ଭୁବନେଶ୍ୱର,୩ା୫(ସତ୍ୟଜିତ୍ ରାଉତ):ଚଳିତ ଲୋକ ସଭା ଓ ବିଧାନସଭା ନିର୍ବାଚନ ପାଇଁ ବିଭିନ୍ନ ରାଜନୈତିକ ଦଳର ସମର୍ଥକଙ୍କ ମଧ୍ୟରେ ଆରୋପ ପ୍ରତ୍ୟାରୋପ ଲାଗି ରହିଛି। ପ୍ରଚାର ପାଇଁ ଡିଜିଟିଲ୍ ଦୁନିଆକୁ ନେତାମାନେ ଆପଣାଇଥିବାବେଳେ ସମର୍ଥକମାନେ ବିଭିନ୍ନ ଆପତ୍ତିଜନକ ପୋଷ୍ଟ କରିବାକୁ ମଧ୍ୟ ପଛାଉନାହାନ୍ତି। ଏଭଳିସ୍ଥିତିରେ ଅବାଧ, ମୁକ୍ତ, ନିରପେକ୍ଷ ଓ ଶୃଙ୍ଖଳିତ ନିର୍ବାଚନ ପାଇଁ ଓଡ଼ିଶା ପୋଲିସର କ୍ରାଇମବ୍ରାଞ୍ଚ ସ୍ଥିତି ଉପରେ ସ୍ବତନ୍ତ୍ର ନଜର ରଖି କଡ଼ା ପଦକ୍ଷେପ ନେଉଛି। ଏହି ପରିପ୍ରେକ୍ଷୀରେ କ୍ରାଇମବ୍ରାଞ୍ଚରେ ନୂଆ କରି ଖୋଲାଯାଇଥିବା ସୋସିଆଲ ମିଡିଆ ସେଲ୍ ପକ୍ଷରୁ ବିଭିନ୍ନ ସାମାଜିକ ଗଣମାଧ୍ୟମରେ ହୋଇଥିବା ୨୯୨ ଆପତ୍ତିଜନକ ପୋଷ୍ଟକୁ ବ୍ଲକ୍ କରାଯାଇଥିବା ଗୁରୁବାର ସୂଚନା ଦିଆଯାଇଛି। ଏହି ପୋଷ୍ଟଗୁଡିକ ବିଭିନ୍ନ ରାଜନୈତିକ ଦଳର ସମର୍ଥକ ଓ ଅନ୍ୟ ଗ୍ରୁପ ପକ୍ଷରୁ ୟୁଟ୍ୟୁବ୍, ଇନ୍ଷ୍ଟାଗ୍ରାମ, ଫେସ୍ବୁକ୍ ଓ ଏକ୍ସରେ ହୋଇଥିଲା। କ୍ରାଇମବ୍ରାଞ୍ଚ ସୂଚନା ଅନୁଯାୟୀ, ଫେସ୍ବୁକ୍ରେ ୨୯୮ ପୋଷ୍ଟ ଓ ଇନ୍ଷ୍ଟାଗ୍ରାମରେ ୧୯୦ଟି ପୋଷ୍ଟକୁ ହଟାଇବାକୁ ଅନୁରୋଧ କରାଯାଇଥିଲା। ମେଟା ପକ୍ଷରୁ ଫେସ୍ବୁକ୍ରୁ ୧୮୧ ଓ ଇନ୍ଷ୍ଟାଗ୍ରମରୁ ୧୧୦ ପୋଷ୍ଟକୁ ବ୍ଲକ୍ କରାଯାଇଛି। ସେହିପରି ୟୁଟ୍ୟୁବ୍ରେ ୩ଟି କଣ୍ଟେଣ୍ଟ୍କୁ ହଟାଇବାକୁ ଅନୁରୋଧ କରାଯାଇଥିବା ବେଳେ ଗୋଟିଏକୁ ଗୁଗଲ ପକ୍ଷରୁ ବ୍ଲକ୍ କରାଯାଇଛି। ମାର୍ଚ୍ଚ ୧୬ରୁ ଏନେଇ ୨ଟି ମାମଲା ରୁଜୁ କରାଯାଇ ଜଣଙ୍କୁ ଗିରଫ କରାଯାଇଥିବାବେଳେ ଅନ୍ୟ ଜଣଙ୍କୁ ସିଆର୍ପିସି ଦଫା ୪୧-ଏରେ ନୋଟିସ୍ ଦିଆଯାଇ ଛଡ଼ାଯାଇଛି। ସେହିପରି ବିଭିନ୍ନ ସୋସିଆଲ ମିଡିଆରେ ୨୭୫ରୁ ଊର୍ଦ୍ଧ୍ୱ ଆକାଉଣ୍ଟକୁ ନଜର ରଖାଯାଇ ତଦାରଖ କରାଯାଉଛି। ନିୟମ ଉଲ୍ଲଂଘନ କଲେ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦିଆଯାଇଛି।
ନିର୍ବାଚନ କମିଶନ ଏବଂ ଓଡ଼ିଶା ମୁଖ୍ୟ ନିର୍ବାଚନ ଅଧିକାରୀଙ୍କ ନିର୍ଦ୍ଦେଶକ୍ରମେ କ୍ରାଇମବ୍ରାଞ୍ଚରେ ସୋସିଆଲ ମିଡିଆ ସେଲ୍ ଖୋଲାଯାଇଛି। କ୍ରାଇମବ୍ରାଞ୍ଚ ଆଇଜି ଏହି ସେଲ୍ର ନୋଡାଲ ଅଫିସର ଦାୟିତ୍ୱରେ ଅଛନ୍ତି। ସାଇବର କମ୍ପ୍ଲେକ୍ସରେ କାମ କରୁଥିବା ଏହି ସେଲ୍ରେ ଜଣେ ଲେଖାଏ ଡିଏସ୍ପି, ଇନ୍ସପେକ୍ଟର, ଏସ୍ଆଇ ଓ ୪ଜଣ ଏଏସ୍ଆଇ ଏବଂ ଦୁଇଜଣ କନଷ୍ଟେବଳ ରହିଛନ୍ତି। ଏହି ସ୍ବତନ୍ତ୍ର ୟୁନିଟ୍ ନିୟମିତ ଭାବେ ବିଭିନ୍ନ ସୋସିଆଲ୍ ମିଡିଆରେ ସାଇବର ପାଟ୍ରୋଲିଂ ଜାରି ରଖିବା ସହ ରାଜୈନିତିକ ଘୃଣା, ଗାଳି ଗୁଲଜ ସମ୍ବନ୍ଧୀୟ ପୋଷ୍ଟ କରାଯାଉଥିବା ପେଜ୍ ଏବଂ ଆକାଉଣ୍ଟଗୁଡ଼ିକୁ ହଟାଇବା ପାଇଁ ପ୍ରକ୍ରିୟା ଜାରି ରଖିଛି। ବିଭିନ୍ନ ସୋସିଆଲ୍ ମିଡିଆ କମ୍ପାନୀର ନୋଡାଲ ଅଫିସରଙ୍କ ସହ ସିଧାସଳଖ ଯୋଗାଯୋଗ ରଖିଛି ଏହି ସ୍ବତନ୍ତ୍ର ସେଲ୍। ସେହିପରି ରାଜ୍ୟରେ ଜିଲା ସାଇବର ହେଲ୍ପ ଡେସ୍କ ଓ ଜିଲା ସାଇବର ମିଡିଆ ସେଲ୍ଗୁଡ଼ିକ ମଧ୍ୟ କାର୍ଯ୍ୟ କରୁଛି। ଜିଲାସ୍ତରରେ ସାଇବର ହେଲ୍ପ ଡେସ୍କ ପକ୍ଷରୁ ଏନେଇ ଅଭିଯୋଗ ଗ୍ରହଣ କରାଯାଉଛି। କ୍ରାଇମବ୍ରାଞ୍ଚର ସୋସିଆଲ୍ ମିଡିଆ ୟୁନିଟ୍ ପକ୍ଷରୁ ଆବଶ୍ୟକ ସହାୟତା ଯୋଗାଇଦିଆଯିବା ସହ ଏନେଇ ତଦାରଖ କରାଯାଉଥିବା ବୋଲି ସୂଚନା ଦିଆଯାଇଛି।
