ଭୁବନେଶ୍ୱର,୩୧।୧୦(ବ୍ୟୁରୋ): ଦେଶରେ ସ୍ବତନ୍ତ୍ର ବ୍ୟବସ୍ଥା ଆବଶ୍ୟକ କରୁଥିବା ପିଲାଙ୍କ ପାଇଁ ନିୟମିତ ସ୍ବତନ୍ତ୍ର ଶିକ୍ଷକ ନିଯୁକ୍ତି ଜରୁରୀ ହୋଇପଡ଼ିଛି। ତେଣୁ ଓଡ଼ିଶା ସମେତ ବିଭିନ୍ନ ରାଜ୍ୟ ସ୍ବତନ୍ତ୍ର ଶିକ୍ଷକ ପଦବୀ ପୂରଣ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ରିହାବିଲିଟେଶନ କାଉନ୍ସିଲ ଅଫ୍ ଇଣ୍ଡିଆ ନିକଟରେ ସ୍ବତନ୍ତ୍ର ଶିକ୍ଷକ ପଦବୀ ପାଇଁ ୧,୨୦,୭୨୧ ଜଣ ନାମ ପଞ୍ଜୀକରଣ କରିଥିବାବେଳେ ସେମାନଙ୍କ ମଧ୍ୟରେ ଓଡ଼ିଶାରୁ ୫,୯୬୬ ରହିଛନ୍ତି। ପିଲା ଓ ଶିକ୍ଷକ ଆନୁପାତିକ ହାରରେ ସ୍ବତନ୍ତ୍ର ଶିକ୍ଷକଙ୍କୁ ନିୟମିତ ନିଯୁକ୍ତି ଦେବାକୁ ରାଜ୍ୟଗୁଡ଼ିକୁ ସର୍ବୋଚ୍ଚ ଅଦାଲତ କହିଛନ୍ତି। ନ୍ୟାଶନାଲ କାଉନ୍ସିଲ ଅଫ୍ ଟିଚର୍ସ ଏଜୁକେଶନ(ଏନ୍ସିଟିଇ) ଦ୍ୱାରା ପଞ୍ଜୀକୃତ ଏବଂ ସ୍ବୀକୃତିପ୍ରାପ୍ତ ଶିକ୍ଷକଙ୍କ ଥଇଥାନ ଜରୁରୀ ହୋଇପଡ଼ିଛି। ୟୁନିଫାଏଡ୍ ଡିଷ୍ଟ୍ରିକ୍ଟ ଇନ୍ଫର୍ମେଶନ ସିଷ୍ଟମରୁ ମିଳିଥିବା ତଥ୍ୟ ଅନୁସାରେ ସାରା ଦେଶରେ ୨୨.୫ଲକ୍ଷ ସ୍ବତନ୍ତ୍ର ବ୍ୟବସ୍ଥା ଆବଶ୍ୟକ କରୁଥିବା ପିଲା(ସିଡବ୍ଲ୍ୟୁଏସ୍ଏନ୍) ଅଛନ୍ତି। ସେମାନଙ୍କ ପାଇଁ ମାତ୍ର ୪.୩୩ଲକ୍ଷ ସାଧାରଣ ଶିକ୍ଷକ ପ୍ରଶିକ୍ଷଣ ପାଇଛନ୍ତି। ଏହା ସହିତ ଏହି ଶିକ୍ଷକମାନେ ସାଧାରଣ ପିଲାଙ୍କୁ ମଧ୍ୟ ପଢ଼ାଉଛନ୍ତି। ଅନ୍ୟପକ୍ଷରେ ସିଡବ୍ଲ୍ୟୁଏସ୍ଏନ୍ଙ୍କ ପାଇଁ ଦେଶରେ ଏବେ ମାତ୍ର ୨୮,୫୩୫ ସ୍ବତନ୍ତ୍ର ଶିକ୍ଷକ ରହିଛନ୍ତି, ଯାହାକି ଆବଶ୍ୟକଠାରୁ ବହୁତ କମ୍ ବୋଲି ବିଚାରପତି ଏ.ଏମ୍.ଖାନ୍ଓ୍ବିଲ୍କର, ଦୀନେଶ ମାହେଶ୍ୱରୀ ଏବଂ ସି.ଟି. ରବିକୁମାରଙ୍କ ନେଇ ଗଠିତ ଖଣ୍ଡପୀଠ ଉଲ୍ଲେଖ କରିଛନ୍ତି।
ସର୍ବୋଚ୍ଚ ଅଦାଲତଙ୍କ ପକ୍ଷରୁ ଦିଆଯାଉଥିବା ଏହି ନିର୍ଦ୍ଦେଶକୁ ଯେପରି ଠିକ୍ ଭାବେ କାର୍ଯ୍ୟକାରୀ କରାଯିବ ଏବଂ ନିର୍ଦ୍ଦିଷ୍ଟ କର୍ତ୍ତୃପକ୍ଷଙ୍କୁ ସ୍ବତନ୍ତ୍ର ଶିକ୍ଷକ ନିଯୁକ୍ତି କରିବାକୁ ସୁପାରିସ କରାଯିବା ସହ ଆସନ୍ତା ଫେବୃୟାରୀ ଶେଷ ସୁଦ୍ଧା ରିପୋର୍ଟ ପ୍ରଦାନ କରିବାକୁ ରାଜ୍ୟ ଆୟୋଗଙ୍କୁ ଖଣ୍ଡପୀଠ କହିଛନ୍ତି। ଏପରି କି ଭିତ୍ତିଭୂମି ଥିବା ସାଧାରଣ ବିଦ୍ୟାଳୟଗୁଡ଼ିକରେ ସିଡବ୍ଲ୍ୟୁଏସ୍ଏନ୍ ପିଲାଙ୍କୁ ଉପଯୁକ୍ତ ଶିକ୍ଷା ଦାନ ଏବଂ ଏଥିପାଇଁ ଶିକ୍ଷକ ଓ କର୍ମଚାରୀଙ୍କୁ ଯେପରି ବାଧ୍ୟତାମୂଳକ ପ୍ରଶିକ୍ଷଣ ଦିଆଯାଇପାରିବ ସେନେଇ ରାଜ୍ୟ ସରକାର ପଦକ୍ଷେପ ନେବାକୁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଛନ୍ତି।
