋଜ ସମ୍ପର୍କରେ ପରିବାର ପକ୍ଷରୁ ଭଞ୍ଜନଗର ଥାନାରେ ଅଭିଯୋଗ କରାଯାଇଛି।
ପୋଲିସ ଅଭିଯୋଗ ଆଧାରରେ ତଦନ୍ତ ଆରମ୍ଭ କରି ନିଖୋଜ ଛାତ୍ରଙ୍କ ସନ୍ଧାନ ଜାରି ରଖିଛି। ରବୀନ୍ଦ୍ରଙ୍କ ସମ୍ପର୍କରେ କୌଣସି ସୂଚନା ମିଳିଲେ ନିକଟସ୍ଥ ପୁଲିସ ଥାନା କିମ୍ବା ପରିବାରକୁ ଜଣାଇବାକୁ ଅନୁରୋଧ କରାଯାଇଛି।
ରବୀନ୍ଦ୍ରଙ୍କ ଭାଇଙ୍କ ନମ୍ବର (୮୨୮୦୩୨୬୦୩୦) ରେ ଯୋଗାଯୋଗ କରିବାକୁ ପରିବାର ପକ୍ଷରୁ ଅନୁରୋଧ କରାଯାଇଛି। ଘଟଣା ଦିନ ରବିନ୍ଦ୍ର କଲେଜ ଡ୍ରେସ ପିନ୍ଧି ବସରେ ଭଞ୍ଜନଗର ଆସିଥିଲେ। କିନ୍ତୁ କଲେଜ ଆସିଥିଲେ କି ନାହିଁ ସେନେଇ ସଠିକ କିଛି ଜଣାପଡ଼ିନାହିଁ। ତେଣୁ ରବିନ୍ଦ୍ରଙ୍କ ବାପା ଭାଇ ଘୁରୁ ବୁଲୁଛନ୍ତି ରବୀନ୍ଦ୍ରଙ୍କୁ ଖୋଜିବା ପାଇଁ। ରବିନ୍ଦ୍ରଙ୍କ ଘରେ ତିନିଦିନ ହେଲା ପରିବାର ଲୋକେ ଠିକ ଭାବେ ଖିଆପିଆ କରିନାହାନ୍ତି।
Dharitri – Odisha’s No.1 Odia Daily
