କୋରାପୁଟ,୧୩।୩(ସ୍ବ.ପ୍ର.): ଦୃଢ ଇଛାଶକ୍ତିଠାରେ ହାର ମାନେ ସବୁ ପ୍ରତିବନ୍ଧକ। ଯେମିତି ବୟସ ହାର ମାନିଛି ୩ କୁନି ଭଉଣୀଭାଇଙ୍କ କ୍ଷେତ୍ରରେ। ୩ଘଣ୍ଟାରେ ସେମାନେ କୋରାପୁଟରୁ ଦାମନଯୋଡି ଦୌଡି ରାଜ୍ୟପାଇଁ ନୂଆ କିର୍ତ୍ତୀ ପ୍ରତିଷ୍ଠା କରିବାରେ ସଫଳ ହୋଇଛନ୍ତି। ସେମାନେ ହେଲେ କୋରାପୁଟ ସହରର ଜିତେନ୍ଦ୍ର ବାହାଦୁରଙ୍କ ୨ ଝିଅ ଯମୁନା (୧୧), ତପସ୍ୟା(୭) ଓ ୧୦ ବର୍ଷର ପୁଅ ହରି ା
ତିନି ଭଉଣୀ ଭାଇ କୋରାପୁଟ ଜିଲା ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟ ସମ୍ମୁଖରୁ କୋଚ ରାମଚନ୍ଦ୍ର ଜେନାଙ୍କ ନେତୃତ୍ୱରେ କୋରାପୁଟରୁ ଦାମନଯୋଡି ଦୀର୍ଘ ୪୦ କି.ମି. ରାସ୍ତା ଦୌଡିବା ଆରମ୍ଭ କରିଥିଲେ। ମାତ୍ର ୩ ଘଣ୍ଟାରେ ସେମାନେ ଦାମନଯୋଡିରେ ନିଜ ଲକ୍ଷ୍ୟ ସ୍ଥଳରେ ପହଞ୍ଚି ଯାଇଥିଲେ। କୋରାପୁଟରେ ପୌରାଧ୍ୟକ୍ଷ ଲଲାଟ ରଞ୍ଜନ ସେଠୀ ମୁଖ୍ୟ ଅତିଥି ଭାବେ ଉପସ୍ଥିତ ରହି ଏହି ସେମାନଙ୍କୁ ଉତ୍ସାହିତ କରିଥିଲେ। ବାଟରେ ମଧ୍ୟ ବହୁ ଜନସାଧାରଣ ଏହି କୁନି ଭଉଣୀଭାଇଙ୍କ ଦୌଡ ଦେଖି ସେମାନଙ୍କୁ ପ୍ରଶଂସା କରି ଉତ୍ସାହିତ କରିଥିଲେ। ଏହି ସଫଳତା ପାଇଁ କୋଚ ସମେତ ୩ ଭଉଣୀଭାଇଙ୍କୁ କୋରାପୁଟ ଜିମାନାଜିମ ସମ୍ପାଦକ ଭବାନୀ ଶଙ୍କର ମିଶ୍ର ସମସ୍ତ ସଦସ୍ୟଙ୍କ ଉପସ୍ଥିତିରେ ସେମାନଙ୍କୁ ଟ୍ରଫି ଦେଇ ଉତ୍ସାହିତ କରିଥିଲେ ା
ସୂଚନାଯୋଗ୍ୟ, ଗତ ଏକ ବର୍ଷ ତଳେ ଏହି ୩ କୁନି ଧାବକ ଜୟପୁରରୁ ବୋରିଗୁମ୍ମା ଯାଏ ପ୍ରାୟ ୨୨ କି.ମି. ଦୌଡି ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲେ। ଗତ ବିଶ୍ୱକପ ହକିର ପ୍ରସାର ପାଇଁ ହୋଇଥିବା ମାରାଥନରେ ମଧ୍ୟ ଦୌଡି ସେମାନେ ସଫଳତା ପାଇଥିଲେ। ଏଥିଯୋଗୁ ଜିଲା ପ୍ରଶାସନ ପକ୍ଷରୁ ୩ ଭଉଣୀଭାଇ ସମ୍ମାନିତ ହୋଇଥିଲେ। ରବିବାର ଭାଇ ହରିଙ୍କ ଜନ୍ମଦିନ ଥିବାରୁ ଏହି ଅବସରରେ କୋରାପୁଟରୁ ଦାମନଯୋଡି ଦୌଡିବାକୁ ସ୍ଥିର କରିଥିଫଲେ ବୋଲି ଯୁମନା କହିଛନ୍ତି।
