ହାଇଦ୍ରାବାଦ,୧୭।୬: ଶ୍ରୀଲଙ୍କାରେ ଖେଳାଯାଉଥିବା ତ୍ରିଦେଶୀୟ ସିରିଜ୍ର ଫାଇନାଲ୍ରେ ପ୍ରବେଶ କରି ଭାରତୀୟ ଏ-ଦଳ (India A) ଉତ୍ସବ ମନାଉଥିବା ବେଳେ ଅଧିନାୟକ ତିଲକ ବର୍ମାଙ୍କୁ ଏକ ବଡ଼ ଝଟ୍କା ଲାଗିଛି। ତିଲକଙ୍କ ନେତୃତ୍ୱରେ ଟିମ ଇଣ୍ଡିଆ ଆଫଗାନିସ୍ତାନକୁ ୧୦୧ ରନ୍ର ବୃହତ ବ୍ୟବଧାନରେ ପରାସ୍ତ କରି ଫାଇନାଲ ଟିକେଟ ହାସଲ କରିଛି। ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଇଣ୍ଡିଆ ଏ ଦଳ ୯ ଉଇକେଟ ହରାଇ ୩୧୯ ରନ କରିଥିଲା ଏବଂ ପରେ ଆଫଗାନିସ୍ତାନକୁ ମାତ୍ର ୨୧୮ ରନ୍ରେ ଅଟକାଇ ସହଜ ବିଜୟ ହାସଲ କରିଥିଲା। ହେଲେ ଏହି ବିଜୟର ଖୁସି ଅଧା ରହିଯାଇଛି। କାରଣ ତେଲଙ୍ଗାନା କ୍ରିକେଟ ଆସୋସିଏସନ (TCA) ପକ୍ଷରୁ ତିଳକ ବର୍ମାଙ୍କ ସମେତ ଅନ୍ୟ କେତେକ ଦିଗ୍ଗଜଙ୍କୁ ଏକ ଆଇନଗତ ନୋଟିସ ପଠାଯାଇଛି।
ତେଲଙ୍ଗାନା କ୍ରିକେଟ ଆସୋସିଏଶନ, ଟଲିଉଡର ଜନପ୍ରିୟ ଅଭିନେତା ବିଜୟ ଦେବରକୋଣ୍ଡା ଏବଂ ଭେଙ୍କଟେଶଙ୍କ ସମେତ ଷ୍ଟାର୍ କ୍ରିକେଟର ଅମ୍ବାତି ରାୟୁଡୁ, ତିଲକ ବର୍ମା ଏବଂ ମହମ୍ମଦ ସିରାଜଙ୍କୁ ଆଇନଗତ ନୋଟିସ ଜାରି କରିଛି। ନୋଟିସ ଅନୁଯାୟୀ, ହାଇଦ୍ରାବାଦ କ୍ରିକେଟ ଆସୋସିଏସନ (HCA) ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ର କୌଣସି ଅନୁମତି ନ ନେଇ କର୍ପୋରେଟ କମ୍ପାନୀଗୁଡିକ ସହିତ ମିଶି ବ୍ୟାବସାୟିକ କାର୍ଯ୍ୟକଳାପ ଚଳାଉଛି।
Telangana Cricket Association (TCA) issues legal notices to film actors Vijay Deverakonda and Venkatesh, as well as cricketers Tilak Varma, Ambati Rayudu, and Mohd Siraj.
The notice states that the Hyderabad Cricket Association (HCA) is conducting business with corporate…
— ANI (@ANI) June 17, 2026
ଏହି ନୋଟିସ୍ରେ ଅଭିଯୋଗ କରାଯାଇଛି ଯେ, ହାଇଦ୍ରାବାଦ କ୍ରିକେଟ ଆସୋସିଏଶନ ଯେଉଁ ଟି-୨୦ ଲିଗ୍ (TG20) ଆୟୋଜନ କରୁଛି, ସେଥିପାଇଁ ବିସିସିଆଇର କୌଣସି ମଞ୍ଜୁରୀ ନିଆଯାଇ ନାହିଁ। ବୋର୍ଡର ଅନୁମତି ବିନା ଏଭଳି ଲିଗ୍ର ପ୍ରଚାର ପ୍ରସାର କରିବା ନିୟମର ସମ୍ପୂର୍ଣ୍ଣ ଉଲ୍ଲଂଘନ ଏବଂ ଏହାକୁ ଏକ ଅପରାଧ ଶ୍ରେଣୀରେ ଗଣାଯିବ।
Time for Climax Fight Against Villains of Telangana Cricket ..!! @BCCIdomestic @BCCI @BCCIWomen pic.twitter.com/VVnng6H2Xt
— TCA Official (@TCA_Telangana) June 16, 2026
ସୂଚନାଯୋଗ୍ୟ, ଅଭିନେତା ବିଜୟ ଏହି ଲିଗ୍ର ବ୍ରାଣ୍ଡ ଆମ୍ବାସଡର ଭାବେ ଜଡ଼ିତ ଥିବା ବେଳେ ଉକ୍ତ କ୍ରିକେଟରମାନଙ୍କ ଉପରେ ଏହାର ପ୍ରମୋଶନ ବା ପ୍ରଚାର କରୁଥିବାର ଅଭିଯୋଗ ରହିଛି। ତେବେ ଏହି ଆଇନଗତ ନୋଟିସ ମିଳିବା ପରେ ହାଇଦ୍ରାବାଦ କ୍ରିକେଟ ଆସୋସିଏଶନ କିମ୍ବା ସମ୍ପୃକ୍ତ ଖେଳାଳି ଓ ଅଭିନେତାଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ। ଏପରିକି ଏହି ସମ୍ବେଦନଶୀଳ ମାମଲାକୁ ନେଇ ବିସିସିଆଇ (BCCI) ମଧ୍ୟ ଏପର୍ଯ୍ୟନ୍ତ ନିଜର କୌଣସି ସ୍ପଷ୍ଟୀକରଣ ରଖିନାହିଁ।
