କେନ୍ଦୁଝର,୨୮ା୧(ସ୍ବ.ପ୍ର./ଡି.ଏନ.ଏ.)-କେନ୍ଦୁଝର ଜିଲା ଦୌରାଜଜ ବେଣୁଧର ପାତ୍ର ଏକ ଗଣବଳାତ୍କାର ମାମଲାର ଶୁଣାଣି କରି ୩ ଦୋଷୀଙ୍କୁ ୨୦ ବର୍ଷ ଲେଖାଏ ଜେଲଦଣ୍ଡାଦେଶ କରିବା ସହ ୫ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ଅଧିକ ୩ ମାସ କରାଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଏହି ଘଟଣା ରାଉରକେଲା ଅଞ୍ଚଳରେ ଘଟିଥିବାବେଳେ ଉଚ୍ଚ ନ୍ୟାୟାଳୟଙ୍କ ଆଦେଶକ୍ରମେ ଏହା ଅତିରିକ୍ତ ସେସନ ଜଜ କୋର୍ଟ ରାଉରକେଲାରୁ କେନ୍ଦୁଝର ଜିଲା ଜଜ କୋର୍ଟକୁ ତା୫।୮।୨୦୧୯ରିଖରେ ବିଚାର ପାଇଁ ସ୍ଥାନାନ୍ତରିତ ହୋଇଥିଲା। ଦୋଷୀମାନେ ହେଲେ ବିଶ୍ରା ଥାନା ଅଞ୍ଚଳର ଅଜିତ ଲଳିତ ଗୁଡ଼ିଆ, ରାଜେଶ ଲାକ୍ରା ଓ ନିନହାଣିଆ ଲାକ୍ରା। ୧୩ ସାକ୍ଷୀଙ୍କ ବୟାନକୁ ଭିତ୍ତି କରି କୋର୍ଟ ଏହି ଆଦେଶ ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ୨୦୧୭ ଜୁଲାଇ ୧୨ ତାରିଖ ସନ୍ଧ୍ୟା ୫ଟାରେ ଜନୈକା ୨୯ ବର୍ଷୀୟା ଯୁବତୀ ବିଲରୁ ଘରକୁ ଫେରୁଥିବା ବେଳେ ଅଭିଯୁକ୍ତମାନେ ତାଙ୍କୁ ବାଟରୁ ଉଠାଇ ନେଇ ଏକ ମହୁଲ ଗଛ ନିକଟରେ ଗଣବଳାତ୍କାର କରିଥିଲେ। କାହାକୁ ଜଣାଇଲେ ହତ୍ୟା କରିଦେବେ ବୋଲି ଧମକ ଚମକ ଦେଇଥିଲେ। ପରେ ଏହି ଘଟଣାକୁ ନେଇ ପୀଡିତା ୧୯ ତାରିଖରେ ଥାନାରେ ଏତଲା ଦେଇଥିଲେ। ବିଶ୍ରା ଥାନା ପୋଲିସ ଦଫା ୩୭୬ (ଡି) ଓ ୫୦୬ ଆଇପିସି ଧାରାରେ ଏକ ମାମଲା (ନଂ.୬୦/୨୦୧୭) ରୁଜୁ କରି ଅଭିଯୁକ୍ତମାନଙ୍କୁ ଗିରଫ କରିଥିଲା। ସରକାରୀ ଓକିଲ ପ୍ରଦୀପ କୁମାର ଦାସ କହିଛନ୍ତି ଯେ, ରାଉରକେଲାରେ ସେତେବେଳେ ଆଇନଜୀବୀଙ୍କ ଆନ୍ଦୋଳନ ଯୋଗୁ ଉଚ୍ଚନ୍ୟାୟାଳୟଙ୍କର ସ୍ବତନ୍ତ୍ର ଆଦେଶକ୍ରମେ ଏହି ମାମଲାଟି ରାଉରକେଲାରୁ କେନ୍ଦୁଝରକୁ ସ୍ଥାନାନ୍ତରିତ ହୋଇଥିଲା।
