ଗୋପ,୧୧।୮(ଡି.ଏନ.ଏ): ପୁରୀ ଜିଲା ଗୋପ ଥାନା ଅନ୍ତର୍ଗତ ରେଢୁଆ ଗଁାରେ ଅଭିଯୁକ୍ତଙ୍କୁ ଧରିବାକୁ ଯାଇଥିବା ପୋଲିସଙ୍କୁ ଗ୍ରାମବାସୀ ୫ଘଣ୍ଟା ଅଟକ ରଖିବା ଅଭିଯୋଗରେ ୨୭ଜଣଙ୍କୁ ସୋମବାର ଗିରଫ କରାଯାଇ କୋର୍ଟଚାଲାଣ କରାଯାଇଛି। ଏମାନଙ୍କ ମଧ୍ୟରେ ୧୯ଜଣ ମହିଳା ଥିବା ଜଣାପଡ଼ିଛି। ଗିରଫ ଅଭିଯୁକ୍ତଙ୍କ ବିରୋଧରେ ୩୭୯, ୩୨୩, ୩୨୫, ୩୦୭ ଭଳି ୨୦ରୁ ଊର୍ଦ୍ଧ୍ୱ ଦଫା ଲଗାଯାଇଛି। ଏ ନେଇ ଏସ୍ପି ଅଖିଳେଶ୍ୱର ସିଂ ଗୋପ ଥାନାରେ ଖବରଦାତା ସମ୍ମଳନୀରେ ଏହା ଜଣାଇଛନ୍ତି। ହେଲେ ପୋଲିସର ଏଭଳି ଘରେ ପଶି ଜବରଦସ୍ତ ଉଠାଇ ନେବା ଘଟଣାକୁ ସାଧାରଣରେ ନାପସନ୍ଦ କରିବା ସହ ପୋଲିସ ଆଇନର ଅପବ୍ୟବହାର କରୁଛି ବୋଲି ଗ୍ରାମବାସୀ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ଏହି ଗଁାରେ କିଛିଦିନ ଧରି ଏକ ହନୁମାନ ମନ୍ଦିର ଜାଗାକୁ ନେଇ ବିବାଦ ଲାଗିରହିଥିଲା। ଗତ ୪ତାରିଖରେ ଗୋଟିଏ ଷଣ୍ଢ କୁଣ୍ଡା ଖାଇବାକୁ ନେଇ ପାଟିତୁଣ୍ଡ ହୋଇ ୨ଟି ଅଭିଯୋଗ ହୋଇଥିଲା। ପୋଲିସ ଏହି ଘଟଣାକୁ ଧ୍ୟାନ ନ ଦେଇ ଏକ ପାଇପ୍ ଚୋରିକୁ ନେଇ ୭ତାରିଖ ରାତ୍ର ପ୍ରାୟ ୧ଟାରେ ଗିରଫ ପାଇଁ ଗ୍ରାମକୁ ଯାଇଥିଲା। ମାତ୍ର କୌଣସି କାଗଜ ନ ଥାଇ ୨ଯୁବକଙ୍କୁ ଗିରଫ କରିବା ବେଳେ ମହିଳାଙ୍କୁ ଅସଦାଚରଣ, ଘରଦ୍ୱାର ଭାଙ୍ଗିବାରୁ ଗ୍ରାମବାସୀ ପୋଲିସଙ୍କୁ ଦୀର୍ଘ ୫ଘଣ୍ଟା ଧରି ଅଟକ ରଖିଥିଲେ। ସକାଳୁ ନିମାପଡ଼ା ଡିଏସ୍ପି ପି.କେ ଦଳେଇ ଗାଁରେ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ଅଟକ ପୋଲିସ ମୁକୁଳିଥିଲେ। ଏହି ଘଟଣାକୁ ନେଇ ଗୋପ ଥାନାର ଏଏସ୍ଆଇ ଗଙ୍ଗାଧର ସେଠୀ ନିଜଆଡୁ ଏକ ମାମଲା ନଂ. ୨୧୨/୨୦ ରୁଜୁ କରିଥିଲେ। ଏ ନେଇ ପୋଲିସ ସୋମବାର ଭୋର ସମୟରେ ଉକ୍ତ ଗାଁରେ ପଶି ୧୯ ମହିଳା, ୯ ଜଣ ପୁରୁଷଙ୍କୁ ଉଠାଇ ଆଣି ଗୋପ ଥାନାକୁ ନ ଆଣି ରାମଚଣ୍ଡୀ ଥାନାକୁ ନେଇ କୋର୍ଟ ଚାଲାଣ କରିଥିଲା। ସମସ୍ତଙ୍କୁ କୋର୍ଟ ଚାଲାଣ କରିବା ପରେ କୋର୍ଟ ଜେଲ ହାଜତକୁ ପଠାଇ ଦେଇଥିବା ଜଣାପଡିଛି। ତେବେ ଘଟଣାର ୨ଦିନ ପରେ ହଠାତ୍ ଏଭଳି ଅଚାନକ ବିନା ପଚରାଉଚରା କରି ମିଥ୍ୟାରେ ନେଇଯିବାକୁ ଲୋକେ ସହଜରେ ଗ୍ରହଣ କରିପାରୁ ନାହାନ୍ତି। ଏହି ଘଟଣାର ଠିକ୍ ତଦନ୍ତ କରି କାର୍ଯ୍ୟାନୁଷ୍ଠାନ ନେବା ପାଇଁ ଗ୍ରାମବାସୀ ଏସ୍ପିଙ୍କୁ ନିବେଦନ କରିଛନ୍ତି। ଅନ୍ୟପଟେ ଗ୍ରାମରେ ମହିଳାମାନଙ୍କୁ ନେଇଯିବା ପରେ ଛୋଟ ପିଲାମାନେ ସେମାନଙ୍କ ଫେରିବା ବାଟକୁ ଚାହିଁ ରହିଛନ୍ତି। ଏ ସମ୍ପର୍କରେ ନିମାପଡ଼ା ଡିଏସ୍ପି ପି.କେ. ଦଳେଇଙ୍କୁ ପଚାରିବାରୁ ଏହି କଥାକୁ ଏଡ଼ାଇ ଦେଇ କହିଛନ୍ତି, ଆଇନ ସମସ୍ତ ଲାଗି ସମାନ। ଆଇନକୁ ହାତକୁ ନେବା ଉଚିତ୍ ନୁହେଁ, ବରଂ ସମସ୍ତେ ସମ୍ମାନ ଦେବା କଥା। ଏ ନେଇ ଏସ୍ପି ସିଂ କୁହନ୍ତି, ପୋଲିସ ସେଦିନ ଅଭିଯୁକ୍ତଙ୍କୁ ଗିରଫ ପାଇଁ ଯାଇଥିବାବେଳେ ଗ୍ରାମବାସୀ ପ୍ରତିବନ୍ଧକ ସାଜିଥିଲେ। ଫଳରେ ପୋଲିସ ବାଧ୍ୟ ହୋଇ ମାମଲା ରୁଜୁ କରି ଗିରଫ କରିଥିବାବେଳେ ଆଉ କେତେଜଣ ଫେରାର ଅଛନ୍ତି।
