ନୂଆଦିଲ୍ଲୀ,୧।୧୧ : ଭାରତର ପ୍ରଧାନ ବିଚାରପତି (ସିଜେଆଇ) ଉଦୟ ଉମେଶ ଲଲିତ ମଙ୍ଗଳବାର ହାଇକୋର୍ଟଙ୍କ ନିଷ୍ପତ୍ତି ବିରୋଧରେ ଆନ୍ଧ୍ରପ୍ରଦେଶ ସରକାରଙ୍କ ଆବେଦନ ଶୁଣାଣିରୁ ନିଜକୁ ଦୂରେଇ ରଖିଛନ୍ତି। ଏଥିରେ ଉଲ୍ଲେଖଥିଲା ଯେ ରାଜଧାନୀକୁ ଘୁଞ୍ଚାଇବା, ବିଭାଜନ ନେଇ କୌଣସି ଆଇନ କରିବା କ୍ଷେତ୍ରରେ ରାଜ୍ୟର ଅଧିକାରରେ ଯୋଗ୍ୟତା ଅଭାବ ରହିଛି। ଯେତେବେଳେ ରାଜ୍ୟ ସରକାରଙ୍କ ଆବେଦନ ଶୁଣାଣି ପାଇଁ ଆସିଲା, ସେତେବେଳେ ପ୍ରଧାନ ବିଚାରପତି ଏବଂ ଜଷ୍ଟିସ ବେଲା ଏମ ତ୍ରିବେଦୀଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କୁ ଅବଗତ କରାଯାଇଥିଲା ଯେ ଜଷ୍ଟିସ ଲଲିତ ଜଣେ ଆଡଭୋକେଟ ଭାବରେ ଆନ୍ଧ୍ରପ୍ରଦେଶର ବିଭାଜନ ସମ୍ପର୍କିତ ପ୍ରସଙ୍ଗରେ ଆଇନଗତ ମତ ଦେଇଥିଲେ। ସିଜେଆଇ କହିଛନ୍ତି ଯେ ମୁଁ ଏକ ସଦସ୍ୟ ନଥିବା ଖଣ୍ଡପୀଠ ସମ୍ମୁଖରେ ଏହି ମାମଲା ତାଲିକାଭୁକ୍ତ ହେବା ଉଚିତ।
ଚଳିତ ବର୍ଷ ମାର୍ଚ୍ଚ ୩ ରେ ଆନ୍ଧ୍ରପ୍ରଦେଶ ହାଇକୋର୍ଟ କହଥିଲେ ଯେ ରାଜଧାନୀ ଚଳାଇବା, ବିଭାଜନ କିମ୍ବା ଭାଗ କରିବା ପାଇଁ ରାଜ୍ୟ ଦ୍ୱାରା କୌଣସି ଆଇନ ହୋଇପାରିବ ନାହିଁ। ଏହାଦ୍ୱାରା ରାଜ୍ୟ ରାଜଧାନୀକୁ ତିନିଟି ଅଲଗା ରାଜଧାନୀ କରିବା ପାଇଁ ମୁଖ୍ୟମନ୍ତ୍ରୀ ଓ୍ବାଇଏସ ଜଗନ ମୋହନ ରେଡ୍ଡୀଙ୍କ ଯୋଜନାରେ ବିରାମ ଲାଗିଥିଲା। ହାଇକୋର୍ଟର ତିନିଜଣିଆ ଖଣ୍ଡପୀଠ କହିଥିଲେ ଯେ ରାଜ୍ୟ ସରକାର ଏବଂ ରାଜଧାନୀ ଅଞ୍ଚଳ ବିକାଶ ପ୍ରାଧିକରଣ ଆବେଦନକାରୀଙ୍କ ମୌଳିକ ଅଧିକାରକୁ ଉଲ୍ଲଂଘନ କରିଛନ୍ତି ଏବଂ ୬ ମାସ ମଧ୍ୟରେ ଅମରାବତୀ ରାଜଧାନୀ ତଥା ରାଜଧାନୀ ଅଞ୍ଚଳ ନିର୍ମାଣ ତଥା ବିକାଶ କରିବାକୁ ନିର୍ଦ୍ଦେଶ ଦେଇଛନ୍ତି।
ଅମରାବତୀ ଅଞ୍ଚଳର କୃଷକମାନଙ୍କ ଦ୍ୱାରା ୬୩ ଟି ପିଟିଶନ ଉପରେ ହାଇକୋର୍ଟଙ୍କ ରାୟ ଆସଥିଲା। ବିଶାଖାପଟ୍ଟନମକୁ ଆନ୍ଧ୍ରପ୍ରଦେଶର କାର୍ଯ୍ୟନିର୍ବାହୀ ରାଜଧାନୀ, କୁର୍ନୁଲକୁ ନ୍ୟାୟିକ ରାଜଧାନୀ ଏବଂ ଅମରାବତୀକୁ ବିଧାନସଭା ରାଜଧାନୀ ରୂପେ ପରିଣତ କରିବା ପାଇଁ ଜଗନ ମୋହନଙ୍କ ଶାସନର ନିଷ୍ପତ୍ତି ବିରୋଧରେ ଏହି ପିଟିଶନ ଦାଖଲ କରାଯାଇଥିଲା।
